អ្នកជំនាញ​មិនរំពឹង​តម្លៃគ្រាប់ស្វាយ​ចន្ទីកើនឡើង​នោះទេ​នារដូវប្រមូលផលឆ្នាំនេះ​

លោក អិល ឈិញ ​អនុប្រធានសមាគមស្វាយចន្ទីរ​នៅស្រុកអន្លង់វែង ខេត្តឧត្តរមានជ័យ​បានឲ្យ​ដឹង​ថា ​តម្លៃគ្រាប់ស្វាយចន្ទីរ​មិនរំពឹងថា នឹងកើនឡើង​នោះទេនៅឆ្នាំនេះ។

នៅឆ្នាំនេះខាងសមាគមរបស់លោកជំរុញ​កសិករឲ្យ​ប្រើថ្នាំពន្លឿន​ឲ្យ​ស្វាយ​ចន្ទីរឆាប់ចេញផ្កានៅខែ១១ ដើម្បី​ឲ្យចៀសផុតពីផលអាក្រកនៅខែ១។ លោក អិល ឈិញ បញ្ជាក់​ថា នេះជាយុទ្ធសាស្ត្រ​បន្ថយ​ចំណាយ និងពេលវេលាដើម្បីឲ្យចន្ទីរចេញផ្លែមុនរដូវកាល។

លោក អិល ឈិញប្រាប់ថា «ស្វាយចន្ទីរជាទូទៅ មិនរំពឹងថាកើនឡើងទេ វាអាចថេរ បើកើនឡើង​តិច​តួច ឆ្នាំនេះអាចលក់បាន១ គីឡូ ១៦០០ ទៅ ២០០០ រៀល យើងស្មានបែបនេះ​ដោយ​សារ​អាកាស​ធាតុអាចអំណោយផល ហើយគុណភាពចន្ទីរអាចល្អជាងមុន ព្រោះយើងជំរុញ​ឲ្យ​កសិករ​បញ្ចៀស​ស្វាយចន្ទីរចេញផ្កាមុនរដូវកាល»។

​របាយការណ៍របស់ក្រសួងកសិកម្ម រុក្ខាប្រមាញ់ និងនេសាទបង្ហាញថា ​រយៈពេល ៧ ខែ ឆ្នាំ ២០២២ ការនាំចេញគ្រាប់ស្វាយចន្ទីរមានចំនួនជាង ៤ សែនតោន (៤៤៥ ០១៥,១៥) ថយចុះជិត ៥០ ភាគរយ ប្រៀបធៀបរយៈពេលដូចគ្នាឆ្នាំ ២០២១ ក្នុងនោះប្រទេសវៀតណាមជាទីផ្សារ​ធំជាងគេ​របស់​កម្ពុជា៕​