មនុស្សស្លាប់កើនដល់ ១៤នាក់ ក្នុង​សោកនាដកម្ម​បុករថភ្លើង នៅឥណ្ឌូណេស៊ី

ក្រុមអ្នកជួយសង្គ្រោះនៅក្នុងប្រទេសឥណ្ឌូណេស៊ី កំពុង​ប្រញាប់ប្រញាល់ ដើម្បីជួយសង្គ្រោះជនរងគ្រោះដែលនៅមានជីវិត ប៉ុន្តែជាប់គាំងក្នុងគំនរកម្ទេចដែក បន្ទាប់ពីមានគ្រោះថ្នាក់បុករថភ្លើងយ៉ាងរន្ធត់មួយនៅជិតទីក្រុងហ្សាការតា។

យោងតាម​ទីភ្នាក់ងារ​ព័ត៌មាន Reuters ហេតុការណ៍នេះ បានកើតឡើងនៅតំបន់ Bekasi កាលពីយប់ថ្ងៃចន្ទ ទី​២៧ ខែមេសា រវាងរថភ្លើងដឹកអ្នកដំណើរក្នុងក្រុង និងរថភ្លើងផ្លូវឆ្ងាយ ដែលបណ្ដាល​ឲ្យ​មនុស្ស​ស្លាប់​ដល់ទៅ​ ១៤នាក់ និងរបួសជាង ៨០​នាក់ទៀត។

ប្រធានក្រុមហ៊ុនរថភ្លើងរដ្ឋឥណ្ឌូណេស៊ី លោក Bobby Rasyidi បាន​បញ្ជាក់​ថា គ្រោះថ្នាក់នេះ ផ្ដើមចេញពីរថភ្លើងដឹកអ្នកដំណើរក្នុងក្រុង បានបុកជាមួយរថយន្តតាក់ស៊ីមួយគ្រឿងនៅលើផ្លូវដែក រួចក៏ត្រូវរថភ្លើងផ្លូវឆ្ងាយមួយគ្រឿងទៀតមកបុកបន្ថែមពីលើតែម្ដង។

នៅកន្លែងកើតហេតុ ក្រុមអ្នកជួយសង្គ្រោះ ត្រូវប្រើម៉ាស៊ីនកាត់ដែក ដើម្បីកាត់ទូររថភ្លើង ដែលកំពុងកៀបសង្កត់ជនរងគ្រោះ។ ប្រធានទីភ្នាក់ងារស្វែងរក និងជួយសង្គ្រោះ បានលើកឡើងថា ប្រតិបត្តិការនេះមានភាពស្មុគស្មាញ និងទាមទារការប្រុងប្រយ័ត្នខ្ពស់បំផុត ព្រោះមានជនរងគ្រោះខ្លះនៅមានដង្ហើមនៅឡើយ ប៉ុន្តែត្រូវបានជាប់គាំងនៅក្រោមគំនរដែកដ៏ធ្ងន់។ នៅឯស្ថានីយរថភ្លើងវិញ បរិយាកាសពោរពេញដោយសម្រែកយំសោក ខណៈសាច់ញាតិជនរងគ្រោះបានមកជួបជុំគ្នា ដើម្បីតាមរកបងប្អូន ក្នុងនោះមានបុរសម្នាក់ អង្គុយយំឱបកាបូបប្រឡាក់ឈាមរបស់ប្អូនប្រុសខ្លួនយ៉ាងគួរឲ្យ​អាសូរ។

ក្រោយពីបានចុះសួរសុខទុក្ខជនរងគ្រោះនៅមន្ទីរពេទ្យ លោកប្រធានាធិបតី Prabowo Subianto បានសន្យាថានឹងសាងសង់ស្ពានអាកាស នៅក្បែរផ្លូវរថភ្លើង ដើម្បីដោះស្រាយបញ្ហាកកស្ទះចរាចរណ៍ និងកាត់បន្ថយគ្រោះថ្នាក់។ លោកក៏បានទទួលស្គាល់ផងដែរថា បច្ចុប្បន្នបណ្ដាញផ្លូវរថភ្លើងភាគច្រើននៅក្នុងប្រទេស មិនទាន់ទទួលបានការថែទាំបានល្អត្រឹមត្រូវនៅឡើយទេ។ ខណៈពេលដែលការស៊ើបអង្កេតកំពុងបន្ត ជើងរថភ្លើងជាច្រើនត្រូវបានលុបចោល ដែលធ្វើឲ្យ​ប៉ះពាល់ដល់ការធ្វើដំណើររបស់ប្រជាជនរាប់ម៉ឺននាក់ នៅក្នុងទីក្រុងដែលមានមនុស្សរស់នៅច្រើនបំផុតក្នុងពិភពលោកមួយនេះ៕

ប្រែសម្រួល៖ ឈាង