សាធារណរដ្ឋកូរ៉េ ប្ដេជ្ញាបោះទុនវិនិយោគរយៈពេលវែងនៅកម្ពុជា

លោក Bin Daein ប្រធាន និងជានាយកប្រតិបត្តិក្រុមហ៊ុន BNK Financial Group នៃសាធារណរដ្ឋកូរ៉េ ប្ដេជ្ញាចិត្តក្នុងការវិនិយោគរយៈពេលវែងនៅកម្ពុជា។

លោក Bin Daein បានលើកឡើងក្នុងពេលជួបពិភាក្សាការងារជាមួយលោកស្រី ជា សិរី ទេសាភិបាល ធនាគារជាតិនៃកម្ពុជា នៅថ្ងៃទី ២៣ មិថុនា ២០២៦។

លោក Bin Daein បានលើកឡើងពីការកត់សម្គាល់របស់លោកចំពោះវឌ្ឍនភាពនៃការអភិវឌ្ឍរបស់កម្ពុជា និងបានបង្ហាញការវាយតម្លៃជាវិជ្ជមានចំពោះបរិយាកាសអំណោយផលសម្រាប់ការវិនិយោគ និងទេសចរណ៍នៅកម្ពុជា បន្ទាប់ពីបានមកបំពេញទស្សនកិច្ចដោយផ្ទាល់។

លោកក៏បានជម្រាបជូនអំពីវឌ្ឍនភាពនៃប្រតិបត្តិការគ្រឹះស្ថានមីក្រូហិរញ្ញវត្ថុ ប៊ីអេនខេស៊ី (ខេមបូឌា) ភីអិលស៊ី ដែលជាក្រុមហ៊ុនបុត្រសម្ព័ន្ធរបស់ BNK Financial Group នៅកម្ពុជា ដោយរំពឹង ការរីកចម្រើននៃប្រតិ បត្តិការរបស់ក្រុមហ៊ុននៅកម្ពុជា នឹងរួមចំណែកលើកកម្ពស់ការយល់ដឹង និងការចាប់អារម្មណ៍របស់វិនិយោគិន​កូរ៉េបន្ថែមទៀតចំពោះសក្តានុពលវិនិយោគនៅកម្ពុជា។

ជាមួយគ្នានេះ លោកក៏បានជម្រាបពីគម្រោងរៀបចំដំណើរទស្សនកិច្ចសម្រាប់ដៃគូអាជីវកម្មពីសាធារណរដ្ឋកូរ៉េ មកកម្ពុជានាពេលខាងមុខផងដែរ។

លោកស្រីទេសាភិបាល បានគូសបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាល និងធនាគារជាតិនៃកម្ពុជា ក្នុងការបន្តពង្រឹងបរិយាកាសអំណោយផលសម្រាប់វិនិយោគិន។

លោកស្រីក៏បានជម្រាបជូនអំពីការអភិវឌ្ឍប្រព័ន្ធទូទាត់ឌីជីថល ដែលបានរួមចំណែកលើកកម្ពស់ប្រសិទ្ធភាព សុវត្ថិភាព និងបរិយាបន្នហិរញ្ញវត្ថុ ព្រមទាំងបានលើកទឹកចិត្តឱ្យបន្តស្វែងរកឱកាសពង្រីកការវិនិយោគនៅកម្ពុជាបន្ថែមទៀត។

នៅក្នុងរយៈពេល ៥ ខែ ២០២៦ ទំហំ​ពាណិជ្ជកម្ម​ទ្វេភាគី​កម្ពុជា-សាធារណរដ្ឋកូរ៉េ ​សម្រេច​បាន​នូវ​ទំហំ​ទឹក​ប្រាក់​ជាង ៤៧៦ លានដុល្លារ​ កើន​ឡើង ៣១,៥% ធៀបនឹងរយៈពេលដូចគ្នា កាលពីឆ្នាំ ២០២៥។

នៅ​ឆ្នាំ ​២០២៥ ​ទំហំ​ពាណិជ្ជ​កម្មទ្វេ​ភាគី​កម្ពុជា-កូរ៉េ​សម្រេច​បាននូវ​ទំហំ​ទឹក​ប្រាក់​ជាង ៩២៣ លាន​ដុល្លារ ​កើឡើង ៩,៨% ក្នុង​នោះកម្ពុជា​​នាំ​ទំនិញ​ចេញ​ទៅកូរ៉េមានតម្លៃជិត ៣២៧ លានដុល្លារ ចំណែកឯកូរ៉េនាំចូលមកវិញមានតម្លៃ ៥៩៦ លានដុល្លារ កើន ១៤,៤%៕

អត្ថបទ៖ ឡេង ដេត