សហគ្រាសកែច្នៃស្វាយចន្ទីស្ទឹងត្រែង គ្រោងពង្រីកផលិតកម្មកែច្នៃ នាំចេញទៅទីផ្សារជប៉ុន

ក្រុមហ៊ុន Inoue Calcium Corporation បានដាក់ផែនការក្នុងការពង្រីកការកែច្នៃគ្រាប់ស្វាយចន្ទី ជាផលិតផលសម្រេច សម្រាប់នាំចេញទៅទីផ្សារជប៉ុន ដោយមានការចូលរួមពីអគ្គនាយករង និងមន្រ្តីនៃនាយកដ្ឋានទាំងបី ចំណុះអគ្គនាយកដ្ឋានជំរុញពាណិជ្ជកម្ម។

ការលើកឡើងរបស់ក្រុមហ៊ុនត្រូវធ្វើឡើងក្នុងជំនួបរវាង លោក ឈរ ស៊ុនហុង អនុរដ្ឋលេខាធិការក្រសួងពាណិជ្ជកម្ម នៅថ្ងៃទី ០១ ខែតុលា ឆ្នាំ ២០២៥​ បានជួបពិភាក្សាការងារជាមួយ លោក Takashi INOUE អគ្គនាយកក្រុមហ៊ុន Inoue Calcium Corporation និងកញ្ញា សឿន សុទ្ធនីតា សហស្ថាបនិក និងជានាយិកាអភិវឌ្ឍន៍ទីផ្សារ នៃក្រុមហ៊ុនហ៊ែនក្រាហ្វធីត ឃែស៊ូណាត់ ស្ទឹងត្រែង។

លោកអនុរដ្ឋលេខាធិការ បានបង្ហាញអំពីការគាំទ្រ លើកទឹកចិត្តដល់គណៈប្រតិភូពាណិជ្ជករជប៉ុន ក្នុងសិក្សាស្វែងយល់អំពីផលិតផលសក្តានុពលកសិកម្មកម្ពុជានៅខេត្តស្ទឹងត្រែង តាមគោលការណ៍រាជរដ្ឋាភិបាលក្នុងការជំរុញការវិនិយោគ ជាពិសេសក្នុងភូមិភាគឦសាន ព្រមទាំងចាប់ដៃគូពាណិជ្ជកម្មជាមួយក្រុមហ៊ុនកម្ពុជា ដើម្បីសហការជំរុញការបណ្តាក់ទុន និងវិនិយោគ ក៏ដូចជានាំចេញ-នាំចូលផលិតផលរវាងប្រទេសទាំងពីរ។

លោកអនុរដ្ឋលេខាធិការ បានបង្ហាញការសាទរចំពោះសិប្បកម្ម ហ៊ែនក្រាហ្វធីត ឃែស៊ូណាត់ ស្ទឹងត្រែង ដែលបាននាំចេញគ្រាប់ស្វាយចន្ទីជាផលិតផលសម្រេចចំនួន ១តោន ទៅទីផ្សារជប៉ុន បានជោគជ័យ និងគ្រោងនាំចេញបន្ថែមចំនួនពីរកុងតឺន័រទៀតនៅឆ្នាំបន្ទាប់។

យោងតាមក្រសួងពាណិជ្ជកម្ម គិតចាប់ពីខែមករា ​ដល់ខែសីហា ​ឆ្នាំ ២០២៥ ក​ម្ពុជារកចំណូលបានប្រមាណជិត ៨០០ លានដុល្លារ (៧៩០) ពីការនាំ​ចេញ​គ្រាប់​ស្វាយ​ចន្ទី ​កើនឡើង ៦០,៥៥% ​ធៀបនឹងរយៈពេល​ដូចគ្នានៅឆ្នាំ ២០២៤។

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា ​ទីផ្សារ​តម្លៃ​ និង​ទិន្នផល​គ្រាប់​ស្វាយចន្ទី​នៅ​តែ​បន្ត​មាន​ភាព​ល្អ​ប្រសើរ​នៅ​ឆ្នាំ ​២០២៥ ថ្វីបើមានការធ្លាក់ភ្លៀងច្រើន ដែលធ្វើឱ្យ​គុណ​ភាពចន្ទីធ្លាក់​ចុះ​បន្តិច។ ​

លោក អួន ស៊ីឡុត បន្ថែមថា តម្លៃគ្រាប់ស្វាយចន្ទីនៅតែមានភាពល្អប្រសើរចាប់តាំងពីខែមេសា ដែលគ្រាប់សើមមានតម្លៃ ៥០០០ រៀល ក្នុងមួយគីឡូក្រាម នៅក្នុង​ខែមេសា ហើយគ្រាប់ស្ងួតលក់បាន ៦៥០០ រៀល នៅខែ​ឧសភា នៅខែមិថុនា គ្រាប់ស្វាយចន្ទីស្ងួត លក់បានតម្លៃ ៧២០០ រៀលក្នុងមួយ​គីឡូ​ក្រាម និងខែសីហា លក់បាន ៦៨០០ រៀលក្នុងមួយគីឡូក្រាម។ ​

លោក អួន ស៊ីឡុត យល់ឃើញថា៖ «កម្ពុជាត្រូវមានយន្តការច្បាស់​លាស់ទើបរក្សាតម្លៃគ្រាប់ស្វាយ​ចន្ទីឆៅ​ឱ្យមានស្ថេរភាពជូនដល់កសិករ ដោយយន្តការចម្បងគឺគាំ​ទ្រការ​បង្កើត​​​​រោង​ចក្រកែច្នៃក្នុង​ស្រុក​ឲ្យបានច្រើន តាម​គោលនយោបាយជាតិស្ដីពីស្វាយ​ចន្ទីដែល​បានកំណត់ ២៥% រវាងឆ្នាំ ២០២២-២០២៧»៕