ព័ត៌មានជាតិ

រមណីយដ្ឋានកោះមាសសេសានមិនឆ្ងាយពីក្រុងស្ទឹងត្រែង មានទេសភាពស្អាតពីព្រឹកដល់ល្ងាច

បានផុស

៣ ខែ មុន

នៅ

ថ្ងៃចន្ទ ១៣ មេសា ២០២៦

ដោយ

រមណីយដ្ឋានកោះមាសសេសាន មានទីតាំងមិនឆ្ងាយពីទីរួមខេត្តស្ទឹងត្រែងពោលគឺមានចម្ងាយត្រឹមតែ ១៦ គីឡូម៉ែត្រ ដោយធ្វើដំណើរតាមផ្លូវកៅស៊ូ និងបន្តតាមមាត់ទន្លេ។

លោក សុវណ្ណ ពិសេត អភិបាលស្រុកសេសាន ខេត្តស្ទឹងត្រែង បានបង្ហាញពីសក្ដានុពលរមណីយដ្ឋានកោះមាសសេសានដែលមានឆ្នេរខ្សាច់ស្អាតៗ និងកោះតូចៗទំហំប្រហែល ២០ ទៅ ៤០ ម៉ែត្រការ៉េ អាចឲ្យភ្ញៀវជួលសម្រាកលេងជាលក្ខណៈឯកជនម្នាក់ឯង ឬសម្រាប់តែគ្រួសារខ្លួនឯងក៏បាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រមណីយដ្ឋានកោះមាសសេសាន ទើបចាប់ផ្តើមអភិវឌ្ឍមិនដល់ពីរឆ្នាំនេះទេ។ លោក សុវណ្ណ ពិសេត បានឲ្យដឹងថា ដោយការសហការគ្នារបស់ពលរដ្ឋក្នុងសហគមន៍ អ្នកខ្លះធ្វើស្ពាន និងកញ្ចុះ អ្នកខ្លះទទួលចម្អិនម្ហូប អ្នកខ្លះរៀបចំតង់ និងអ្នកខ្លះទៀតផ្តល់សេវាទូកជូនភ្ញៀវទៅកោះ ដែលប្រាក់ចំណូលទទួលបានគឺជួយដល់ជីវភាពប្រជាកសិករក្នុងសហគមន៍។

បរិយាកាសកោះមាសសេសានមានខ្យល់អាកាសបរិសុទ្ធ ទេសភាពស្រស់ស្អាតត្រជាក់ភ្នែកពីព្រលឹមរហូតដល់ព្រលប់។ ទឹកទន្លេមានសភាពរាក់មិនជ្រៅដែលផ្តល់សុវត្ថិភាពខ្ពស់សម្រាប់ក្មេងៗលេងកម្សាន្ត លើកលែងតែតំបន់ហាមឃាត់មួយចំនួនតូច។

ភ្ញៀវទេសចរដែលធ្វើដំណើរមកកម្សាន្តកោះមាសសេសាន ក៏អាចឆៀងទៅមើលគគីរថ្មដែលវែងជាងគេនៅស្រុកខ្មែរនៅលើភ្នំមានចម្ងាយប្រហែល ១០ គីឡូម៉ែត្រពីរមណីយដ្ឋាន រួចបន្តទៅវារីអគ្គិសនីសេសានក្រោមពីរមានចម្ងាយប្រហែល ១៥ ទៅ ១៦ គីឡូម៉ែត្រ រួចចូលមកកោះមាសនិងត្រលប់ទៅខេត្តវិញ។

ដោយសារទីកម្សាន្តនេះជាតំបន់អភិរក្សនិងគ្មានបទល្មើសនេសាទ ត្រីមានការកើនឡើងច្រើនដូចជាត្រីក្អែក ត្រីព្រួល និងត្រីឆ្កោក ដែលភ្ញៀវអាចទស្សនាការបង់សំណាញ់របស់អ្នកនេសាទ ឬស្ទូចត្រីលេងកម្សាន្តដោយផ្ទាល់ក៏បាន។

លោក សុវណ្ណ ពិសេត បានឲ្យដឹងថា រមណីយដ្ឋានទេសចរណ៍ទើបរៀបចំនេះគ្រប់គ្រងដោយសហគមន៍ ដែលមានបម្រើម្ហូបប្រចាំតំបន់ឆ្ងាញ់ៗដូចជា ឡាប ភ្លា ត្រីអាំង មាន់ដុត ពោតដុត និងនំបញ្ចុកធ្វើដោយសហគមន៍ផ្ទាល់។ គ្រឿងទេស បន្លែ ត្រី សាច់ មាន់ ទា ក៏ត្រូវបានប្រមូលទិញពីប្រជាកសិករក្នុងតំបន់ដោយផ្ទាល់ផងដែរ។

លោក សុវណ្ណ ពិសេត បន្ថែមថា សម្រាប់ភ្ញៀវទេសចរដែលមកកម្សាន្តអាចប្រើកញ្ចប់សេវាម្នាក់ត្រឹមតែ ១៥ ០០០ រៀល ទទួលទានអាហារមួយពេលដែលក្នុងនោះមានដូចជា បាយឬបាយដំណើប ត្រីអណ្ដែង និងប្រហុកចិញ្ច្រាំ។

ពេលវេលាស័ក្ដិសមបំផុតសម្រាប់ការមកកម្សាន្តរមណីយដ្ឋានទេសចរណ៍នេះគឺរដូវទឹកសម្រកចាប់ពីខែធ្លាក់ខ្យល់ពីខែវិច្ឆិកា ធ្នូ មករា កុម្ភៈ រហូតដល់ពាក់កណ្តាលខែមិថុនា។ ដោយឡែកចាប់ពីពាក់កណ្តាលខែ ៦ ឡើងទៅ ទឹកនឹងលិចកោះមិនអាចលេងទឹកបានទេ តែភ្ញៀវទេសចរអាចផ្លាស់ប្តូរបទពិសោធន៍ទៅចូលរួមជួយស្ទូង ដកសាបនិងភ្ជួររាស់ជាមួយប្រជាពលរដ្ឋជំនួសវិញ។

បើតាមលោកអភិបាលស្រុក ការមកកម្សាន្តនៅតំបន់ទេសចរណ៍នៅស្រុកសេសាន មិនត្រឹមតែទទួលបាននូវបទពិសោធន៍រស់នៅ និងលំហែកាយជាមួយធម្មជាតិប៉ុណ្ណោះទេ ថែមទាំងបានចូលរួមចំណែកលើកស្ទួយជីវភាពគ្រួសាររបស់បងប្អូនប្រជាជនក្នុងសហគមន៍ផងដែរ៕