ព័ត៌មានជាតិ

នាយករដ្ឋមន្ត្រីថាភាពធន់របស់ជាតិធ្វើឱ្យប្រទេសរក្សាអត្រាកំណើនសេដ្ឋកិច្ចខ្ពស់នៅឆ្នាំនេះបន្តទៀត

បានផុស

១ ខែ មុន

នៅ

ថ្ងៃអង្គារ ២៨ មេសា ២០២៦

ដោយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថាទោះបីជាត្រូវប្រឈមនឹងការលំបាកឧបសគ្គ ទាំងកត្តាខាងក្នុង និងខាងក្រៅក្ដី តែកម្ពុជានៅតែបន្តបោះជំហានទៅមុខយ៉ាងស្វាហាប់គួរជាទីមោទនៈ ដែលបានមកពីកម្លាំងមហាសាមគ្គីប្រជាជាតិខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងសារលិខិតអបអរខួប១៤០ នៃទិវាពលកម្មអន្តរជាតិ១ឧសភា ចុះហត្ថលេខាកាលពីថ្ងៃ២៣ ខែមេសា ឆ្នាំ២០២៦ សម្ដេចធិបតី ហ៊ុន ម៉ាណែត ឱ្យដឹងថាតាមការវាយតម្លៃ កម្ពុជានៅតែបន្តរក្សាបានកំណើនសេដ្ឋកិច្ចក្នុងឆ្នាំ២០២៦នេះ ដែលបានឆ្លុះបញ្ចាំងពីភាពធន់នៃសេដ្ឋកិច្ចជាតិក្នុងបរិការណ៍នៃការវិវឌ្ឍស្មុគស្មាញនៃសេដ្ឋកិច្ច និងនយោបាយទាំងក្នុងតំបន់ និងសកលលោក។

សម្ដេចបានបញ្ជាក់បន្ថែមទៀតថា រដ្ឋាភិបាលបានខិតខំប្រឹងប្រែងក្នុងការធ្វើឱ្យប្រសើរឡើងនូវបរិយាកាសធុរកិច្ច និងវិនិយោគ ដោយបានជំរុញឱ្យមានលំហូរវិនិយោគផ្ទាល់ពីបរទេស បន្តកើនឡើង ខណៈបានយកចិត្តទុកដាក់ដល់ការលើកកម្ពស់ជីវភាពរបស់កម្មករនិយោជិកទោះបីជាក្នុងស្ថានភាពសេដ្ឋកិច្ចសកលពោរពេញដោយភាពមិនប្រាកដប្រជា និងរងសម្ពាធក្ដី។

សម្ដេចសរសេរថា៖ «បើទោះបីជាត្រូវប្រឈមនឹងការលំបាកនិងឧបសគ្គ ទាំងកត្តាខាងក្នុងនិងកត្តាខាងក្រៅយ៉ាងណាក្ដី តាមរយៈកម្លាំងមហាសាមគ្គីប្រជាជាតិដ៏រឹងមាំ កម្ពុជាបាននិងកំពុងបន្តបោះជំហានទៅមុនយ៉ាងស្វាហាប់គួរជាទីមោទនៈលើមាគ៌ានៃសន្តិភាព ស្ថិរភាពនយោបាយ សន្តិសុខ សណ្ដាប់ធ្នាប់សង្គម ប្រជាធិបតេយ្យ នីតិរដ្ឋ និងស្ថិរភាពម៉ាក្រូសេដ្ឋកិច្ច ដែលជាមនុញ្ញផលអនុគ្រោះដល់ការអភិវឌ្ឍសេដ្ឋកិច្ច សង្គម និងរក្សាលំនឹងនៃជីវភាពរបស់ប្រជាពលរដ្ឋ និងបងប្អូនកម្មករនិយោជិក»។

បើតាមសម្ដេចធិបតីគិតត្រឹមឆមាសទី១ ឆ្នាំ២០២៦ កម្ពុជាមានរោងចក្រ សហគ្រាស ក្រុមហ៊ុន ដំណើរការចំនួន ៤៧ ០២៩សហគ្រាស ដែលផ្ដល់ការងារដល់កម្មករនិយោជិកបានប្រមាណ ២,៣លាននាក់ ជាមួយអត្រាប្រាក់ចំណូលជាក់ស្ដែងទាប់បំផុតចន្លោះពី ២២៩,៥ ដល់២៤០,៥ដុល្លារអាមេរិកក្នុងមួយខែ។

របាយការណ៍របស់ធនាគារពិភពលោកនេះក៏បានទស្សន៍ទាយពីកំណើនសេដ្ឋកិច្ចកម្ពុជាក្នុងឆ្នាំ២០២៦ដែលមានកំណើន ៣.៩ ខណៈឆ្នាំ២០២៧ មានកំណើត៤.៩ ភាគរយ ដែលកំណើននេះត្រូវបានប៉ាន់ស្មានដោយសារងើបឡើងវិញនៃវិស័យទេសចរណ៍ និងភាពរឹងមាំនៃការនាំចេញផលិតផលឧស្សាហកម្មរបស់ប្រទេស។ ធនាគារនេះក៏បានកត់សម្គាល់ផងដែរថា នៅ២០ឆ្នាំចុងក្រោយក្នុងតំបន់អាស៊ីខាងកើត និងប៉ាស៊ីហ្វិក មានតែកម្ពុជា និងវៀតណាមប៉ុណ្ណោះដែលមានការកើនឡើងនៃចំណែកវិស័យឧស្សាហកម្មទៅក្នុង GDP របស់ប្រទេស៕

អត្ថបទដោយ ហ៊ុន សិរីវឌ្ឍន៍

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា