កីឡា

ការលះបង់ជូនជាតិ វឿន វាសនា ចូលហាត់ត្រៀមស៊ីហ្គេម ៣ខែខាតបង់ប្រាក់ខែមិនតិចជាង ៣ម៉ឺនដុល្លារ

បានផុស

១០ ខែ មុន

នៅ

ថ្ងៃសុក្រ ១៥ សីហា ២០២៥

ដោយ

កីឡាករបាល់ទះឆ្នើមរបស់កម្ពុជា វឿន វាសនា ជាការលះបង់ដើម្បីជួយជាតិមាតុភូមិត្រៀមស៊ីហ្គេមចុងឆ្នាំ ២០២៥ នេះរូបគេនឹងមកចូលជំរំហ្វឹកហាត់ជាមួយក្រុមជម្រើសជាតិរយៈពេល ៣ខែមុនការប្រកួតមកដល់ ស្របពេល ៣ខែនេះរូបគេមិនទទួលបានប្រាក់ខែពីក្លឹប Win Streak ខ្ទង់៣ម៉ឺនដុល្លារឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការសហព័ន្ធបាល់ទះកម្ពុជា លោក អាំង សិរីពិសិដ្ឋ ចំពោះកីឡាករ វឿន វាសនា រូបគេនឹងមកចូលជំរំហ្វឹកហាត់ជាមួយក្រុមជម្រើសជាតិកម្ពុជាអំឡុងខែតុលា ឆ្នាំ២០២៥ ដើម្បីត្រៀមប្រកួតប្រជែងមេដាយនៅព្រឹត្តិការណ៍កីឡាស៊ីហ្គេម លើកទី៣៣ នៅចុងឆ្នាំនេះ។

លោក អាំង សិរីពិសិដ្ឋ បង្ហើបប្រាប់ទៀតថា នេះជាការលះបង់មួយសម្រាប់ប្រទេសជាតិដោយសុទ្ធតែចិត្តបើទោះជា៣ខែដែលនឹងមកហ្វឹកហាត់ត្រូវខាតបង់ប្រាក់ខែខ្ទង់៣ម៉ឺនដុល្លារពីក្លឹប Win Streak នៅតៃវ៉ាន់ដែលខ្លួនកំពុងប្រកបអាជីពនៅទីនោះក៏ដោយ។

កីឡាករ វឿន វាសនា

ថ្នាក់ដឹកនាំសហព័ន្ធបាល់ទះរូបនេះបន្តទៀតថា កីឡាករទាំងអស់គួរយកគំរូបតាម វឿន វាសនា ត្រូវលះបង់ជូនជាតិមាតុភូមិននៅពេលដែលប្រទេសជាតិត្រូវការនៅពេលណាមួយ។ ដូចរូបគេហេតុតែស្រឡាញ់ និងចង់ជួយក្រុមជម្រើសជាតិសុខចិត្តលះបង់ប្រាក់ខែមកជួយកីឡាបាល់ទះកម្ពុជាដូចពេលនេះ។

លោក អាំង សិរីពិសិដ្ឋ អគ្គលេខាធិការ

បញ្ជាក់ដែរថា គម្រោងនៃការមកហ្វឹកហាត់ជាមួយក្រុមជម្រើសជាតិកម្ពុជារបស់ វឿន វាសនា នេះនឹងមកអំឡុងខែតុលា ឆាប់ៗនេះ។ ស៊ីហ្គេម លើកទី៣៣ នេះនឹងធ្វើឡើងចាប់ពីថ្ងៃទី៩ ដល់ ២១ ខែធ្នូ ឆ្នាំ២០២៥ នៅឯប្រទេសថៃ។ ចំពោះការចូលរួមយ៉ាងណានោះសហព័ន្ធមិនបានបញ្ជាក់នៅឡើយ ដោយគ្រាន់តែបន្តហ្វឹកហាត់ជាប្រចាំ និងរៀបចំយុទ្ធសាស្ត្រត្រៀមព្រឹត្តិការណ៍នោះជានិច្ច៕