ព័ត៌មានអន្ដរជាតិ

ឥណ្ឌូណេស៊ីជំរុញអាជីវកម្មឱ្យបង្កើនគោយកទឹកដោះដល់ ១ លានក្បាល ដើម្បីបំពេញតម្រូវការ

បានផុស

១០ ខែ មុន

នៅ

ថ្ងៃអង្គារ ៩ កញ្ញា ២០២៥

ដោយ

ឥណ្ឌូណេស៊ីកំពុងជំរុញឱ្យក្រុមហ៊ុនឯកជន បង្កើន និងស្វែងរកសត្វគោ ១ លានក្បាល ដើម្បីជាផ្នែកមួយនៃផែនការជាតិដ៏មហិច្ឆតា ក្នុងការជំរុញផលិតកម្មទឹកដោះគោក្នុងស្រុក និងកាត់បន្ថយការពឹងផ្អែកលើការនាំចូល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការនេះបានស្ដែងចេញឱ្យឃើញកាលពីពេលថ្មីៗនេះ ដែលឥណ្ឌូណេស៊ីបាននាំចូលពូជគោចិញ្ចឹមយកទឹកដោះ Holstein-Friesian ដែលកំពុងផើម ចំនួន ២០០ ក្បាល ពីប្រទេសអូស្រ្តាលី ទៅចិញ្ចឹមក្នុងកសិដ្ឋាន នៅខេត្ត West Java។

ក្នុងគម្រោងរដ្ឋាភិបាល ឥណ្ឌូណេស៊ីមានគោលបំណងបង្កើនហ្វូងគោផលិតទឹកដោះពី ២២០ ០០០ ក្បាល នាពេលបច្ចុប្បន្ន ដល់ជាង ១ លានក្បាល ដោយចំណាយប្រាក់ ៣ ប៊ីលានដុល្លារ ក្នុងរយៈពេល ៥ឆ្នាំ ដើម្បីបំពេញតម្រូវការទឹកដោះគោក្នុងស្រុក ដោយស្នូលនៃផែនការនេះគឺការប្រើប្រាស់ក្នុងកម្មវិធីផ្តល់អាហារឥតគិតថ្លៃដល់កុមារ និងស្រ្តីមានផ្ទៃពោះ ៨៣ លាននាក់។

យ៉ាងណាមិញ ខណៈការផ្តល់មូលនិធិរបស់រដ្ឋាភិបាលមានកម្រិត ឥណ្ឌូណេស៊ីកំពុងពឹងផ្អែកលើអាជីវកម្មដែលភាគច្រើនគ្មានបទពិសោធន៍ផ្ទាល់ក្នុងការចិញ្ចឹមគោយកទឹកដោះ ក្នុងការផ្តល់ហិរញ្ញប្បទានដល់ការនាំចូលពូជគោដ៏ថ្លៃ ហើយគ្រប់គ្រងសត្វទាំងនេះជាលក្ខណៈសហករណ៍។

គេមើលឃើញថា ចាប់តាំងពីកម្មវិធីផ្ដល់អាហារឥតគិតថ្លៃចាប់ផ្ដើមពីខែធ្នូឆ្នាំមុនមក វាហាក់មានភាពយឺតយ៉ាវក្នុងដំណើរការ។ គិតត្រឹមដំណាច់ខែកក្កដា គោចំនួន ១១ ៣៧៥ ក្បាលត្រូវបាននាំចូល ពីប្រទេសអូស្ត្រាលី ពោលគឺតិចជាងគោលដៅចំនួន ២០០ ០០០ ក្បាលសម្រាប់ឆ្នាំនេះ។ ល្បឿនយឺតនេះបង្កើនការព្រួយបារម្ភអំពីលទ្ធភាពនៃការបង្កើនកម្មវិធីអាហារឥតគិតថ្លៃ ដែលជាការសន្យាដ៏ធំមួយរបស់លោក ប្រាបូវូ ស៊ូប៊ីយ៉ានតូ មុនជាប់ឆ្នោតជាប្រធានាធិបតីឥណ្ឌូណេស៊ីកាលពីឆ្នាំមុន។

ឥណ្ឌូណេស៊ី ដែលជាប្រទេសមានប្រជាជនច្រើនជាងគេលំដាប់ទី ៤ របស់ពិភពលោក បច្ចុប្បន្នពឹងផ្អែកយ៉ាងខ្លាំងលើផលិតផលទឹកដោះ រួមទាំងម្សៅទឹកដោះគោ ដែលនាំចូលពីប្រទេសអូស្ត្រាលី នូវែលសេឡង់ និងសហរដ្ឋអាមេរិក។ រដ្ឋាភិបាលរបស់លោក ប្រាបូវូ ចាត់ទុកគំនិតផ្តួចផ្តើមការនាំចូលគោថាជាជំហានសំខាន់ ឆ្ពោះទៅរកភាពគ្រប់គ្រាន់នៃផ្គត់ផ្គង់ទឹកដោះគោប្រើប្រាស់ដោយខ្លួនឯង និងកាត់បន្ថយការពឹងផ្អែកលើផលិតផលបរទេស។

កន្លងមក អនុរដ្ឋមន្ត្រីក្រសួងកសិកម្មឥណ្ឌូណេស៊ី លោក Sudaryono បានសង្កត់ធ្ងន់ថា រដ្ឋាភិបាលខ្លួនឯងនឹងមិនផ្តល់មូលនិធិដល់ការនាំចូលសត្វគោនោះទេ ប៉ុន្តែលើកទឹកចិត្តអ្នកវិនិយោគ និងអាជីវកម្មឱ្យចាប់យកឱកាសដើម្បីបំពេញតម្រូវការទឹកដោះគោ និងសាច់ ដែលកំពុងកើនឡើងរបស់ប្រទេសតាមរយៈការចូលរួមក្នុងកម្មវិធីរបស់រដ្ឋាភិបាលមួយនេះ៕