សេដ្ឋកិច្ច

កម្ពុជានាំចេញគ្រាប់ស្វាយចន្ទីជិត ៥០ ម៉ឺនតោន ក្នុងរយៈពេល ៤ ខែ

បានផុស

២ years មុន

នៅ

ថ្ងៃសុក្រ ៣ ឧសភា ២០២៤

ដោយ

នៅក្នុងរយៈពេល ៤ ខែ ចាប់ពីខែមករា ដល់ខែមេសា ដើមឆ្នាំ ២០២៤ ការនាំចេញគ្រាប់ស្វាយចន្ទីបានជិត ៥០ ម៉ឺនតោន (៤៩៤ ០០៨) មានការកើនឡើងទ្វេដង បើប្រៀបធៀបរយៈពេលដូចគ្នាកាលពីឆ្នាំមុន ដែលមានចំនួន ២៨៥ ៣២២ តោន។ នេះបើយោងតាមរបាយការណ៍របស់នាយកដ្ឋានរដ្ឋបាល ផែនការ គណនេយ្យ និងសហប្រតិបត្តិការអន្តរជាតិ នៃអគ្គនាយកដ្ឋានកសិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អួន ស៊ីឡុត ប្រធានសមាគមស្វាយចន្ទីកម្ពុជា ប្រាប់កម្ពុជាថ្មីនៅថ្ងៃទី ០៣ ខែឧសភា ឆ្នាំ ២០២៤ នេះថា កម្ពុជានាំចេញគ្រាប់ស្វាយចន្ទីស្វាយចន្ទីស្ទើតែ ៩០ ភាគរយ ទៅប្រទេសវៀតណាម និងឥណ្ឌា (ភាគរយតិចតូច)។

លោកថា បច្ចុប្បន្ន បាតុភូត អេលីណូ បានធ្វើឱ្យខូចខាតធ្ងន់ធ្ងរ ដល់ដំណាំស្វាយចន្ទីនៅក្នុងប្រទេសឥណ្ឌា ដូច្នេះឥណ្ឌាត្រូវការនាំចេញពីកម្ពុជា ប៉ុន្តែឥណ្ឌាមានតម្រូវការតែគ្រាប់ចន្ទីតូច ខណៈកម្ពុជាផលិតបានគ្រាប់ M23។ លោកថា ដោយសារតែការប្រជែងទិញពីឥណ្ឌា ទើបគ្រាប់ចន្ទីឡើងថ្លៃបន្តិច។

តម្លៃគ្រាប់ស្វាយចន្ទីសើម បានហក់ឡើងដល់ជាង ៥ ០០០ រៀល ក្នុងមួយគីឡូក្រាម ដែលជាតម្លៃខ្ពស់ជាងគេនៅក្នុងរយៈពេល ១៥ ឆ្នាំ។ ចំណែកគ្រាប់ស្ងួតមានតម្លៃ ១ ៥០០ ដុល្លារ ក្នុង១ តោន។

យោងតាមរបាយការណ៍របស់សមាគមស្វាយចន្ទីកម្ពុជាបង្ហាញថា នៅក្នុងរយៈពេល ៣ ខែ ឆ្នាំ ២០២៤ កម្ពុជាផលិតគ្រាប់ស្វាយចន្ទីឆៅជាង ៤០ ម៉ឺនតោន (៤៧៤ ០០០) ក្នុងនោះនាំចេញទៅវៀតណាមចំនួន ៤២៤ ០០០ តោន គិតជាទឹកប្រាក់ ៥៤៣ លានដុល្លារ កើនឡើង ១៣% បើធៀបនឹងរយៈពេលដូចគ្នានៅឆ្នាំ ២០២៣។

នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារអន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២៕