​ក្រុមហ៊ុនកែច្នៃស្វាយចន្ទី Ample ដាក់ផែនការនាំទៅអាមេរិក ​អឺរ៉ុប និងចិន

ក្រុមហ៊ុន Ample Agro Product ដែល​ជា​ក្រុមហ៊ុន​វិនិយោគ​លើ​ផលិតកម្មស្វាយចន្ទី មានសមត្ថភាព​ផលិតស្វាយចន្ទីប្រមាណ ១ ០០០ តោន ​ក្នុងមួយឆ្នាំមានផែនការនាំចេញទៅកាន់ទីផ្សារអាមេរិក និងអឺរ៉ុប ខណៈដែលតម្រូវការកំពុងមានកំណើន។​

​អ្នកស្រី ឡេង សុខហ៊ាង ប្រធានផ្នែកទីផ្សារ ​មានប្រសាសន៍ថា ក្រុមហ៊ុន Ample Agro Product មានរោងចក្រកែច្នៃស្វាយចន្ទីពាក់កណ្ដាលសម្រេច នៅខេត្តកំពង់ធំ និងរោងចក្រកែច្នៃផលិតផល​សម្រេចនៅរាជធានីភ្នំពេញដែល​ ក្រុមហ៊ុននេះ ​មានសមត្ថភាពផលិតគ្រាប់ស្វាយចន្ទីបាន ៥ តោន ក្នុងមួយថ្ងៃ ​និង ១ ០០០ តោន ក្នុងមួយឆ្នាំ ​ហើយអាចនឹងផលិតបានគុណនឹង ៣ ប្រសិនបើ​មាន​តម្រូវការបញ្ជាទិញច្រើន។​

បើតាម អ្នកស្រី ឡេង សុខហ៊ាង នៅឆ្នាំ ២០២៤នេះ ទីផ្សារស្វាយចន្ទី មានការគាំទ្រច្រើន ​ហើយ​ក៏មានការ​សហការពីក្រសួង​កសិកម្ម រុក្ខាប្រមាញ់ និងនេសាទ ដែលបានគាំទ្រលើវិស័យ​ឯកជន ខណៈការនាំចេញផលិតផលសម្រេចទៅទីផ្សារអន្តរជាតិក៏មានសន្ទុះ។

ក្រុមហ៊ុន អ្នកស្រី​នាំចេញទៅកូរ៉េ ជប៉ុន ​និងអូស្ត្រាលី ហើយអនាគត ​ក្រុមហ៊ុនកំពុងសម្លឹងមើលការ​នាំ​ចេញទៅ សហ​គមនអឺរ៉ុប សហរដ្ឋអាមេរិក អង់គ្លេស ​និងចិន។

នៅក្នុងរយៈពេល៥ខែឆ្នាំ២០២៤ កម្ពុជាផលិតគ្រាប់ស្វាយចន្ទីឆៅសម្រេចបាន ៧១ ម៉ឺន ៦ ពាន់តោន ​ក្នុងនោះនាំចេញទៅប្រទេសវៀតណាមចំនួន ៦៦ ម៉ឺន ៧ ពាន់តោន ​កើនឡើងជាង ៣០ ភាគរយ ​បើប្រៀប​ធៀបរយៈពេលដូចគ្នាកាលពីឆ្នាំមុន ​ដែលគិតជាទឹកប្រាក់ចំនួន ៨៥១ លានដុល្លារ។ នេះបើតាមរបាយការណ៍​របស់​សមាគមស្វាយចន្ទីកម្ពុជា។

​លោក អួន ស៊ីឡុត ​ប្រធានសមាគមស្វាយចន្ទីកម្ពុជា ​បានឱ្យដឹងថា ​ទំហំផ្ទៃដីដាំស្វាយចន្ទីកើនឡើង ខណៈតម្លៃក៏កើន ​ដោយសារតែនៅទ្វីបអាហ្វ្រិកជួបបញ្ហាអាកាសធាតុឡើងកម្ដៅ ដែលធ្វើឱ្យទិន្នផល​ស្វាយចន្ទី​ថយចុះ ហើយប្រទេសកូឌីវ័រ ដែលជាប្រទេសផលិតស្វាយចន្ទីជាប់​លេខ១​លើពិភពលោក​បានផ្អាក​ការនាំចេញគ្រាប់ស្វាយចន្ទីបណ្ដោះអាសន្ន​ដើម្បីផ្គត់ផ្គង់រោងចក្រ​កែច្នៃក្នុងស្រុក ទើបធ្វើឱ្យ​តម្លៃស្វាយ​ចន្ទីហក់ឡើង។​ បច្ចុប្បន្ន​តម្លៃគ្រាប់ស្វាយចន្ទីស្ងួត​ ជាមធ្យម ​អាចលក់បាន ១ ៧៣០ ដុល្លារក្នុងមួយតោន។

នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២។ នេះបើតាមរបាយការណ៍សមាគមស្វាយចន្ទីកម្ពុជា៕

អត្ថបទ៖ ឡេង ដេត​