សេដ្ឋកិច្ច

មន្ត្រី និងអ្នកជំនាញអះអាង សេដ្ឋកិច្ចកម្ពុជា នៅតែរក្សានូវភាពធន់ ទោះបីឆ្លងកាត់វិបត្តិច្រើន

បានផុស

២ ខែ មុន

នៅ

ថ្ងៃសៅរ៍ ១១ មេសា ២០២៦

ដោយ

ឧបនាយករដ្ឋមន្រ្តី សុខ ចិន្តាសោភា មានប្រសាសន៍ថា កម្ពុជានៅតែរក្សាបាននូវភាពធន់ទោះបីជាឆ្លងកាត់នូវវិបត្តិជាច្រើនលើក ខណៈសេដ្ឋកិច្ចនៅតែមានលំនឹង និងមានកំណើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧបនាយករដ្ឋមន្រ្តី បានប្រាប់សារព័ត៌មាន នៅថ្ងៃទី ០៩ ខែមេសា ២០២៦ថា មានវិបត្តិច្រើនណាស់ដែលបានកើតឡើងនៅឆ្នាំ ២០០៨ វិបត្តិហិរញ្ញវត្ថុ សេដ្ឋកិច្ចកម្ពុជាមិនស្រុតចុះនោះទេ។ នៅឆ្នាំ ២០២០ មានវិបត្តិកូវីដ១៩ ដែលមានការប៉ះពាល់ធ្ងន់ធ្ងរ ដល់វិស័យទេសចរ និងវិស័យមួយចំនួន ប៉ុន្តែសេដ្ឋកិច្ចកម្ពុជាមិនស្រុតចុះទេ។

លោកឧបនាយករដ្ឋមន្រ្តី បញ្ជាក់ថា ភាពធន់នៃសេដ្ឋកិច្ចកម្ពុជា មិនមែនចៃដន្យនោះទេ ពោលគឺបានមកពីការរៀបចំ និងការដឹកនាំរបស់រាជរដ្ឋាភិបាលមានការគិតគូវែងឆ្ងាយ ខណៈកម្ពុជាមានគ្រឹះរឹងមាំ ដោយបញ្ជាក់ថា គ្រឹះនៃសេដ្ឋកិច្ចកម្ពុជា សំដៅដល់ផ្នែករឹង និងផ្នែកទន់ ដែលមានវិស័យអប់រំ វិស័យសុខាភិបាលជាដើម។

លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជា យល់ឃើញថា កម្ពុជារងសម្ពាធពីសង្គ្រាមដូចជា សង្គ្រាមរុស្ស៊ី-អ៊ុយក្រែន និងសង្គ្រាមមជ្ឈិមបូព៌ា និងការដាក់ពន្ធបដិការរបស់អាមេរិក។

លោកបណ្ឌិត ហុង វណ្ណៈ បន្ថែមថា៖ «កម្មវិបាកទាំងអស់ហ្នឹង បានជះឥទ្ធិពលដល់ដំណើរការអភិវឌ្ឍសេដ្ឋកិច្ចកម្ពុជា ជាពិសេសទៅលើវិស័យដឹកដឹកជញ្ជូន ទៅលើថ្លៃដឹកជញ្ជូន ទៅលើទំនុកចិត្តរបស់អ្នកវិនិយោគ និងដំណើរកម្សានរបស់ទេសចរអន្តរជាតិ ដែលបញ្ហាទាំងអស់ហ្នឹងធ្វើឱ្យមានការសម្រេចចិត្តមិនច្បាស់លាស់នៃប្រភេទវិនិយោគិន ទេសចរបរទេស និងការវិនិយោគផ្សេងៗ»។

លោកបណ្ឌិត ហុង វណ្ណៈ បន្តថា បញ្ហាទាំងអស់នោះ មិនមែនមានតែកម្ពុជានោះទេ ខណៈផលប៉ះពាល់ដល់កម្ពុជាលឿនជាងប្រទេសដែលមានអំណាចទិញធំ។

លោកបណ្ឌិត ហុង វណ្ណៈ បញ្ជាក់ថា៖ «សេដ្ឋកិច្ចកម្ពុជាមានដំណើរការជាប្រក្រតី មិនមានព័ត៌មានណាដែលបង្ហាញថា យើងមិនមានព័ត៌មានណាមួយដែលបង្ហាញថា កម្ពុជាយើងមានការថមថយគួរឱ្យកត់សម្គាល់ទៅលើវិស័យសំខាន់ជាច្រើន»។

ធនាគារអភិវឌ្ឍន៍អាស៊ី (ADB) បានព្យាករថា សេដ្ឋកិច្ចកម្ពុជានឹងកើន ៤,៥% នៅក្នុងឆ្នាំ ២០២៦ ប្រសិនបើការរំខានដល់ទីផ្សារទំនិញសកល ដែលបង្កឡើងដោយជម្លោះនៅមជ្ឈិមបូព៌ា មិនត្រូវបានអូសបន្លាយយូរ។

របាយការណ៍ទស្សនវិស័យអភិវឌ្ឍន៍អាស៊ី (ADO) ខែមេសា ឆ្នាំ២០២៦ ព្យាករថា វិស័យកម្មន្តសាល នឹងនៅតែជាក្បាលម៉ាស៊ីនកំណើនសំខាន់របស់សេដ្ឋកិច្ច សម្រាប់ឆ្នាំ២០២៦ ខណៈដែលទិន្នផលឧស្សាហកម្មត្រូវបានរំពឹងថា នឹងកើនឡើង ៧,៣% ដោយសារការបញ្ជាទិញសម្លៀកបំពាក់ច្រើនគួរសម និងកំណើននៃការរួមចំណែកពីវិស័យកម្មន្តសាលក្រៅពីវាយនភណ្ឌ ដែលរួមមានគ្រឿងបង្គំអគ្គិសនី សំបកកង់ និងគ្រឿងសង្ហារឹម៕