ព័ត៌មានជាតិ

គម្រោងអភិវឌ្ឍហេដ្ឋារចនាសម្ព័ន្ធផ្លូវទឹក និងកំពង់ផែចំនួន ៤ ចាយទុនខ្ទង់ពាន់លានដុល្លារកំពុងដំណើរការសាងសង់

បានផុស

៨ ខែ មុន

នៅ

ថ្ងៃព្រហស្បតិ៍ ២៥ កញ្ញា ២០២៥

ដោយ

ក្រោមកិច្ចសហប្រតិបត្តិការជាមួយដៃគូអភិវឌ្ឍន៍ គម្រោងអភិវឌ្ឍហេដ្ឋារចនាសម្ព័ន្ធផ្លូវទឹក ផ្លូវសមុទ្រ កំពង់ផែចំនួន ៤ កំពុងអនុវត្តការសាងសង់។ នេះបើតាមក្រសួងសាធារណការនិងដឹកជញ្ជូន បង្ហាញពីសមិទ្ធផលសំខាន់ៗសម្រេចបានលើវិស័យសាធារណការនិងដឹកជញ្ជូនក្នុងរយៈពេល ២ ឆ្នាំ នៃរដ្ឋាភិបាលនីតិកាលទី ៧ ២០២៣-២០២៥)។ គម្រោងហេដ្ឋារចនាសម្ព័ន្ធផ្លូវទឹក រួមទាំងកំពង់ផែ ដែលចាយទុនសរុបខ្ទង់ពាន់លានដុល្លារដែលកំពុងដំណើរការសាងសង់រួមមាន៖

គម្រោងសាងសង់ព្រែកជីកហ្វូណនតេជោប្រវែង ១៨០ គីឡូម៉ែត្រ

ក្រោយបញ្ចប់ការបោះបង្គោលនិយាមកាសរុបចំនួន ១៩២៩ បង្គោល គម្រោងសាងសង់ព្រែកជីកហ្វូណនតេជោកំពុងឈានដល់ដំណាក់កាលក្នុងការដោះស្រាយផលប៉ះពាល់លើដំណើរការសាងសង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងព្រែកជីហ្វូណនតេជោត្រូវសាងសង់ឆ្លងកាត់ខេត្តកណ្ដាល ខេត្តតាកែវ ខេត្តកំពត និងខេត្តកែបប្រវែង ១៨០ គីឡូម៉ែត្រ គឺជាគម្រោងដែលចាយកញ្ចប់វិនិយោគដ៏ធំក្នុងការកែប្រែមុខមាត់កម្ពុជាលើវិស័យនាវាចរណ៍។ ចំណាយទុនប្រមាណ ១,៧ ពាន់លានដុល្លារអាមេរិក គ្រោងប្រើប្រាស់រយៈពេលសាងសង់ ៤ ឆ្នាំ គម្រោងអភិវឌ្ឍហេដ្ឋារចនាសម្ព័ន្ធផ្លូវទឹកដែលទាញផ្លូវដឹកជញ្ជូនពីសមុទ្រទៅទន្លេនេះ នឹងនាំអត្ថប្រយោជន៍ជាច្រើនមហាសាលដូចជា កាត់បន្ថយរយៈចម្ងាយធ្វើដំណើរ ជាពិសេសតម្លៃនៃការដឹកជញ្ជូន រួមទាំងជំរុញឲ្យមានការបង្កើតតំបន់ពាណិជ្ជកម្ម ការរីកចម្រើនផ្នែកអចលនទ្រព្យ និងបង្កើតការងារបន្ថែមរាប់ម៉ឺនកន្លែងដល់ពលរដ្ឋក្នុងមូលដ្ឋាន។

គម្រោងអភិវឌ្ឍកំពង់ផែទឹកជ្រៅក្រុងព្រះសីហនុ

ក្រោយប្រកាសបើកការដ្ឋានសាងសង់ប្រមាណ ២ ឆ្នាំ ដំណើរការសាងសង់កំពង់ផែទឹកជ្រៅជំហានទី ១ នៅកំពង់ផែស្វយ័តក្រុងព្រះសីហនុ សម្រេចបានប្រមាណ ៣០%។

កំពង់ផែទឹកជ្រៅជំហានទី ១ ប្រើប្រាស់រយៈពេលសាងសង់ចំនួន ៣៦ ខែ។ នៅពេលបញ្ចប់ដាក់ឲ្យដំណើរការនៅឆ្នាំ ២០២៦ នឹងពង្រីកសមត្ថភាពអាចឱ្យនាវាកុងតឺន័រដែលមានទម្ងន់ផ្ទុក ៦០.០០០ DWT (ឬស្មើនឹង ៤.០០០ TEUs) នៅក្នុងតំបន់អាស៊ីប៉ាស៊ីហ្វិក អាចដឹកជញ្ជូនទៅមកកំពង់ផែស្វយ័តក្រុងព្រះសីហនុ។

បន្ទាប់ពីបញ្ចប់ជំហានទី ១ រាជរដ្ឋាភិបាលគ្រោងពង្រីកការសាងសង់ក្នុងជំហានទី២ និងទី ៣ បន្ថែមទៀត។ ជំហានទី ២ នឹងអាចអនុញ្ញាតឱ្យនាវាកុងតឺន័រមានចំណុះផ្ទុក ១២ ម៉ឺនតោន ឬស្មើនឹង ១ម៉ឺន TEUs មានផ្លូវដឹកជញ្ចូននៅក្នុងតំបន់ឥណ្ឌូប៉ាស៊ីហ្វិក ទៅមកកំពង់ផែស្វយ័តក្រុងព្រះសីហនុ ហើយនឹងបង្កើនសមត្ថភាពកំពង់ផែសរុបរហូតដល់ប្រមាណជាង ១,៨លាន TEUs ក្នុងមួយឆ្នាំ។

កម្ពុជាដាក់ផែនការប្រែក្លាយកំពង់ផែក្រុងព្រះសីហនុឱ្យទៅជាកំពង់ផែអន្តរជាតិខ្នាតធំ (Hub Port) ក្នុងតំបន់ តាមរយៈការអភិវឌ្ឍទាំង ៣ ជំហានជាបន្តបន្ទាប់ ដោយចាយកញ្ចប់ទឹកប្រាក់សរុបប្រមាណ ៩៧៣ លានដុល្លារអាមេរិក។

តាមការសិក្សាគម្រោងសាងសង់ចំណតផែកុងតឺន័រថ្មីទាំង ៣ ជំហាន នឹងប្រែក្លាយសមត្ថភាពកំពង់ផែស្វយ័តក្រុងព្រះសីហនុ ដែលបច្ចុប្បន្នជាកំពង់ផែអន្តរជាតិខ្នាតតូចឱ្យទៅជាកំពង់ផែអន្តរជាតិខ្នាតធំ ប្រកបដោយភាពប្រកួតប្រជែង ដែលអនុញ្ញាតឱ្យនាវាកុងតឺន័រធុនធំពីគ្រប់តំបន់នៅក្នុងពិភពលោក អាចចូលចតបានដោយងាយស្រួល និងឆាប់រហ័ស ដោយពុំមានឧបសគ្គលើជម្រៅទឹកទៀតឡើយ។

ក្នុងគម្រោងអភិវឌ្ឍហេដ្ឋារចនាសម្ព័ន្ធផ្លូវទឹក និងកំពង់ផែ ក្រោមកិច្ចសហប្រតិបត្តិការជាមួយដៃគូអភិវឌ្ឍន៍ គម្រោងហេដ្ឋារចនាសម្ព័ន្ធផ្លូវទឹកចំនួនពីរទៀតក៏កំពុងអនុវត្តការសាងសង់ក្នុងនោះ មានគម្រោងជីកស្តារផ្លូវនាវាចរណ៍ប្រវែង ៣ ៩៥៥ ម៉ែត្រស្ថិតក្នុងឃុំជ្រោយប្រស់ស្រុកកោះកុងខេត្តកោះកុង និងគម្រោងស្តារផ្លូវនាវាចរណ៍តាឯកប្រវែង ១ ០០០ ម៉ែត្រស្ថិតក្នុងឃុំតាឯកស្រុកខ្សាច់កណ្ដាល ខេត្តកណ្ដាល៕