​ខេត្ត​បាត់ដំបង​មាន​ផ្ទៃដីដាំដុះមៀនប៉ៃលិន​​ជាង ៦ ពាន់ហិកតា ខណៈអាជ្ញាធរ​​​រក​ដៃគូវិនិយោគ​​រោងចក្រកែច្នៃបន្ថែម

លោក ហេង សិទ្ធ មន្ត្រីទទួលបន្ទុកការិយាល័យស្ថិតិនៃមន្ទីរកសិកម្មខេត្តបាត់ដំបងបានឲ្យដឹងថា ដំណាំមៀនប៉ៃលិនត្រូវ​បាន​កសិករដាំដុះស្ទើរគ្រប់ស្រុក​ក្នុង​ខេត្ត​បាត់ដំបង គ្រាន់តែស្រុកខ្លះដាំច្រើនហើយស្រុកខ្លះដាំតិច ខណៈនៅ​ក្នុងស្រុក រតន:មណ្ឌលមានការ​ដាំដុះច្រើនជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សិទ្ធ បន្ត​ថា ខេត្តបាត់ដំបងមានផ្ទៃដីដែលកសិករដាំដុះមៀនប៉ៃលិន​សរុបមាន​ប្រមាណជាង ៦ ០០០ ហិកតា។

ក្នុង​ឱកាស​ចុះ​ពិនិត្យចម្ការមៀនប៉ៃលិន​របស់កសិករនៅក្នុងស្រុករតន:មណ្ឌលកាលពីពេលថ្មីៗនេះ លោក ឈឹម វិច្ចរា ប្រធានមន្ទីរកសិកម្មខេត្តបាត់ដំបងបានឲ្យ​ដឹង​ថា​ ដំណាំមៀនប៉ៃលិន (តាង៉ែន) របស់កសិករនៅឆ្នាំនេះ បានហុចផលតាមការរំពឹងទុក។ ក្រោយ​មាន​ការណែនាំបច្ចេកទេសក្នុងការដាំដុះនិងថែទាំពីមន្ត្រីជំនាញ ​ជំរុញឲ្យទិន្នផលទទួលបានបរិមាណខ្ពស់ និងប្រកបដោយគុណភាពអនាម័យសម្រាប់ធ្វើការនាំចេញ​ទៅ​ក្រៅប្រទេស។

លោក ឈឹម វិជ្ជរ៉ា បាន​បញ្ជាក់ថា ក្រោយពីលោកបានចុះពិនិត្យនិងសិក្សាលើចម្ការមៀនប៉ៃលិនរបស់កសិករ​ក្នុងស្រុករតន:មណ្ឌល លោកនឹងរកដៃគូដើម្បីធ្វើការវិនិយោគសាងសង់កន្លែងកែច្នៃ វេចខ្ចប់ មៀនប៉ៃលិន ដើម្បីនាំចេញទៅប្រទេសចិន ក្រៅពីតម្រូវការលើទីផ្សារក្នុងស្រុក ដើម្បីបង្កើនដល់សេដ្ឋកិច្ចគ្រួសាររបស់ប្រជាកសិករឲ្យកាន់តែប្រសើរថែមទៀត៕

អត្ថបទ÷សៅ សារិទ្ធ