ក្រសួងវប្បធម៌ ផ្សព្វផ្សាយ ការស្រាវជ្រាវគម្រោង “ផ្ទះខ្មែរ” នៅតំបន់ប្រាសាទបាសែត

ថ្មីៗនេះ លោក ប្រាក់ សុណ្ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈ បានអញ្ជើញចូលរួមជាគណៈអធិបតីក្នុងកម្មវិធីផ្សព្វផ្សាយ លទ្ធផលកំណាយស្រាវជ្រាវគម្រោងផ្ទះខ្មែរ នៅតំបន់ប្រាសាទបាសែត ខេត្តបាត់ដំបង។

កម្មវិធីនេះ សហការរៀបចំ ដោយក្រសួងវប្បធម៌ និងវិចិត្រសិល្បៈ សាកលវិទ្យាល័យហាវ៉ៃ និងសាកលវិទ្យាល័យអូរីហ្គិន ដោយមានការចូលរួមពី លោកស្រីបណ្ឌិត អាលីសាន់ ខាតធើ សហប្រធានគម្រោង ព្រះចៅអធិការវត្តប្រាសាទបាសែត លោកប្រធានវិទ្យាស្ថានមនុស្សសាស្រ្ត នៃរាជបណ្ឌិត្យសភាកម្ពុជា ប្រធានមន្ទីរវប្បធម៌ និងវិចិត្រសិល្បៈ មន្រ្តីជំនាញ នៃក្រសួងវប្បធម៌ និងវិចិត្រសិល្បៈ អាជ្ញាធរពាក់ព័ន្ធ ប្រជាពលរដ្ឋ និស្សិត និងសិស្សានុសិស្ស ដែលរស់នៅជុំវិញតំបន់ប្រាសាទបាសែត សរុបចំនួន ១២៨នាក់។

កម្មវិធីនេះរៀបចំឡើងក្នុងគោលបំណងផ្សព្វផ្សាយនូវលទ្ធផលកំណាយស្រាវជ្រាវគម្រោង “ផ្ទះខ្មែរ” ចាប់តាំងពីឆ្នាំ២០១៨ រហូតដល់បច្ចុប្បន្ន ជូនទៅដល់អាជ្ញាធរដែនដី ប្រជាពលរដ្ឋ និស្សិត និងសិស្សានុសិស្ស ដែលរស់នៅជុំវិញតំបន់ប្រាសាទបាសែត ឱ្យបានយល់ដឹង និងឈ្វេងយល់នូវរបកគំហើញដែលក្រុមការងារជំនាញបានស្រាវជ្រាវរកឃើញ ដោយមានការដាក់តាំងបង្ហាញនូវវត្ថុសិល្បៈដែលបានរកឃើញពីកំណាយ និងទស្សនារណ្តៅកំណាយ។

ឆ្លៀតក្នុងឱកាសនោះ លោករដ្ឋលេខាធិការ បានមានមតិសំណេះសំណាល និងណែនាំដល់អាជ្ញាធរពាក់ព័ន្ធ ប្រជាពលរដ្ឋ និស្សិត និងសិស្សានុសិស្ស ឱ្យយល់កាន់តែច្បាស់នូវគុណតម្លៃនៃការងារស្រាវជ្រាវ ជាពិសេសគុណតម្លៃ នៃបេតិកភណ្ឌវប្បធម៌ជាតិ សម្រាប់ប្រជាជាតិទាំងមូល និងប្រជាពលរដ្ឋក្នុងតំបន់។ ហេតុនេះចាំបាច់ណាស់ត្រូវការប្រជាពលរដ្ឋគ្រប់រូប ចូលរួមជួយថែរក្សាបេតិកភណ្ឌដែលមានក្នុងតំបន់របស់ខ្លួនទៅតាមលទ្ធភាពរៀងៗខ្លួន។

គួរបញ្ជាក់ថា ការធ្វើកំណាយស្រាវជ្រាវបុរាណវិទ្យា ក្នុងឆ្នាំ២០២៣នេះ មានរយៈពេលជាង ៧សប្តាហ៍ ដោយចាប់ផ្តើមពីថ្ងៃទី១៥ ខែឧសភា រហូតដល់ថ្ងៃទី៦ ខែកក្កដា ឆ្នាំ២០២៣ ផ្តោតសំខាន់អំពីទួលបុរាណ ការរស់នៅរបស់មនុស្សនៅលើទួល សង្គម និងសកម្មភាពសេដ្ឋកិច្ចនាសម័យអតីតកាលជាដើម៕