សមាគមដំឡូងមី ជំរុញឱ្យកសិករកាត់បន្ថយការប្រមូលផល ចំពេលតម្លៃកំពុងធ្លាក់ចុះ

សមាគមកសិករដំឡូងមីខ្មែរនៅថ្ងៃទី ២៧ ខែមីនា ឆ្នាំ ២០២៤ បានជំរុញឱ្យកសិករកាត់បន្ថយការប្រមូលផលនៅចំពេល​ដែល​តម្លៃ​​​ដំឡូង​មីកំពុងធ្លាក់ចុះ ចាប់តាំងពីពាក់កណ្ដាលខែមីនាមក។

លោក អិល ឈិញ ប្រធានសមាគមដំឡូងមីខ្មែរ ​មានប្រសាសន៍ប្រាប់កម្ពុជាថ្មីនៅថ្ងៃទី ២៧ ខែមីនា ឆ្នាំ ២០២៤ នេះថា ដំឡូងមីចាប់ផ្ដើមធ្លាក់ថ្លៃខ្លាំងតាំងពីពាក់កណ្ដាលខែមីនា ដោយ​សារ​ប្រទេសជិតខាងដូចជាប្រទេសថៃ និងវៀតណាម ក៏ប្រមូលផលដំឡូងមីទន្ទឹមគ្នាជាមួយ​កម្ពុជា​​ដែរ ដើម្បីយកដីត្រៀមដាំនារដូវធ្លាក់ភ្លៀង ដូច្នេះវាធ្វើឱ្យចាល់ស្ទះនៅរោងចក្រ ដែលធ្វើឱ្យដំឡូង​ធ្លាក់​ថ្លៃ​។

លោកបញ្ជាក់ថា ដំឡូងមីធ្លាប់តែលក់បាន ៣៥០ រៀលឡើងបានធ្លាក់រហូតដល់ ២៣០ ទៅ ២៤០ រៀល ក្នុង១ គីឡូ នៅតាមលាន ខណៈ​រោងចក្រ​ផលិតម្សៅដំឡូងមីនៅឧត្តរមានជ័យក៏បានខិតខំពង្រឹងតម្លៃដែរ តែត្រូវ​​បង្ខំ​ចិត្ត​​ទម្លាក់​ថ្លៃប៉ុន្មានថ្ងៃមុននៅទិញតម្លៃ ៣៣៥ រៀល ម្សិលមិញទិញ ៣១០ រៀល ហើយថ្ងៃ​នេះ អាចធ្លាក់នៅ ក្រោម ៣០០ រៀល។

តារាងតម្លៃដំឡូងមីស្រស់របស់រោងចក្រប្រកាសនៅថ្ងៃទី ២៧ ខែមីនានេះ បង្ហាញថា ដំឡូងមីស្រស់ដែលមានភាគរយម្សៅ ២៨ ទៅ ៣០ ភាគរយ តម្លៃ ២៩៥ រៀល ភាគរយម្សៅ ២៤ ទៅ ២៧ តម្លៃ ២៩០ រៀល ភាគរយម្សៅ ២១ ដល់ ២៣ តម្លៃ ២៨៥ រៀល នឹងទាបបន្តទៀតទៅតាមភាគរយម្សៅ។

លោក អិល ឈិញ បានណែនាំឱ្យកសិករកាត់ន្ថយការប្រមូលផល ព្រោះអំឡុងពេលនេះ បើយើ​ង​​ប្រមូលផល នៅតាមរោងចក្រស្ទះ ដំណើរការមិនទាន់ គេទិញទៅស្ដុកចោលដែរ។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅឆ្នាំ២០២៣ កម្ពុជានាំចេញដំឡូងមីស្រស់ ដំឡូមីក្រៀម និងម្សៅដំឡូងមី សរុបជាង៣លានតោន។

ក្នុងនោះនាំចេញដំឡូងមីស្រស់ជិត ២ លាន​តោន (១ ៩៦១ ៣៧៥) កើនឡើង ២៦ ភាគរយ, ចំណិតដំឡូងមីក្រៀមមានចំនួនជាង ១ លានតោន (១ ២៨៩ ៧៣៩.០៤) ធ្លាក់ចុះ ៣៧.៦៤% និងម្សៅដំឡូងមីមានចំនួន ៣៦ ២៥៦.៨០តោន ធ្លាក់ចុះ៤៥.៣៩%៕

អត្ថបទ៖ ឡេង ដេត