ត្រាំ ថា លោកជួយបញ្ចប់សង្រ្គាម «កម្ពុជា-អាមេនី»

ប្រធានាធិបតីសហរដ្ឋអាមេរិក លោក​ ដូណាល់ ត្រាំ បាន​អះអាងថា លោក​​បាន​បញ្ឈប់​សង្គ្រាម​រវាង​ប្រទេសកម្ពុជា និងអាមេនី ដែលស្ថិតនៅចម្ងាយ ៦ ០០០ គីឡូម៉ែត្រពីគ្នា ហើយមិនធ្លាប់ប្រយុទ្ធគ្នាសោះ។

ការអះអាងដោយ​ខុសបែបនេះ ធ្វើឡើងចំពេលដែលលោក ត្រាំ បន្តប្រើវោហាសាស្រ្តដើម្បីជំរុញមុខមាត់របស់ខ្លួន ក្នុងយុទ្ធនាការយកឈ្នះពានរង្វាន់ណូបែលសន្ដិភាព។ កន្លងមក លោកបាន​​និយាយម្ដងហើយម្ដងទៀតថា ខ្លួនបាន​ជួយបញ្ចប់សង្រ្គាមចំនួន ៧ នៅទូទាំងពិភព​លោក ទោះបីជាតួលេខនេះមាន​ភាព​ចម្រូងចម្រាស់ក្ដី រួមទាំងជម្លោះប៉ាគីស្ថាន-ឥណ្ឌា ដែលមន្រ្តីឥណ្ឌា ច្រានចោលការចូលរួមដោះស្រាយបញ្ហារបស់លោក។

ក្នុងអំឡុងកម្មវិធី Founders’ Dinner របស់​វិទ្យាស្ថាន American Cornerstone (ACI) កាលពីថ្ងៃសៅរ៍ លោក ត្រាំ បាន​រៀបរាប់ពីសង្រ្គាម​ដែលលោកបាន​បញ្ចប់ ហើយលោក​បាន​និយាយថា៖​ «កម្ពុជា ហើយនិងអាមេនី។ វា(ជម្លោះ)ទើបតែចាប់ផ្ដើមទេ ប៉ុន្តែវាគឺជាជម្លោះដ៏អាក្រក់មួយ។ មិនគួរឱ្យជឿ»។

យ៉ាងណាមិញ នេះជាការនិយាយខុសយ៉ាងពិតប្រាកដ ដោយ​លោកច្រឡំជម្លោះប្រដាប់អាវុធរវាងកម្ពុជា-ថៃជុំវិញបញ្ហាព្រំដែន និងជម្លោះអាមេនី-អាស៊ែបៃហ្សង់ ជុំវិញទឹកដីជម្លោះរ៉ាំរ៉ៃដូចគ្នា គឺតំបន់ ណាហ្គូរណូ-ការ៉ាប៉ាក់ (Nagorno-Karabakh)។

ជម្លោះប្រដាប់អាវុធកម្ពុជា-ថៃ ផ្ទុះឡើងនៅថ្ងៃទី ២៤ កក្កដា ក្រោមការបាញ់ប្រហារឈ្លានពានជាមុន​​របស់កងទ័ពថៃ ជុំវិញភាពតានតឹងព្រំដែនរាប់ខែមកហើយ។ ៥ ថ្ងៃក្រោយមក បន្ទាប់ពីជម្លោះបានឆក់យកជីវិតមនុស្សជាង ៤០ នាក់ និងបង្កការភៀសខ្លួនប្រជាជនជាង ៣០០ ០០០ នាក់ ទាំងសងខាង ភាគីទាំង២ ក៏បាន​ព្រមព្រៀងលើបទឈប់បាញ់ ដោយមានការសម្របសម្រួលពីលោក ត្រាំ និងនាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម។

បន្ទាប់មក​នៅខែសីហា ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានផ្ញើលិខិតជាផ្លូវការមួយច្បាប់ទៅគណៈកម្មការពានរង្វាន់ណូបែលសន្តិភាព គាំទ្របេក្ខភាពរបស់រលោក ត្រាំ ដើម្បីទទួលបានពានរង្វាន់ «ណូបែលសន្តិភាព»។ ក្រៅពីកម្ពុជា មានតែប៉ាគីស្ថាន និងអ៊ីស្រាអែល ប៉ុណ្ណោះ ដែលបាន​ធ្វើដូច្នេះ។

ជម្លោះដែលលោកបាន​លើកយកមកបង្ហាញកាលពីថ្ងៃសៅរ៍ រួមមាន កូសូវ៉ូ-ស៊ែប៊ី អាហ្ស៊ីប-អាត្យូពី និងអ៊ីស្រាអែល-អ៊ីរ៉ង់ជាដើម៕