អាស៊ាន ២ប្រទេស ជួបគ្រោះផ្ទុះភ្នំភ្លើង ឈានដល់ប្រកាសអាសន្ន និងជម្លៀសពលរដ្ឋ បន្ទាន់

នៅថ្ងៃអាទិត្យ ទី៣ ខែឧសភា ឆ្នាំ២០២៦ ប្រទេសអាស៊ានចំនួន២ គឺ ឥណ្ឌូណេស៊ី និងហ្វីលីពីន សុទ្ធតែ ជួបគ្រោះផ្ទុះភ្នំភ្លើង បណ្តាលឲ្យមានការប្រកាសអាសន្ន និងជម្លៀសពលរដ្ឋ ទៅកាន់កន្លែងសុវត្ថិភាព។

តាមការផ្សាយរបស់ The Star, នៅឥណ្ឌូណេស៊ី ភ្នំភ្លើង Semeru ដែលជាភ្នំភ្លើងដ៏គ្រោះថ្នាក់ និងសកម្មបំផុតមួយ បានផ្ទុះនៅម៉ោង៨ព្រឹក បាញ់ផេះ ឡើងលើមេឃកម្ពស់ រហូតដល់ទៅ ៩០០ម៉ែត្រ បណ្តាលឲ្យអាជ្ញាធរ ចេញការប្រកាសអាសន្នកម្រិត ៣ និងព្រមានពលរដ្ឋ នៅឲ្យឆ្ងាយរង្វង់ ១៣គីឡូម៉ែត្រ ពីភ្នំភ្លើងនេះ។

មុនពេលផ្ទុះ ទិន្នន័យអង្កេត បង្ហាញថា ភ្នំភ្លើង Semeru ដែលស្ថិតក្នុងខេត្ត ជ្វាខាងកើត បានរង្គើដល់ទៅ ១៨ដង។

ចំណែក នៅហ្វីលីពីនឯណោះ ក៏កើតមានគ្រោះផ្ទុះភ្នំភ្លើងដែរ ដោយបង្ខំឲ្យមនុស្សរាប់ពាន់នាក់ ត្រូវជម្លៀសខ្លួន ជាបន្ទាន់ និងប្រកាសអាសន្ន កម្រិត៣ ដូចគ្នា។

យោងតាមវិទ្យាស្ថានភ្នំភ្លើងវិទ្យារបស់ហ្វីលីពីន, ភ្នំភ្លើង Mayon បានផ្ទុះ បង្ខំឲ្យមនុស្សជិត ១ ៥០០គ្រួសារ ត្រូវជម្លៀសជាបន្ទាន់ ទៅកាន់មជ្ឈមណ្ឌលជម្លៀសបណ្តោះអាសន្ន។

ស្ថាប័ននេះ បានឲ្យដឹងថា​ ភ្នំភ្លើងបានបាញ់ផេះ ជះគ្របលើខេត្ត Albay បង្កជាផលប៉ះពាល់ខ្លាំងគួសម ហើយចេញការព្រមានអំពីបំណាក់ដី និងលំហូរនៃកម្អែភ្នំភ្លើងផងដែរ។

លើសពីនេះ ហ្វីលីពីន បានដាក់បំរាម មិនឲ្យនរណាម្នាក់ ចូលទៅក្នុងតំបន់គ្រោះថ្នាក់ រង្វង់៦គីឡូម៉ែត្រ ជុំវិញភ្នំភ្លើងនេះ ដាច់ខាត៕

អត្ថបទ៖ សុខ សុវណ្ណ