ក្រុមហ៊ុនចាប់ផ្ដើមចុះសិក្សា ប្រមូលទិញផ្លែមៀនប៉ៃលិន នាំចេញទៅចិន

ក្រុមហ៊ុនវេចខ្ចប់ផ្លែមៀនប៉ៃលិនសម្រាប់នាំចេញទៅប្រទេសចិនមួយចំនួន បានចាប់ផ្ដើមចុះសិក្សាប្រមូលទិញផ្លែមៀនពីកសិករនៅមុនពេលរដូវប្រមូលផលហៀបនឹងមកដល់ក្នុងពេលដ៏ខ្លីខាងមុខនេះ។

លោក​ សួន ជុំ អនុប្រធានសមាគមមៀនប៉ៃលិនប្រាប់កម្ពុជាថ្មីនៅថ្ងៃទី ២២ ខែកក្កដា ឆ្នាំ ២០២៤ នេះថា មានក្រុមហ៊ុនមួយមកពីភ្នំពេញមកសិក្សា នៅខេត្តប៉ៃលិន និងបាត់ដំបង ប៉ុន្តែមិនទាន់មានការជូនដំណឹង ឬធ្វើកិច្ចសន្យានៅឡើយនោះទេ ខណៈមានឃ្លាំងមួយនៅប៉ៃលិនបានទិញដែរ ប៉ុន្តែមិនទាន់ហ៊ានទម្លាក់ប្រាក់កក់ច្រើន។

លោក សួន ជុំ បញ្ជាក់ថា បច្ចុប្បន្នមៀនប៉ៃលិនទើបតែចេញផ្កា ដែលគ្រោងប្រមូលផលនៅក្នុងខែសីហាខាងមុខ ដែលតាមការសង្កេតរបស់លោក ទិន្នផលឆ្នាំនេះ នឹងមានភាពល្អប្រសើរ ខណៈតម្លៃចាប់ពី ៤០០០ រៀលក្នុងមួយគីឡក្រាម។

ការនាំចេញផ្លែមៀនស្រស់របស់កម្ពុជាទៅទីផ្សារអន្តរជាតិ សម្រេចបានជាង ១ ម៉ឺន ៤ ពាន់តោន នៅក្នុងឆមាសទី០១ ឆ្នាំ ២០២៤ កើនឡើងជាង ១២០ ភាគរយ បើធៀបនឹងរយៈ​ពេលដូច​គ្នា​កាល​​ពីឆ្នាំមុន។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។

នៅក្នុងឆមាសទី១ ឆ្នាំ ២០២៤នេះ កម្ពុជាបានធ្វើការនាំចេញផ្លែមៀនប៉ៃលិនក្នុងទំហំទឹកប្រាក់ប្រមាណ ២២ លានដុល្លារ ការកើនឡើង ១២៩ ​ភាគរយ ​បើធៀបនឹងរយៈពេលដូចគ្នាកាលពីឆ្នាំមុន។ នេះ​បើតាមរបាយការណ៍របស់អគ្គនា​យកដ្ឋាន​គយ ​និងរដ្ឋាករកម្ពុជា។​

នៅក្នុងឆ្នាំ២០២៣ កម្ពុជាបាននាំចេញផ្លែមៀន​ស្រស់​មានបរិមាណសរុបជាង ១៧ ៤៩៧ តោន គិតជាទឹកប្រាក់សរុបចំនួន ២៤ ៧៥ ​លានដុល្លារ៕

អត្ថបទ៖ ឡេង ដេត