តម្លៃប្រេងអន្តរជាតិស្ទុះងើបជាង ២ ដុល្លារ ព្រឹកនេះ ក្រោយអ៊ីស្រាអែលបើកការវាយប្រហារថ្មីលើលីបង់

តម្លៃប្រេងអន្តរជាតិ​ បាន​ស្ទុះងើបឡើងវិញ​ជាង ២ ដុល្លារ​ សម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទនេះ​ បន្ទាប់ពីអ៊ីស្រាអែលបានបើកការវាយប្រហារថ្មី​លើ​លីបង់កាលពីថ្ងៃអាទិត្យ ទោះបីជាប្រទេសទាំង២​មានបទឈប់បាញ់​ក៏ដោយ ដែលការណ៍នេះប៉ះពាល់ដល់ក្ដីរំពឹងពីការបញ្ចប់សង្រ្គាមមជ្ឈិមបូព៌ា ហើយឈានទៅដល់ការបើកច្រកហ័រមូហ្ស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

​

​តម្លៃប្រេងម៉ាក Brent បានកើនឡើង ២,៣៣ ដុល្លារ ឬ ២,៥% ដល់ ៩៥,៤២ ដុល្លារ/បារ៉ែល គិតត្រឹមម៉ោងប្រហែល ៨ ព្រឹកនៅទីក្រុងហុងកុង ខណៈតម្លៃប្រេងអាមេរិក WTI ​បានកើនឡើង ២,១០ ដុល្លារ ឬ ២,៣២% ដល់ ៩២,៦៤ ដុល្លារ​/បារ៉ែល​។

ការកើនឡើងនៅថ្ងៃចន្ទនេះ បានប៉ះប៉ូវនូវការធ្លាក់ចុះកាលពីថ្ងៃសុក្រសប្ដាហ៍មុន ដែលកាលនោះតម្លៃប្រេងធ្លាក់ចុះដោយសារតែក្ដីរំពឹងពីភាពថមថយនៃជម្លោះអាមេរិក-អ៊ីរ៉ង់ ដែលផ្ទុះឡើងដោយសារតែការវាយប្រហាររបស់អ៊ីស្រាអែល និងសហរដ្ឋអាមេរិក នៅចុងខែកុម្ភៈ។ ​

ការវាយប្រហាររបស់អ៊ីស្រាអែលលើលីបង់ចុងក្រោយ​ បានបន្ថែមឧបសគ្គមួយទៀត​លើការចរចាឆ្ពោះទៅរក​កិច្ចព្រមព្រៀងសន្តិភាព​អាមេរិក-អ៊ីរ៉ង់ និងការបើកឡើងវិញនៃច្រកសមុទ្រហ័រមូហ្ស​ ដែលច្រកដឹកប្រេងដ៏សំខាន់បំផុតមួយរបស់ពិភព​លោក។

ចំពេលដែលវិបត្តិប្រេងនៅតែបន្ត អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) កាលពីថ្ងៃអាទិត្យ ​បាន​ព្រមគ្នាបង្កើនផលិតកម្មប្រេងជាលើកទី៤ក្នុងរយៈពេល ៤ ខែ។ ទោះជាយ៉ាងណាក៏ដោយ អ្នកវិភាគបាននិយាយថា ការ​បង្កើន​នេះនឹងមានឥទ្ធិពលតិចតួច ពីព្រោះសមាជិកជាច្រើនមិនអាចសម្រេចគោលដៅផលិត​របស់ពួកគេ ដោយសារតែការបិទច្រកសមុទ្រហ័រមូហ្ស ​ដែលនោះហើយធ្វើឱ្យតម្លៃប្រេងនៅតែប្រែប្រួលខ្លាំងទៅតាមស្ថានការណ៍នៃជម្លោះ៕