អ្នកសេដ្ឋកិច្ច ៖  វិនិយោគិនបរទេស​នឹងមានទំនុកចិត្តខ្លាំងលើកម្ពុជា ក្រោយដកចេញ​ពីបញ្ជីប្រផេះ​​នៃ​ការ​លាងលុយ​កខ្វក់

ប្រទេស​កម្ពុជា​ត្រូវ​បាន​ដក​ចេញ​ជា​ផ្លូវការ​ពី «បញ្ជី​ប្រផេះ​នៃ​ការ​លាងលុយ​កខ្វក់» នៃក្រុមការងារហិរញ្ញវត្ថុអន្តរជាតិ ប្រឆាំងការសម្អាតប្រាក់ (FATF) កាលពីពេលថ្មីៗនេះ ដោយសារ​កិច្ច​ខិតខំ​ប្រឹងប្រែង​របស់​កម្ពុជា​ក្នុង​ការ​ប្រយុទ្ធ​ប្រឆាំង​នឹង​ការ​លាង​លុយ​កខ្វក់ ហិរញ្ញប្បទាន​ភេរវកម្ម និង​ហិរញ្ញប្បទាន​ដល់ការ​រីក​សាយភាយ​អាវុធម​ហាប្រល័យ។

លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា សាទរចំពោះការដកកម្ពុជា ចេញពីបញ្ជីប្រផេះនេះ។ លោកមើលឃើញថា ការដកចេញនេះ នឹងទទួលបានផលប្រយោជន៍ច្រើន ខណៈកម្ពុជា កំពុងមានការនាំចេញ​ផលិតផលដែលជាវត្ថុធាតុដើមសម្រាប់កែច្នៃទៅបរទេសច្រើន ដោយមិនមានការបារម្ភអំពីការផ្ទេរជា​ប្រាក់ដុល្លារចូល​ប្រទេសវិញ។ លើសពីនេះទៀត លោកបញ្ជាក់ថា អ្នកវិនិយោគបរទេស នឹងមានទំនុកចិត្តកាន់តែខ្លាំង មកលើកម្ពុជា​ថែមទៀត។

ដូចគ្នានេះដែរ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភា​កម្ពុជា បានលើកឡើងថា ការជាប់ក្នុងបញ្ជីប្រផេះ ជាប្រទេសលាងលុយកខ្វក់​ធ្វើឱ្យប៉ះពាល់ដល់ការអភិវឌ្ឍសេដ្ឋកិច្ចជា​ខ្លាំង។ លោកថា ការដាក់ប្រទេសកម្ពុជា ក្នុងបញ្ជីពណ៌ប្រផេះ ឬខ្មៅ ធ្វើឱ្យប៉ះពាល់ដល់កិត្តិយសកិត្យានុភាព ខណៈ​កម្ពុជា មិនមែនជាប្រទេសបង្កឱកាសដល់ការលាងលុយផងនោះ ដែលនេះអយុត្តិធម៌សម្រាប់កម្ពុជា។

ចំពោះការដកចេញពីបញ្ជីប្រផេះនេះ លោកថា បានជួយឱ្យកម្ពុជា ប្រែមុខមាត់ថ្មី ដោយមានទំនុកចិត្តពីសំណាក់​អ្នកវិនិយោគិនបរទេសត្រឡប់មកវិញ ជាពិសេសធ្វើឱ្យកម្ពុជា ទទួលបានកាលានុវត្តភាព​អភិវឌ្ឍសេដ្ឋកិច្ចតាមរយៈ​​ការវិនិយោគពីក្រៅប្រទេស។

លើសពីនេះទៀត ស្ថាប័នហិរញ្ញវត្ថុអន្តរជាតិនានា នឹងកាន់តែមានទំនុកចិត្តលើរាជរដ្ឋាភិបាលកម្ពុជា ថែមទៀត។ ជាមួយគ្នានេះ លោកបណ្ឌិត ហុង វណ្ណៈ មើលឃើញថា បរិយាកាសពាណិជ្ជកម្មរវាងកម្ពុជា និងអន្តរជាតិកាន់តែ​ល្អប្រសើរឡើង ពិសេសនឹងជំរុញការផលិតនាំចេញបង្កើនប្រាក់ចំណូលសម្រាប់សេដ្ឋកិច្ចជាតិផងដែរ។

ថ្លែងនៅក្នុងពិធីបើកសន្និបាតក្រសួងមហាផ្ទៃ កាលពីថ្ងៃទី២២ ខែកម្ភៈ ឆ្នាំ២០២៣ សម្តេច ស ខេង រដ្ឋមន្រ្តីក្រសួង​មហាផ្ទៃ បានគូសបញ្ជាក់ថា កម្ពុជា នឹងដាក់ចេញទិសដៅការងារគន្លឹះបន្តទៀត ដើម្បីការពារនូវលទ្ធផលល្អនេះ​ឱ្យបានជារៀងរហូត ពោលគឺមិនបណ្ដោយឱ្យកម្ពុជា វិលមកធ្លាក់ក្នុងបញ្ជីប្រផេះលើការងារប្រឆាំង​ការសម្អាតប្រាក់​ជាថ្មីទៀត​ឡើយ។

ជាមួយគ្នានេះ សម្តេចក្រឡាហោម ស ខេង ក៏បានក្រើនរម្លឹកដល់ភាគីពាក់ព័ន្ធទាំងអស់ មិនត្រូវមានមោទកភាពជ្រុល រហូតបោះបង់ចោលកិច្ចការងារប្រឆាំងការសម្អាតប្រាក់ និងត្រូវខិតខំប្រឹងប្រែងរួមសាមគ្គីគ្នា បន្តការងារនេះបន្ថែមទៀត។

សូមបញ្ជាក់ថា ប្រទេសចំនួន ៣ នៅ​តែ​ស្ថិត​ក្នុង​បញ្ជី​ខ្មៅ​របស់ FATF រួមមាន កូរ៉េខាងជើង អ៊ីរ៉ង់ និងមីយ៉ាន់ម៉ា ខណៈ​ដែល​ប្រទេស​ជាង​២០ នៅតែ​ស្ថិតក្នុង​បញ្ជី​ប្រផេះ។ ដោយឡែក កម្ពុជា និងប្រទេស​ម៉ារ៉ុក ​លែង​ជា​កម្មវត្ថុ​នៃ​ការ​បង្កើន​ការ​ត្រួត​ពិនិត្យ​ដោយ FATF ទៀតហើយ។ នេះបើតាមសេចក្តីថ្លែងការណ៍របស់ FATF៕