​ព្រះធម្មវនវាសី ចន្ទ មុនី វេរ​បច្ច័យជាង ១៥ ០០០ ដុល្លារ​ ពី​ប្រោះព្រំ​​ភូមិគ្រឹះអ្នកឧកញ៉ា សុខ គង់ យក​​ទៅ​​កសាងព្រះពុទ្ធប្បដិមាកម្ពស់ ១០៨ ម៉ែត្រ​លើភ្នំបូកគោ

ព្រះធម្មវនវាសី ចន្ទ មុនី បានចូលរួមបច្ច័យជាង ១៥ ០០០ ដុល្លារ ដើម្បីកសាងព្រះពុទ្ធប្បដិមាកម្ពស់ ១០៨ ម៉ែត្រ​លើភ្នំបូកគោដែលនឹងក្លាយជាមជ្ឈមណ្ឌលទេសចរណ៍សាសនាដ៏ធំនៅកម្ពុជានិងពិភពលោក និង​អាចទាក់ទាញភ្ញៀវទេសចររាប់​ម៉ឺននាក់ទៅកម្សាន្តក្រោយសាងសង់រួច។

បច្ច័យជាង ១៥ ០០០ ដុល្លារនេះ ព្រះធម្មវន វាសី ចន្ទ មុនីបាននិមន្តប្រោះព្រំនៅភូមិគ្រឹះអ្នកឧកញ៉ា សុខ គង់ កាលថ្ងៃទី ២៥ ខែវិច្ឆិកា ឆ្នាំ២០២៣។ បន្ទាប់មកព្រះអង្គបាននិមន្តទៅលើការដ្ឋានសាងសង់ព្រះពុទ្ធប្បដិមាកម្ពស់ ១០៨ ម៉ែត្រលើភ្នំបូកគោ ហើយព្រះអង្គបានប្រោះព្រំពុទ្ធបរិស័ទមកពីទីជិតឆ្ងាយយ៉ាងច្រើនកុះករដែលបានឡើងមកជួបព្រះអង្គនៅលើភ្នំបូកគោ ក្នុងនោះព្រះអង្គមានសទ្ធាជ្រះថ្លាបានវេរបច្ច័យសរុបចំនួន ១៤,៥០០ ដុល្លារអាមេរិក និង ៣ លានរៀល ដើម្បីចូលរួមកសាងព្រះពុទ្ធប្បដិមាកម្ពស់ ១០៨ ម៉ែត្រលើភ្នំបូកគោ។

ព្រះធម្មវនវាសី ចន្ទ មុនី មានភាពល្បីល្បាញនៅពេលព្រះនិមន្តទៅទីណាតែងតែមានប្រជាពុទ្ធបរិស័ទជាច្រើននាក់រង់ចាំដើម្បីទទួលស្វាគមន៍។

កាលពីថ្ងៃទី៤ ខែមករា ឆ្នាំ២០២៣ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ព្រះពុទ្ធប្បដិមាលើកំពូលភ្នំបូកគោ នឹងក្លាយជាមជ្ឈមណ្ឌលទេសចរណ៍សាសនាដ៏ធំនៅកម្ពុជា និងពិភពលោក និង​អាចទាក់ទាញភ្ញៀវទេសចររាប់ម៉ឺននាក់ទៅកម្សាន្តក្រោយសាងសង់រួច។

ការផ្តួចផ្តើមសាងសង់ព្រះពុទ្ធប្បដិមាដ៏ធំមួយអង្គនៅលើខ្នងភ្នំបូកគោនេះ ដើម្បីជាទីសក្ការៈសម្រាប់ពុទ្ធសាសនិក ប្រតិបត្តិធម៌ ឧទ្ទិសសុំសេចក្តីសុខ សន្តិភាព សេចក្តីចម្រើនរុងរឿង។ ព្រះពុទ្ធប្បដិមា ដែលសាងសង់នេះមានកម្ពស់ខ្ពស់ជាងគេក្នុងព្រះរាជាណាចក្រកម្ពុជា ហើយស្ថិតនៅក្នុងចំណោមព្រះពុទ្ធប្បដិមាដ៏ខ្ពស់ៗនៅលើពិភពលោកផងដែរ។

លោក ជា សុផារ៉ា បានថ្លែង​ថា ការ​រួមចំណែកយ៉ាងសកម្មរបស់ក្រុមហ៊ុន​សុខា​ នៅក្នុងការអភិវឌ្ឍតំបន់រមណីយដ្ឋានបូកគោ​និងបានផ្តួចផ្តើមសាងសង់ព្រះពុទ្ធប្បដិមានេះឡើង ដែលនឹងក្លាយទៅជាមជ្ឈមណ្ឌលទេសចរណ៍ព្រះពុទ្ធសាសនា ដ៏ធំមួយនៅព្រះរាជាណាចក្រកម្ពុជានិងពិភពលោក ហើយព្រះពុទ្ធប្បដិមាអង្គនេះនឹងគង់នៅជាសម្បត្តិវប្បធម៍ជាតិតជំនាន់​សម្រាប់ជា​ទី​សក្ការ:ដ៏ឧត្តុងឧត្តមរបស់ពុទ្ធសាសនិកជនទាំងអស់គ្នានិងទុកជាស្នាដៃនៃកេរ្តិ៍មរកតដល់កូនចៅជំនាន់ក្រោយ៕

អត្ថបទ៖ សំអឿន