ព័ត៌មានអន្ដរជាតិ

វៀតណាមស្នើឱ្យអាមេរិកបើកផ្លូវកប៉ាល់ដឹកប្រេងរបស់ខ្លួននៅច្រកហ័រមូហ្ស

បានផុស

២ ខែ មុន

នៅ

ថ្ងៃពុធ ១៣ ឧសភា ២០២៦

ដោយ

ក្រុមហ៊ុនប្រេងរបស់រដ្ឋវៀតណាម PVOIL បានស្នើទៅកងទ័ពជើងទឹកអាមេរិក ឱ្យបើកផ្លូវកប៉ាល់ដឹកប្រេងរបស់ខ្លួនមួយគ្រឿងនៅច្រកសមុទ្រហ័រមូហ្ស ដើម្បីដឹកប្រេងឆៅពីអ៊ីរ៉ាក់ ទៅផ្គត់ផ្គង់រោងចក្រចម្រាញ់ប្រេង Nghi Son នៅវៀតណាម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កប៉ាល់ Agio Fanourios I ដែលផ្ទុកប្រេងប្រមាណ ២ លានបារែល បានឆ្លងច្រកហ័រមូហ្ស កាលពីថ្ងៃទី ១០ ឧសភា ប៉ុន្តែបានបត់ត្រឡប់ក្រោយវិញ បន្ទាប់ពីកងទ័ពអាមេរិកបញ្ជាឱ្យផ្លាស់ប្តូរទិសដៅ។

សហរដ្ឋអាមេរិកបានពង្រីកវិធានការបិទខ្ទប់ការដឹកជញ្ជូនចេញចូលកំពង់ផែអ៊ីរ៉ង់ ដោយរាប់បញ្ចូលទាំងទំនិញដែលខ្លួនចាត់ទុកថាខុសច្បាប់ ប៉ុន្តែបានបញ្ជាក់ថា ការនាំចេញប្រេងពីប្រទេសផ្សេងៗក្នុងតំបន់ឈូងសមុទ្រពែរ្ស នៅតែអាចធ្វើដំណើរឆ្លងកាត់បាន។

បញ្ជាការកណ្តាលយោធាសហរដ្ឋអាមេរិកបានប្រាប់រ៉យទ័រថា៖ «កងកម្លាំងសហរដ្ឋអាមេរិកបានបង្វែរទិសដៅនាវានេះ(Agio Fanourios I) ដើម្បីជាផ្នែកមួយនៃការអនុវត្តការបិទផ្លូវប្រឆាំងនឹងអ៊ីរ៉ង់»។

មកទល់ពេលនេះ គឺមានទាន់ដឹងថាអាមេរិកនឹងបើកផ្លូវឱ្យកប៉ាល់ដឹកប្រេងដដែល តាមការអនុញ្ញាតរបស់វៀតណាមដែរឬយ៉ាងណា។ បើតាមសារព័ត៌មានអ៊ីរ៉ង់ Agio Fanourios I បានធ្វើដំណើរឆ្លងកាត់ច្រកសមុទ្រហ័រមូហ្ស កាលពីថ្ងៃអាទិត្យដោយប្រើប្រាស់ផ្លូវកំណត់របស់អ៊ីរ៉ង់សម្រាប់នាវាដឹកប្រេងអន្តរជាតិ។

អនុប្រធានក្រុមហ៊ុន PVOIL លោក Hoang Dinh Tung បាននិយាយថា ប្រេងក្នុងកប៉ាល់ដដែល «មានសារៈសំខាន់ខ្លាំងណាស់» សម្រាប់រោងចក្រ Nghi Son និងប្រជាជនវៀតណាម ព្រោះស្តុកប្រេងនៅរោងចក្រនេះកំពុងជិតអស់ហើយ ហើយការពន្យារពេលបន្ថែម អាចប៉ះពាល់ដល់អាជីវកម្ម សេវាសាធារណៈ និងប្រជាពលរដ្ឋរាប់លាននាក់។

PVOIL ក៏បានបញ្ជាក់ថា ប្រេងក្នុងកប៉ាល់ Agio Fanourios I ជាប្រេង Basra របស់អ៊ីរ៉ាក់ ដែលទិញពីក្រុមហ៊ុនរដ្ឋ SOMO មិនមែនជាប្រេងអ៊ីរ៉ង់ទេ៕