ប្រាសាទកោះកេរ អាចចុះបញ្ជីបេតិក​ភណ្ឌពិភពលោក តាមកាលកំណត់ ក្នុងឆ្នាំនេះ ឬទេ?

កម្ពុជាបានដាក់ឯកសារស្នើសុំចុះបញ្ជី​ប្រាសាទកោះកេរ ទៅកាន់គណៈកម្មការបេតិកភណ្ឌពិភពលោកកាលពីដើមឆ្នាំ២០២១ ចំណែកខាងគណៈកម្មការបេតិកភណ្ឌពិភពលោក បានទទួលឯកសារ និងបានបញ្ជូនអ្នកជំនាញមកពិនិត្យ និងវាយតម្លៃរួចហើយ កាលពីឆ្នាំ២០២១កន្លងទៅ។ តាមកាលកំណត់ លទ្ធផលអាចដឹងនៅក្នុងកិច្ចប្រជុំសម្រេចរបស់ គណៈកម្មការបេតិកភណ្ឌពិភពលោក នៅកំឡុងខែមិថុនា ឬ ខែកក្កដា ឆ្នាំ២០២២ នេះ។

លោក គង់ ពុទ្ធិការ អគ្គនាយកអាជ្ញាធរជាតិព្រះវិហារ មានប្រសាសន៍ប្រាប់ “កម្ពុជាថ្មី” ថា គណៈកម្មការបេតិកភណ្ឌពិភពលោក នៅឆ្នាំមុន បានអនុញ្ញាត រុស្ស៊ី ធ្វើជាម្ចាស់ផ្ទះ ហើយដោយសារស្ថានភាពសង្គ្រាម រុស្ស៊ី និងអ៊ុយក្រែន មិនទាន់ប្រែប្រួល ឬមិនទាន់មានសញ្ញាបញ្ចប់ ចំណែកខាងគណៈកម្មការបេតិកភណ្ឌពិភពលោក ក៏មិនទាន់មានចំណាត់ការណ៍អ្វីដែរ។

លោក គង់ ពុទ្ធិការ មានប្រសាសន៍បន្តថា៖ “អាជ្ញាធរព្រះវិហារ កំពុងរង់ចាំមើល តើកិច្ចការនេះនឹងសម្រេចយ៉ាងណា អាស្រ័យលើកកិច្ចប្រជុំ [គណៈកម្មការបេតិកភណ្ឌពិភពលោក]។ ទាល់តែកិច្ចប្រជុំដំណើរការ ទើបយើងអាចយករបៀបវារៈ នៃការស្នើសុំចុះបញ្ជីប្រាសាទកោះកេរចូលបញ្ជីបេតិកភណ្ឌពិភពលោក ដាក់សម្រេចក្នុងកិច្ចប្រជុំហ្នឹង”។

អគ្គនាយកអាជ្ញាធរជាតិព្រះវិហារ បញ្ជាក់ថា ប្រសិនស្ថានភាពសង្គ្រាម រុស្សី និង អ៊ុយក្រែន នៅតែបន្ត ហើយកិច្ចប្រជុំ នៅតែបន្តរង់ចាំ ឬត្រូវប្ដូរប្រទេសម្ចាស់ផ្ទះយ៉ាងណាណោះ គឺអាស្រ័យ គណៈកម្មការបេតិកភណ្ឌពិភពលោក និងអង្គការយូនីស្កូ សិក្សា និងពិភាក្សា។ ប្រទេសសមាជិក រង់ចាំលទ្ធផលសម្រេច។

លោក គង់ ពុទ្ធិការ បានឱ្យដឹងថា ការសម្រេច ដាក់បញ្ចូលអ្វីមួយ ចុះបញ្ជីបេតិកភណ្ឌពិភពលោក របស់ គណៈកម្មការបេតិកភណ្ឌពិភពលោក មាន ៣ កម្រិត៖ ទី១ កម្រិតអាក្រក់បំផុត គឺសម្រេចមិនឱ្យចុះបញ្ជីតែម្ដង។ កម្រិតទី២ សម្រេចឱ្យកែសម្រួលឯកសារបន្តិចបន្តួចណាមួយតាមការណែនាំរបស់គណៈកម្មការ និងអ្នកជំនាញ ហើយផ្ញើទៅវិញ រង់ចាំការសម្រេចម្ដងទៀត និងទី៣ បើបេតិកភណ្ឌដែលស្នើទៅនោះគ្រប់លក្ខខណ្ឌហើយ គឺគណៈកម្មការសម្រេចចុះបញ្ចូលក្នុងបញ្ជីបេតិកភណ្ឌពិភពលោកតែម្ដង។

គួរបញ្ជាក់ថា ប្រាសាទកោះកេរមានទីតាំងស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ មានចម្ងាយប្រមាណ ៨០ គីឡូម៉ែត្រ ពីទីរួមខេត្តព្រះវិហារ។

កាលពីឆ្នាំ ២០១៨ កម្ពុជាបានចុះសិក្សាស្រាវជ្រាវនៅតំបន់ប្រាសាទកោះកេរ ខេត្តព្រះវិហារ និងប្រាសាទបន្ទាយឆ្មារ ខេត្តបន្ទាយមានជ័យ ដើម្បីស្នើដាក់ប្រាសាទខ្មែរទាំងពីរនេះទៅក្នុងបញ្ជីសម្បត្តិបេតិកភណ្ឌពិភពលោក បន្ទាប់ពីប្រាសាទអង្គរវត្តបានចុះបញ្ជីជាសម្បត្តិបេតិកភណ្ឌពិភពលោកនៅឆ្នាំ ១៩៩២ ប្រាសាទព្រះវិហារនៅឆ្នាំ ២០០៨ និងតំបន់ប្រាសាទសំបូរព្រៃគុកនៅឆ្នាំ ២០១៧។

ទីតាំងប្រជុំប្រាសាទកោះកេរនេះ គឺជាអតីតរាជធានី “ឆោកគគ៌្យរ” របស់ព្រះបាទជ័យវរ្ម័នទី ៤ ដែលត្រូវបានកសាងឡើងក្នុងសតវត្សទី ១០ (៩២៨-៩៤២)។ ព្រះអង្គបានផ្លាស់ប្តូររាជធានីពីក្រុងយសោធរបុរៈ (ក្រុងអង្គរ) ទៅកាន់តំបន់កោះកេរនេះ ក្រោយពេលដណ្ដើមរាជបល្ល័ង្កពីក្មួយរបស់ព្រះអង្គ គឺព្រះបាទយសោវរ្ម័នទី ២ ដែលសោយរាជ្យនៅក្រុងអង្គរ។ ប្រាសាទនេះកសាងឡើងតាមរចនាប័ទ្មកោះកេរ ដែលមានរាងស្រដៀងនឹងពីរ៉ាមីត៕

អត្ថបទ៖ ច័ន្ទ វីរៈ