តម្លៃប្រេងពិភពលោក បន្តធ្លាក់ចុះ មួយបារ៉ែលលក់មិនដល់ ១០០ ដុល្លារ

តម្លៃប្រេងពិភពលោកបានបន្តធ្លាក់ចុះទៀតកាលពីថ្ងៃពុធដើម្បីទប់ទល់នឹងការកើនឡើងអតិផរណាដែលជំរុញឲ្យមានការធ្លាក់ចុះសេដ្ឋកិច្ច ។

ប្រេងឆៅអន្តរជាតិម៉ាក Brent កំពុងជួញដូរក្នុងតម្លៃ ៩៩.៣៤ ដុល្លារក្នុងមួយបារ៉ែល ពោលថយចុះ ០.១៥ ភាគរយ បន្ទាប់ពីដាក់លក់តម្លៃ ៩៩.៤៩ ដុល្លារក្នុងមួយបារ៉ែលកាលពីប៉ុន្មានថ្ងៃមុន ។

ចំណែកតម្លៃប្រេងរបស់ក្រុមហ៊ុនអាមេរិក West Texas Intermediate (WTI) បានដាក់លក់ក្នុងតម្លៃ ៩៥.៧៨ ដុល្លារក្នុងមួយបារ៉ែល ដោយថយចុះ ០.០៦ ភាគរយក្នុងរយៈពេលដូចគ្នានេះ ខណៈធ្លាប់លក់ នៅតម្លៃ ៩៥.៨៤ ដុល្លារក្នុងមួយបារ៉ែលកាលពីមួយថ្ងៃមុន ។

ទន្ទឹមនោះ ការធ្លាក់ចុះតម្លៃប្រេងនេះ ក៏ដោយសារតែការផ្លាស់ប្ដូររបស់ធនាគារកណ្តាលដើម្បីបង្កើនអត្រាការប្រាក់យ៉ាងខ្លាំងក្លាទប់ទល់នឹងអតិផរណា ការបិទខ្ទប់ទីក្រុងនានារបស់ចិន ដោយសារតែរលកឆ្លងថ្មីនៃជំងឺកូវីដ ១៩ ក៏ដូចជាការភ័យខ្លាចការធ្លាក់ចុះសេដ្ឋកិច្ចសកលជាដើម ។

ស្របពេលជាមួយគ្នានេះ អ្នកលេងទីផ្សារកំពុងតាមដានយ៉ាងដិតដល់លើការធ្វើដំណើររបស់ប្រធានាធិបតីអាមេរិក Joe Biden ទៅកាន់មជ្ឈិមបូព៌ា ជាកន្លែងដែលលោកនឹងជំរុញឲ្យអារ៉ាប៊ីសាអូឌីត និងប្រទេសឈូងសមុទ្រផ្សេងទៀតបង្កើនការផ្គត់ផ្គង់ប្រេងរបស់ពួកគេដើម្បីគាំទ្រដល់ស្ថិរភាពតម្លៃពិភពលោក ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មូលហេតុសំខាន់ចំនួន ២ ជាដើមចមទម្លាក់ តម្លៃប្រេងពិភពលោក