ចង់ដឹងម្នាស់ទឹកឃ្មុំស្ទឹងត្រែង​ផ្អែមឆ្ងាញ់ប៉ុណ្ណា ​ជិះ​កាត់​អូរពងមាន់​ អូរច្រឡង់ កុំភ្លេចភ្លក់រសជាតិ

បងប្អូនប្រជាពលរដ្ឋធ្វើដំណើរឆ្លងកាត់ខេត្តស្ទឹងត្រែង បើចង់ដឹងពីររសជាតិម្នាស់ទឹកឃ្មុំ មានរសជាតិផ្អែមឈ្ងុយឆ្ងាញ់ប៉ុណ្ណា សូមកុំភ្លេចភ្លក់រសជាតិ ដែលមានទីតាំងលក់នៅចំណុចគល់ស្ពានអូរច្រឡង់ និងចំណុចផ្លូវបំបែកអូរពងមាន់។

ភាពល្បីល្បាញនៃរស់ជាតិម្នាស់ទឹកឃ្មុំកំពុងពេញនិយមទៅលើអ្នកបរិភោគ បច្ចុប្បន្នកំពុងនឹងមានតម្រូវការខ្ពស់ នាំចេញទៅកាន់បណ្ដាខេត្តនានា និងទៅលើទីផ្សាររាជធានីភ្នំពេញផងដែរ។

លោក សាយ ពន្លឺចិត្តករុណាក ជានិស្សិតផ្នែកកសិកម្មរស់នៅភូមិអូរឫស្សីកណ្ដាលបានរៀបរាប់ថា ដំបូងឡើយគ្រួសាររបស់លោកចាប់ផ្ដើមដាំម្នាស់ត្រឹមតែ ២ទៅ ៣ហិកតាតែប៉ុណ្ណោះ។ ក្រោយបានពង្រីកការដាំដុះរហូតមកដល់ពេលបច្ចុប្បន្ននេះ មានផ្ទៃដីរហូត១០ហិកតាហើយ។

លោកបានបន្តឲ្យដឹងទៀតថា ពូជម្នាស់ទឹកឃ្មុំនេះ​ ដើមឡើយមានប្រភពដើមពីស្រុកចម្ការលើខេត្តកំពង់ចាម ពោលគឺ កាល​ពីជំនាន់សម្ដេចព្រះនរោត្ដមសីហនុមក​ម៉្លេះ។ ក្រោយមកក៏បានដាច់ពូជទៅវិញ ដោយសារការពិបាករកទិញទើបនាំចូល​ពូជពីប្រទេសឡាវមកវិញ។

លោកបន្តថា នៅក្នុងឆ្នាំ២០២១ ការប្រមូលផលលោកលក់បានចំនួន ៣ ម៉ឺនផ្លែ ហើយនៅក្នុងឆ្នាំ ២០២២នេះ ការប្រមូល​ផលផ្លែម្នាស់ទឹកឃ្មុំអាចនឹងប្រមូលផលបានដល់ទៅ ៨ ម៉ឺនផ្លែ អាចចាប់ផ្ដើមក្នុងអំឡុងដើមខែឧសភានេះ នឹងមានលក់នៅមុខចម្ការរបស់លោកចំណុចស្ពានអូរច្រឡង់ និងនៅផ្លូវបំបែកអូរពងមាន់ និងមួយចំនួន នាំទៅកាន់បណ្ដាខេត្តមួយនានានិងរាជធានីភ្នំពេញផងដែរ។

លោក សាយ ពន្លឺចិត្តករុណា បានបញ្ជាក់បន្ថែមថា ម្នាសទឹកឃ្មុំ ទោះជាទីផ្សារឡើងចុះយ៉ាងណាក៏ដោយ ក៏ម្នាស់១ផ្លែអាចលក់បានតម្លៃចាប់ពី ៥ ពាន់រៀលដែរ ហើយមុខរបរដាំម្នាស់នេះ ធ្វើឱ្យគ្រួសារលោកមានជីវភាពប្រសើរជាងមុន ប៉ុន្តែការដាំម្នាស់ក៏ជួបឧបសគ្គខ្លះៗផងដែរអាស្រ័យលើទីផ្សារឡើងចុះ។

លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តស្ទឹងត្រែង បានឱ្យដឹងថា ម្ចាស់ចម្ការជាកសិករគំរូ និងជាមន្ត្រីកសិកម្មផងដែរ។ បើ​តាម​លោកប្រធាន​មន្ទីរ ម្ចាស់ចម្ការក៏​មានមហិច្ចតាខ្ពស់ក្នុងការពង្រីកផ្ទៃដីដាំម្នាស់បន្ថែមទៀត ដែលត្រូវការកូនរាប់លានដើមឯណោះ។

លោក​ទុំ នីវ៉ូ បាន​ឲ្យ​ដឹង​ថា ឆ្នាំនេះខេត្តស្ទឹងត្រែង មានផ្ទៃដីដាំម្នាស់ជាង ១០០ហិកតា សម្រាប់លក់ឱ្យគ្រប់តាមតម្រូវការ​លើ​ទីផ្សារក្នុងស្រុក៕

អត្ថបទ៖ ងិនលីម