OPEC+ សម្រេចបង្កើនកូតាផលិតកម្មប្រេងនៅខែកក្កដា ចំពេលវិបត្តិថាមពលសកលបន្ត

សមាជិកស្នូលចំនួន ៧ របស់​អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) បានព្រមព្រៀងគ្នាកាលពីថ្ងៃអាទិត្យ ដើម្បីបង្កើន​កូតាផលិតកម្មប្រេងបន្ថែម ១៨៨ ០០០ បារ៉ែល/ថ្ងៃ នៅខែកក្កដា ដែលជាការបង្កើន៤ខែជាប់ៗគ្នា ខណៈទីផ្សារប្រេងសកលនៅតែប្រឈមមុខនឹងវិបត្តិដោយ​សារ​តែ​ការបិទច្រកសមុទ្រហ័រមូហ្ស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

​

ប្រទេសធំៗចំនួន៧ រួមមានអារ៉ាប៊ីសាអ៊ូឌីត រុស្ស៊ី អ៊ីរ៉ាក់ គុយវ៉ែត កាហ្សាក់ស្ថាន អាល់ហ្សេរីយ៉ា និងអូម៉ង់ បាននិយាយក្នុងសេចក្ដីថ្លែងការណ៍ថា ការសម្រេចចិត្តបង្កើនកូតា បង្ហាញពីការប្ដេជ្ញាចិត្តរបស់ពួកគេដើម្បីធ្វើឱ្យទីផ្សារប្រេងមានស្ថេរភាព។ ប្លុកដដែលនឹងជួបគ្នាលើកក្រោយនៅដើមខែកក្កដា ដើម្បីពិភាគ្សាអំពីកម្រិតផលិតកម្មនៅខែសីហា។ ​

តាមការចុះផ្សាយរបស់បណ្ដាញព័ត៌មាន​ ​​CNBC តួលេខប្រចាំខែកក្កដា គឺមានទំហំដូចគ្នានឹងការដំឡើងកូតា​នៅខែមិថុនា ដែល​ត្រូវបាន​បន្ទាបពី​ ២០៦ ០០០ បារ៉ែល/ថ្ងៃ នៅក្នុងខែមេសា និងឧសភា ដើម្បីកែ​សម្រួលតាមការចាកចេញពីប្លុក OPEC របស់អារ៉ាប់រួម។​

ទោះបីជាយ៉ាងណាក៏ដោយ អ្នកជំនាញមើលឃើញថា ការសម្រេចដំឡើងកូតាផលិតកម្មរបស់ OPEC+ មិនជះឥទ្ធិពលអ្វីធំដុំដល់ទីផ្សារប្រេងសកល ដែលកំពុងជួបវិបត្តិ​នោះទេ ពីព្រោះប្រទេសផលិតប្រេងធំៗនៅតំបន់ឈូងសមុទ្រពែរ្សមិនអាចបង្កើនផលិតកម្មតាមកូតា ដោយសារតែការបិទច្រកហ័រមូហ្សដែល​ប៉ះពាល់ដល់ការនាំចេញរបស់ពួកគេ។

ទិន្នន័យរបស់ OPEC បាន​បង្ហាញថា ​ផលិតប្រេងរបស់ប្លុកបានធ្លាក់ចុះពី ៤២,៧៧ លានបារ៉ែល/ថ្ងៃ នៅ​ខែកុម្ភៈ មកត្រឹម ៣៣,១៩ លានបារ៉ែល/ថ្ងៃ ក្នុងខែមេសា ដោយសារតែជម្លោះអ៊ីស្រាអែល សហរដ្ឋអាមេរិក និងអ៊ីរ៉ង់៕