ព័ត៌មានជាតិ
អ្នកផលិត៖ បញ្ហាធំកំពុងខ្វះកម្លាំងពលកម្មផលិតអំបិលនៅខេត្តកំពត
អ្នកផលិតអំបិលខេត្តកំពត បានលើកឡើងថា បច្ចុប្បន្ននេះបញ្ហាប្រឈមធំ គឺកំពុងខ្វះកម្លាំងពលកម្មដើម្បីផលិតអំបិល ខណៈដែលការផលិតបានជួបឧបសគ្គមួយចំនួន ដោយសារតែបញ្ហាអាកាសធាតុមានភ្លៀងធ្លាក់តាំងពីដើមឆ្នាំ ធ្វើឱ្យការប្រមូលផលត្រូវអូសបន្លាយមកដល់សប្តាហ៍ទី២ ខែកុម្ភៈនេះ។
លោក ប៊ុន ណារិន អ្នកផលិតអំបិលកំពត បានឱ្យដឹងថា ការខ្វះកម្លាំងពលកម្មនេះ មានរយៈពេលប្រហែល ៥ឆ្នាំមកហើយ ដោយសារពលរដ្ឋបានចំណាកស្រុកទៅធ្វើការនៅក្រៅប្រទេស។ លោកថា បញ្ហាខ្វះកម្លាំងពលកម្មនេះ ក៏ជាហេតុធ្វើឱ្យការប្រមូលផលយឺតយ៉ាវ រងផលប៉ះពាល់ដោយសារទឹកភ្លៀងផងដែរ។
លោកបន្តដូច្នេះថា«យើងអត់ទាន់រកបច្ចេកទេសណាមួយឃើញ ជំនួសប្រើកម្លាំងពលកម្ម ដោយសារយើងធ្វើតាមបែបបទប្រពៃណីធម្មជាតិ»។
បើតាមលោក ប៊ុន ណារិន នៅក្នុងឆ្នាំ ២០២២ កម្ពុជា ផលិតអំបិលបានប្រមាណតែ ៣ម៉ឺនតោនប៉ុណ្ណោះ ខណៈកម្ពុជា ត្រូវការក្នុងរង្វង់ជាង ១០ម៉ឺនតោនក្នុងមួយឆ្នាំ ដើម្បីបំពេញតម្រូវការក្នុងស្រុក ។
អ្នកផលិតអំបិលរូបនេះ បានឱ្យដឹងទៀតថា ផ្ទៃដីផលិតអំបិលផ្លូវការ ដែលរដ្ឋទទួលស្គាល់នៅខេត្តកំពត មានចំនួនជាង ៣៧០០ហិកតា និងមានអ្នកផលិតចំនួន ២០០ក្រុម។ ប៉ុន្តែបច្ចុប្បន្ននេះ អ្នកផលិតអំបិលនៅសល់តែ ១៣៩ក្រុមប៉ុណ្ណោះ ដោយសារតែបញ្ហាអាកាសធាតុ បានធ្វើអ្នកផលិតមួយចំនួនខាតច្រើន ក៏បោះបង់មុខរបរនេះ ដោយងាកទៅប្រកបការងារផ្សេងជំនួសវិញ។
លោក ប៊ុន ណារិន បានលើកឡើងថា ជាទម្លាប់កសិកចាប់ផ្តើមរៀបចំប្រព័ន្ធប្រឡាយទឹកធ្វើស្រែចាប់ពីពាក់កណ្តាលខែ តុលា និងចាប់ប្រមូលផលពីខែ មករា ដល់ចុងខែ មេសា ឬឆ្លងដល់ខែ ឧសភា អាស្រ័យលើអាកាសធាតុ។
កម្ពុជា ផលិតអំបិលតាមបែបធម្មជាតិ ដែលធ្វើឱ្យអំបិលផ្ទុកទៅដោយសារធាតុសំខាន់ៗជាច្រើន ខុសពីអំបិលរ៉ែនៅក្រោមដី។ សារធាតុសំខាន់ៗ នៅក្នុងអំបិល រួមមាន ជាតិដែក កាល់ស្យូម ប៉ូតាស្សូម និងម៉ាញ៉េស្សូម ជាដើម ដែលជួយទ្រទង់ដល់ជីវិតយើង។ នេះជាការបន្ថែមរបស់លោក ប៊ុន ណារិន។
សូមបញ្ជាក់ថា ក្រសួងពាណិជ្ជកម្ម នឹងសម្ពោធដាក់ឱ្យប្រើប្រាស់ជាផ្លូវការ នូវម៉ាកសម្គាល់ភូមិសាស្រ្តទំនិញ «អំបិលកំពតកែប» នៅថ្ងៃទី២៦ ខែមេសា ឆ្នាំ២០២៣ ចំថ្ងៃទិវាកម្មសិទ្ធិបញ្ញាពិភពលោក។
លោក ប៊ុន ណារិន រំពឹងថា បន្ទាប់ពីអំបិលកំពត ដាក់ជាផលិតផលម៉ាកសម្គាល់ភូមិសាស្រ្ត នឹងធ្វើឱ្យក្រុមអ្នកផលិតដែលបោះបង់ការផលិតទាំងនោះ វិលត្រឡប់មកធ្វើឡើងវិញ ដើម្បីបង្កើនបរិមាណផលិតបានកាន់តែច្រើន សម្រាប់ផ្គត់ផ្គង់តម្រូវការក្នុងស្រុក និងសល់សម្រាប់នាំចេញផងដែរ៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ