ឃើញប្រេងសាំងឡើងថ្លៃកុំឆ្ងល់! នេះជាមូលហេតុ

តម្លៃប្រេងសាំងពិភពលោក បានឡើងដល់កម្រិតខ្ពស់បំផុត មិនធ្លាប់មានសោះក្នុងរយៈពេលប៉ុន្មានឆ្នាំចុងក្រោយនេះ ដោយសារតែតម្រូវការមានការហក់ឡើងវិញ នៅពេលវិធានការទប់ស្កាត់ជំងឺរាតត្បាតកូវីដ-១៩ត្រូវបន្ធូរបន្ថយ ដែលជាហេតុជំរុញឲ្យឧបករណ៍ផលិតថាមពល ងាកចេញពីការប្រើប្រាស់ហ្គាសនិងធ្យូងថ្មថ្លៃៗ ទៅប្រើប្រេងឥន្ធនៈនិងប្រេងម៉ាស៊ូតវិញ។

ប្រេងឆៅម៉ាក Brent បានកើនឡើង ៨៧សេនឬ ១ភាគរយ ពោលគឺស្មើនឹង ៨៥.៧៣ដុល្លារក្នុងមួយបារ៉ែល ដែលនេះជាតម្លៃខ្ពស់បំផុតចាប់តាំងពីខែតុលាឆ្នាំ២០១៨មក។

ចំណែកប្រេងឆៅម៉ាក U.S. West Texas Intermediate (WTI) បានឡើងថ្លៃ ១.១២ដុល្លារឬ ១,៤% ដល់ ៨៣.៤០ ដុល្លារក្នុងមួយបារ៉ែល ដែលជាកម្រិតខ្ពស់បំផុតគិតចាប់ពីខែតុលាឆ្នាំ ២០១៤មក។

កិច្ចសន្យាទាំងពីរ បានកើនឡើងយ៉ាងហោចណាស់ ៣ភាគរយ កាលពីសប្តាហ៍មុន។

អ្នកវិភាគមកពីធនាគារ ANZ បាននិយាយនៅក្នុងកំណត់សម្គាល់មួយនៅថ្ងៃចន្ទទី១៨ខែតុលានេះថា “ការបន្ធូរបន្ថយ ការរឹតត្បិតនៅជុំវិញពិភពលោក ទំនងជាជួយដល់ការស្ទុះងើបឡើងវិញនៃការប្រើប្រាស់ប្រេងឥន្ធនៈ”។

ទីផ្សារប្រេងឥន្ធនៈកើនឡើងយ៉ាងខ្លាំងនេះ ត្រូវបានជំរុញដោយព័ត៌មានថា សហរដ្ឋអាមេរិកនឹងបើកព្រំដែនរបស់ខ្លួនចំពោះអ្នកទេសចរបរទេសដែលចាក់វ៉ាក់សាំងរួច នៅខែក្រោយ។

ពួកគេបានបន្ថែមថា ការផ្លាស់ប្តូរពីហ្គាសទៅប្រើប្រេងសម្រាប់ផលិតថាមពល អាចបង្កើនតម្រូវការរហូតដល់ ៤៥០,០០០ បារ៉ែលក្នុងមួយថ្ងៃ នៅត្រីមាសទី៤។

ទោះបីជាយ៉ាងណាក៏ដោយ ការផ្គត់ផ្គង់ក៏អាចកើនឡើងពីសហរដ្ឋអាមេរិកផងដែរ ដែលនៅទីនោះ កាលពីសប្តាហ៍មុនក្រុមហ៊ុនថាមពល បានបន្ថែមស្ថានីយ៍ចម្រាញ់ប្រេងនិងហ្គាសធម្មជាតិរយៈពេល៦សប្តាហ៍ជាប់ៗគ្នា៕

ប្រែសម្រួល៖ Vann Vann

ប្រភព៖ Reuters 

ចុចអាន៖ ADB អនុម័តប្រាក់កម្ចី ៤០លានដុល្លារ គាំទ្រកិច្ចប្រឹងប្រែងរបស់កម្ពុជា អភិវឌ្ឍវិស័យហិរញ្ញវត្ថុ