យុទ្ធសាស្រ្តរបស់អ្នកឧកញ៉ា សុខ គង់ កសាងកេរ្តិ៍ឈ្មោះក្នុងវិស័យជំនួញ

អ្នកឧកញ៉ាបណ្ឌិត សុខ គង់ អគ្គនាយកក្រុមហ៊ុនសូគីម៉ិច និងសុខា អូតែល បានឆ្លងកាត់ដំណើរជីវិតលំបាករាប់សិបឆ្នាំ មុននឹងមានជីវិតជោគជ័យត្រចះត្រចង់ដូចសព្វថ្ងៃនេះ។ អាថ៌កំបាំងនៅពីក្រោយភាពជោគជ័យរបស់អ្នកឧកញ៉ា សុខ គង់ ដែលអាចកសាងកេរ្តិ៍ឈ្មោះក្នុងវិស័យជំនួញ ល្បីល្បាញបែបនេះ ក៏ដោយសារបានកំណត់លក្ខខណ្ឌសម្រាប់ខ្លួនលោក មួយចំនួន មានដូចជា ត្រូវចុះធ្វើដោយខ្លួនឯងពេញដៃពេញជើង ជាបទពិសោធន៍រៀនពីការងារ, ច្នៃប្រតិដ្ឋបង្កើតថ្មី ចាប់យកឱ្យកាស សម្រេចចិត្តឱ្យលឿន, កុំខ្លាចនឿយហត់ម៉ោងណាពេលណា ក៏ជាពេលការងារដែរ, ព្យាយាមពុះពារ​កុំបោះបង់ពេលជួបការលំបាក ឬឧបសគ្គព្រោះរឿងអ្វីក៏មានដំណោះស្រាយ, តាំងចិត្តថា ត្រូវតែធ្វើឱ្យបាន​សម្រេចគោល​ដៅ, គិតវិជ្ជមានជឿជាក់លើខ្លួនឯង, សិក្សារ ស្រាវជ្រាវ ឈ្វេងយល់​ អភិវឌ្ឍសមត្ថភាព កាំបិតមិនមុត ត្រូវតែព្យាយាម​សំលៀង, ស្មោះត្រង់យកចិត្តទុកដាក់ដើម្បីកសាងកេរ្តិ៍ឈ្មោះ និងធ្វើឱ្យគេមើលឃើញ ឱ្យគេជឿជាក់លើយើង។

លើសពីនេះទៀត អាថ៌កំបាំងជាច្រើន ត្រូវបង្ហាញនៅក្នុងសៀវភៅមួយក្បាល ដែលមានពីរជំពូក និងជិត ២០០ទំព័រ ដោយ​បាន​សម្ពោធ​ជាផ្លូវការកាលពីរសៀលថ្ងៃទី ០៣ ខែ មករា ឆ្នាំ ២០២៣។ សៀវភៅនេះ មានចំណងជើង​ថា«អាថ៌កំបាំង​ពីក្រោយភាពជោគជ័យរបស់អ្នកឧកញ៉ាបណ្ឌិត សុខ គង់»។ ខ្លឹមសារនៅក្នុងសៀវភៅនេះ ឆ្លុះបញ្ចាំង​អំពីប្រវត្តិនៃការ​សិក្សា និងជំនួញដំបូងក្នុងជិវិត, ការគ្រប់គ្រង និងពង្រីកចំនួញ , ការចាប់ផ្តើមបង្កើតក្រុមហ៊ុន ការកសាង​កេរ្តិ៍ឈ្មោះ និងពង្រីកការវិនិយោគ ទ្រឹស្តី និងការគ្រប់គ្រងជំនួញជាដើម។

អ្នកឧកញ៉ា សុខ គង់ បានលើកឡើងថា ដំណើរជីវិតចាប់ពីចំណុចសូន្យរហូតដល់មានលុយ មានដំណើរដើមទងច្រើន ប៉ុន្តែបានរំលេចនៅក្នុងសៀវភៅខាងលើនេះទាំងអស់។ ទោះយ៉ាងណា អ្នកឧកញ៉ាបានរំលេចនៅចំណុចមួយថា បើជីវិតធ្លាក់ដល់ចំណុចសូន្យ គេមើលងាយណាស់ ទៅណាមកណា ក៏គេមិនហៅមិនចង់រាប់អាន ដូច្នេះមានលុយ​ត្រូវតែចាយដោយសន្សំសំចៃខ្ពស់។ «ខ្ញុំឧស្សាហ៍ប្រាប់កូនចៅ តែអត់លុយហើយ មុខយើងគេអត់មើលទេ អ៊ីចឹងត្រូវខំ​ប្រឹងសន្សំសំចៃឡើង ដើម្បីមានលុយអភិវឌ្ឍខ្លួន និងវិនិយោគ»។ នេះជាការបន្ថែមរបស់អ្នកឧកញ៉ាបណ្ឌិត សុខ គង់។

លោកឧត្តមសេនីយ៍ឯកបណ្ឌិត ងិន បាណាល់ អ្នកដឹកនាំចងក្រងសៀវភៅ«អាថ៌កំបាំងពីក្រោយភាពជោគជ័យ​របស់អ្នកឧកញ៉ា​បណ្ឌិត សុខ គង់» បានលើកឡើងដែរថា សៀវភៅមួយក្បាលនេះ បានលាតត្រដាងនូវខ្សែជីវិត​របស់បុគ្គលឆ្នើម​ក្នុងវិស័យធុរកិច្ច ជីវិតតស៊ូតាំងពីកុមារភាព បទពិសោធ​ការងារធ្វើអាជីវកម្មមុនពេលភ្លើងសង្គ្រាមផ្ទៃក្នុង​កម្ពុជាចាប់ផ្តើម​ អាជីវកម្មក្នុងអណ្តាតភ្លើងសង្គ្រាម ការដោះដូរទំនិញ និងឈានដល់ការចាប់ផ្តើមធ្វើជំនួញធំៗ ជាច្រើននៅកម្ពុជា ក្រោយសម័យរំដោះឆ្នាំ ១៩៧៩ រហូតដល់បច្ចុប្បន្ន និងសកម្មភាពចូលរួមជាមួយរដ្ឋាភិបាល ក្នុងការកសាងសង្គមសេដ្ឋកិច្ច ក្នុងសម័យសន្តិភាព​ឱ្យមានការអភិវឌ្ឍ។ សៀវភៅនេះ ក៏បានឆ្លុះបញ្ចាំអំពីប្រពៃណីវប្បធម៌ ជំនឿ សាសនា មុខរបរ សេដ្ឋកិច្ចរបស់ប្រជា​ជន​កម្ពុជា ទំនាក់ទំនងបរទេស សម្រាប់អ្នកជំនាន់ក្រោយបានឈ្វេងយល់ និងស្រាវជ្រាវផងដែរ។

លោកឧត្តមសេនីយ៍ឯកបណ្ឌិត ងិន បាណាល់ បានគូសបញ្ជាក់ទៀតថា អ្នកឧកញ៉ា សុខ គង់ តែងតែប្រៀនប្រដៅ​ដល់កូនចៅ និងយុវជនជំនាន់ក្រោយ ធ្វើអ្វីក៏ដោយត្រូវតែមានភាពស្មោះត្រង់​ ត្រូវចេះសន្សំសំចៃ កុំចាយខ្ជះខ្ជាយពេក សន្សំដើម្បីកូនចៅជំនាន់ក្រោយ ក្នុងន័យកសាងគ្រួសារ និងសង្គមជាតិឱ្យកាន់តែរីកចម្រើន។

សូមបញ្ជាក់ថា សៀវភៅ«អាថ៌កំបាំងពីក្រោយភាពជោគជ័យរបស់អ្នកឧកញ៉ាបណ្ឌិត សុខ គង់» បានបោះពុម្ពដំបូងចំនួន ១០០០ក្បាល និងបានចែកជូនដល់អ្នកដែលចូលរួមក្នុងពិធីសម្ពោធទាំងអស់គ្នា។ បើតាមលោកបណ្ឌិត ងិន បាណាល់ សៀវភៅនេះ នឹងត្រូវបោះពុម្ពបន្ថែមទៀត ជាភាសាខ្មែរ អង់គ្លេស និងចិន។ សៀវភៅនេះ នឹងមាននៅបណ្ណាល័យជាតិ និងបណ្ណាគារនានា នៅកម្ពុជា។ បើតាមលោកបណ្ឌិត ងិន បាណាល់ ការបោះពុម្ពសៀវភៅនេះ មិនរកប្រាក់ចំណេញ​នោះទេ៕