ការទូទាត់សងប្រាក់តាមប្រព័ន្ធអេឡិចត្រូនិកកើនឡើង ៧៨% នៃ GDP នៅឆ្នាំ ២០២៤

គិតត្រឹមដំណាច់ឆ្នាំ ២០២៤ ចំនួនប្រតិបត្តិការ និងទំហំនៃការទូទាត់សងប្រាក់តាម​ប្រព័ន្ធអេឡិក​ត្រូនិក បានកើនឡើង ៧៨% និង ៣៨% រៀងគ្នា ធៀបនឹងឆ្នាំ ២០២៣ ហើយទំហំ​ទឹក​ប្រាក់​ស្មើ​នឹង​ប្រមាណ ១៥ ដងនៃ ផលិតផលក្នុងស្រុកសរុប (GDP) របស់កម្ពុជា។

យោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជាបង្ហាញថា ប្រព័ន្ធទូទាត់សង​ប្រាក់​ឌីជីថល បានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ និងលើកកម្ពស់បរិយាបន្ន​ហិ​រញ្ញវត្ថុ។

ការអភិវឌ្ឍ និងធ្វើទំនើបកម្មហេដ្ឋារចនាសម្ព័ន្ធប្រព័ន្ធទូទាត់សងប្រាក់ ជាកត្តា​សំខាន់​ក្នុង​ការ​លើក​កម្ពស់លទ្ធភាពធ្វើប្រតិបត្តិការឆ្លងគ្នារវាងគ្រឹះស្ថានធនាគារ ដែលនឹងរួមចំណែកបង្កើនប្រសិទ្ធភាព​នៃការទូទាត់អន្តរធនាគារ។

ជាក់ស្ដែងធនាគារជាតិនៃកម្ពុជា បានដាក់ឱ្យដំណើរការសាកល្បងប្រព័ន្ធទូទាត់សងប្រាក់រួម កាល​ពី​ខែឧសភា ឆ្នាំ ២០២៤ និងមានគ្រឹះស្ថានធនាគារ និងហិរញ្ញវត្ថុចំនួន ៥២ បានដាក់ឱ្យដំណើរ​ការ​សាកល្បងប្រព័ន្ធ។

នៅក្នុងឆ្នាំ ២០២៤ ប្រតិបត្តិការបញ្ជាទូទាត់សងប្រាក់អេឡិកត្រូនិកជាប្រាក់រៀលជាង ៣ ម៉ឺន ៧ ពាន់ប្រតិបត្តិការកើនឡើង ៣៣,៥៥% ដែលមានទំហំទឹកប្រាក់ ៥២៣៦ ប៊ីលានរៀល កើនឡើង ៧,៣៨%។

ចំណែកឯចំនួនប្រតិបត្តិការ​បញ្ជាទូទាត់សងប្រាក់​អេឡិច​ត្រូនិកជាប្រាក់ដុល្លារជាង ៦១ ម៉ឺន​ប្រតិបត្តិ​​ការ​​ថយចុះ ៣,៣៣% គិតជាទំហំទឹកប្រាក់ជាង ១៥ ពាន់លាន​ដុល្លារ​(១៥៣៩៣) កើន​ឡើង​១៧,៣៤% ធៀប​នឹងឆ្នាំ ២០២៣។

ទេសាភិបាល ធនាគារជាតិនៃកម្ពុជា (NBC) លោកជំទាវបណ្ឌិត ជា សិរី បានលើកឡើងថា​៖ «ការអភិវឌ្ឍប្រព័ន្ធទូទាត់កម្ពុជា​ត្រូវបានមជ្ឈដ្ឋានជាតិនិងអន្តរជាតិ​ទទួលស្គាល់ថា​បានបង្កើនការផ្តល់​សេវហិរញ្ញវត្ថុទៅដល់ប្រជាជនកម្ពុជា​ទូទាំងប្រទេស ជាពិសេសដល់តំបន់​ដាច់​ស្រយាល ដែលរួមចំណែកកាត់បន្ថយចំណាយ​ និងហានិភ័យក្នុងប្រតិបត្តិការទូទាត់​ ក៏ដូច​ជាជំរុញការ​ទូទាត់ឱ្យមានភាពងាយស្រួល សុវត្ថិភាព និងប្រសិទ្ធភាពខ្ពស់»។

ជាមួយគ្នានោះដែរ សម្រាប់ប្រព័ន្ធទូទាត់កម្ពុជា ក៏បានជួយលើកកម្ពស់ការប្រើប្រាស់រូបិយវត្ថុជាតិ​ ដោយបង្កើនភាពងាយស្រួល និងលទ្ធភាពក្នុងការទូទាត់ជាមួយប្រទេសដែលកម្ពុជា បានភ្ជាប់​ប្រព័ន្ធ​ទូទាត់ឆ្លងដែន​ជាមួយ៕

អត្ថបទ៖ ឡេង ដេត