ក្រសួងការងារ ចុះផ្សព្វផ្សាយឱកាសការងារជូនពលរដ្ឋតាមមណ្ឌលភៀសសឹកនៅខេត្តព្រះវិហារ និងឧត្តរមានជ័យ

ក្រុមការងារចល័តរបស់ទីភ្នាក់ងារជាតិមុខរបរ និងការងារ(NEA) នៃក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី៣១ ខែកក្កដា ឆ្នាំ២០២៥ បានចុះផ្សព្វផ្សាយព័ត៌មានពីឱកាសការងារជូនប្រជាពលរដ្ឋ និងជនភៀសសឹកនៅទីតាំងមណ្ឌលភៀសសឹកនៅក្នុងមូលដ្ឋានខេត្តព្រះវិហារ និងខេត្តឧត្ដរមានជ័យ ដើម្បីផ្ដល់ព័ត៌មានពីឱកាសការងារដល់ពួកគាត់។

គោលដៅដែលក្រុមការងារចល័តរបស់ទីភ្នាក់ងារជាតិមុខរបរ និងការងារ(NEA) នៃក្រសួងការងារ និងបណ្ដុះបណ្ដាលវិជ្ជាជីវៈ បានចុះផ្សព្វផ្សាយរួមមាន វត្តឧត្តរគិរីទួលអណ្តែត ភូមិថ្នល់បែក ឃុំថ្មី ស្រុកគូលែន ខេត្តព្រះវិហារ, វត្តពោធិ៍កែវមានជ័យ ភូមិពោធិ៍ ឃុំពោធិ៍ ស្រុកត្បែងមានជ័យ ខេត្តព្រះវិហារ, វត្តពើងព្រះគោ ភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ, វត្តពើងនាគ ភូមិសេដ្ឋកិច្ច ឃុំឈានមុខ ស្រុកត្បែងមានជ័យ ខេត្តព្រះវិហារ, វត្តពើងអង្កកាម(បាក់កាំ) ភូមិបាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ និងវត្តភ្នំកំបោរ ភូមិពោធិ៍ចាស់ ឃុំបេង ស្រុកបន្ទាយអំពិល ខេត្តឧត្តរមានជ័យ។

រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ កាលពីថ្ងៃទី៣១កក្កដា ក្នុងដំណើរចុះសួរសុខទុក្ខ ប្រជាពលរដ្ឋភៀសសឹក និងក្រុមគ្រួសារកងទ័ពដែលភៀសខ្លួនចេញពីតំបន់ជម្លោះព្រំដែនកម្ពុជា-ថៃ ក្នុងឃុំចំនួន៥ នៃស្រុកជាំក្សាន្ត ខេត្តព្រះវិហារ ក៏បានអំពាវនាវដល់ប្រជាពលរដ្ឋ ក៏ដូចជាពលករដែលកំពុងធ្វើការនៅប្រទេសថៃ ឲ្យវិលត្រលប់មកកម្ពុជាវិញ ព្រោះនៅកម្ពុជា មានឱកាសការងារច្រើនកំពុងរង់ចាំ ហើយក៏ទទួលបានអត្ថប្រយោជន៍ច្រើនផងដែរ។

លោករដ្ឋមន្ត្រីក្រសួងការងារបញ្ជាក់ថា ការបំពេញការងារនៅក្នុងស្រុកមានភាពងាយស្រួលច្រើន ពោលគឺ ពេលឈឺទៅពិនិត្យព្យាបាលជំងឺនៅមន្ទីរពេទ្យដោយមិនអស់ប្រាក់ ព្រោះមាន ប.ស.ស. និងមានអត្ថប្រយោជន៍ផ្សេងៗជាច្រើនទៀត។ មិនតែប៉ុណ្ណោះ ពេលចូលនិវត្តន៍ពីការងារ បងប្អូនមានប្រាក់សោធនទៀតផង។ ជាមួយគ្នានោះ លោករដ្ឋមន្ត្រី បានអំពាវនាវដល់ប្រជាពលរដ្ឋ ជួយប្រាប់បន្តទៅបងប្អូនសាច់ញាតិ ដែលធ្វើការនៅប្រទេស​ថៃឱ្យ​ត្រឡប់​មកធ្វើការក្នុងស្រុកវិញ៕