អាមេរិក ដាក់ទណ្ឌកម្មក្រុមសិទ្ធិមនុស្សប៉ាឡេស្ទីនដែលគាំទ្រ ICC ស៊ើបអង្កេតលើអ៊ីស្រាអែល

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៥ខែកញ្ញា សហរដ្ឋអាមេរិកបានដាក់ទណ្ឌកម្មអង្គការសិទ្ធិមនុស្សប៉ាឡេស្ទីនធំៗចំនួនបី គឺ Al-Haq, PCHR និង Al-Mezan ដោយចោទប្រកាន់ថាពួកគេគាំទ្រការស៊ើបអង្កេតរបស់តុលាការឧក្រិដ្ឋកម្មអន្តរជាតិ (ICC) លើឧក្រិដ្ឋកម្មសង្រ្គាមរបស់អ៊ីស្រាអែល។

ក្រុមទាំងនោះត្រូវបានបញ្ចូលទៅក្នុងបញ្ជីទណ្ឌកម្មរបស់ក្រសួងរតនាគារអាមេរិក ដោយរដ្ឋមន្ត្រីការបរទេសលោក Marco Rubio បាននិយាយថា ពួកគេបានចូលរួមដោយផ្ទាល់ជាមួយកិច្ចខិតខំប្រឹងប្រែងរបស់ ICC ដើម្បីកាត់ទោសមន្ត្រីអ៊ីស្រាអែល។

អង្គការទាំងបីបានចងក្រងឯកសារពីការរំលោភបំពានរបស់អ៊ីស្រាអែលជាយូរមកហើយ ហើយភស្តុតាងរបស់ពួកគេត្រូវបានប្រើប្រាស់នៅក្នុង ICC ដែលនាំឱ្យមានដីកាចាប់ខ្លួននាយករដ្ឋមន្ត្រីអ៊ីស្រាអែល Benjamin Netanyahu និងអតីតរដ្ឋមន្ត្រីការពារជាតិលោក Yoav Gallant។

ទោះយ៉ាងណាក្រុមទាំងនោះបានថ្កោលទោសការដាក់ទណ្ឌកម្មនេះថាជា «ភាពកំសាក អសីលធម៌ និងខុសច្បាប់» ដោយចោទប្រកាន់ក្រុងវ៉ាស៊ីនតោនថាបានការពារអ៊ីស្រាអែល ខណៈដែលអ៊ីស្រាអែលប្រព្រឹត្តអំពើប្រល័យពូជសាសន៍លើប៉ាឡេស្ទីន។

អ្នករិះគន់ រួមទាំងអ្នកតស៊ូមតិសិទ្ធិមនុស្ស និយាយថា ទង្វើនេះឆ្លុះបញ្ចាំងពីការខិតខំប្រឹងប្រែងរបស់សហរដ្ឋអាមេរិកក្នុងការបំបិទសំឡេងប៉ាឡេស្ទីន និងការពារអ៊ីស្រាអែល ដោយកត់សម្គាល់ថារដ្ឋបាល ត្រាំ ក៏បានដាក់ទណ្ឌកម្មអាជ្ញាធរប៉ាឡេស្ទីន PLO និង Addameer ដែរ ខណៈពេលដែលអាមេរិកដកទណ្ឌកម្មលើអ្នកតាំងលំនៅអ៊ីស្រាអែល ៕

អត្ថបទ៖ ប៊ុន សុភាព