ឥណ្ឌូណេស៊ី ផ្តល់ទិដ្ឋាការមាស ដើម្បីទាក់ទាញវិនិយោគិនបរទេស

ប្រទេសឥណ្ឌូណេស៊ីកំពុងដាក់ចេញនូវគម្រោងផ្តល់ទិដ្ឋាការមាសដើម្បីទាក់ទាញបុគ្គលបរទេស និងវិនិយោគិនសាជីវកម្មក្នុងគោលបំណងទាញការវិនិយោគជំរុញសេដ្ឋកិច្ចជាតិរបស់ខ្លួន ។

ទិដ្ឋាការមាស គឺផ្តល់ប័ណ្ណស្នាក់នៅសម្រាប់រយៈពេលបន្ថែមពី ៥ ទៅ ១០ ឆ្នាំទៀតសម្រាប់វិនិយោគិន ខណៈសម្រាប់ទិដ្ឋាការរយៈពេល ៥ ឆ្នាំ តម្រូវឲ្យវិនិយោគិន ឬបុគ្គលបង្កើតក្រុមហ៊ុនដែលមានតម្លៃ ២.៥ លានដុល្លារអាមេរិក ខណៈដែលទិដ្ឋាការរយៈពេល ១០ ឆ្នាំំ ផ្តល់ឲ្យវិនិយោគិនបង្កើត ក្រុមហ៊ុនដែលមានតម្លៃ ៥ លានដុល្លារអាមេរិក ។

ដោយឡែកប្រទេសផ្សេងទៀតនៅជុំវិញពិភពលោក រួមទាំងសហរដ្ឋអាមេរិក អៀរឡង់ នូវែលហ្សេឡង់ និងអេស្ប៉ាញ ក៏មានទិដ្ឋាការមាសស្រដៀងគ្នានេះផងដែរ ។

ទន្ទឹមនឹងនេះ ចំពោះអ្នកសហការគ្នាធ្វើវិនិយោគសម្រាប់តួនាទីជានាយក ត្រូវចំណាយប្រាក់ ២៥ លានដុល្លារអាមេរិក ដើម្បីទទួលបានទិដ្ឋាការរយៈពេល ៥ ឆ្នាំ ហើយពួកគេត្រូវការវិនិយោគ ៥០ លានដុល្លារអាមេរិក ដើម្បីទទួលបានទិដ្ឋាការរយៈពេល ១០ ឆ្នាំ ។

ចំពោះបទបញ្ញត្តិផ្សេងៗទៀតសម្រាប់ជនបរទេស​ដែលមិនចង់បង្កើតក្រុមហ៊ុនវិនិយោគ តម្រូវឲ្យមានមូលនិធិចាប់ពី ៣៥ ម៉ឺនដុល្លារដល់ ៧០ ម៉ឺនដុល្លារអាមេរិក ដែលអាចត្រូវបានប្រើដើម្បីទិញមូលបត្របំណុលរដ្ឋាភិបាលឥណ្ឌូណេស៊ី ៕

ប្រែសម្រួល៖ នាង រតនៈ

ប្រភព៖ CNA

ចុចអាន៖ វៀតណាម រំពឹងនាំចេញដូង កើនដល់ ១ពាន់លានដុល្លារ បន្ទាប់ពីចិននិងអាមេរិក បើកទីផ្សារ