ក្រសួងអំពាវនាវឱ្យកសិករព្រោះស្រូវ​សែនក្រអូប បន្ទាប់ពី​ឈ្នះពានមាសពីប្រទេសចិន

ក្រសួងកសិកម្ម រុក្ខាប្រមាញ់ និងនេសាទ បានលើកទឹកចិត្តប្រជាកសិករឱ្យងាកមកដាំ​ពូជស្រូវ​សែន​​​ក្រអូប០១ ដោយសារ​ពូជនេះ ផ្ដល់ទិន្នផលខ្ពស់ និងមានតម្លៃនៅលើទីផ្សារ។

សែនក្រអូប០១ គឺជាពូជស្រូវស្រាល មិនប្រកាន់រដូវ ដែលបន្សុទ្ធ និង​បញ្ចេញដោយ​វិទ្យាស្ថាន​ស្រាវ​ជ្រាវ និងអភិវឌ្ឍន៍កសិកម្មកម្ពុជា (កាឌី) នៃក្រសួងកសិកម្ម រុក្ខាប្រមាញ់ និងនេសាទ នៅ​ចុង​ឆ្នាំ​២០១៩។

នៅចុងឆ្នាំ២០២៣ ពូជស្រូវសែនក្រអូប០១ បានទទួលពានរង្វាន់មាសពីប្រទេសចិន ដោយសារ​លក្ខណៈ​ពិសេស​ ដូចជា ក្លិនក្រអូប គុណភាពអង្ករល្អ វែងរលូន និងបាយទន់ឆ្ងាញ់ពិសារ។

កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រោងម៉ាស៊ីនកិនស្រូវ និងសហព័ន្ធស្រូវអង្ករប្ដេជ្ញាលើកកម្ពស់ស្រូវប្រភេទនេះ ដោយទទួលទិញពីប្រជាកសិករក្នុងតម្លៃខ្ពស់ជាងពូជស្រូវផ្សេងៗ។

បច្ចុប្បន្ន ស្រូវសែនក្រអូបមានតម្លៃខ្ពស់ជាងឆ្នាំមុន ដែលអាចលក់បានជាង ១៤០០ រៀល ក្នុងមួយគីឡូក្រាម ឡើងពី ១២០០ រៀល កាលពីឆ្នាំមុន។

អង្ករម៉ាកសមូហភាព SKO ដែលផលិតចេញពីពូជស្រូវសែនក្រអូបនៅក្នុងឆ្នាំ២០២៣ ត្រូវបាន​ឈ្នះ ពានរង្វាន់មាស នៅក្នុងកម្មវិធីវាយតម្លៃគុណភាព រសជាតិប្រភេទអង្ករស​គ្រាប់វែង​ចិន-អាស៊ាន លើកទី១ (1st China-ASEAN Taste Quality Appraisal Activities of High-Quality Indica Rice Variety)។

អង្ករម៉ាកសមូហភាព SKO ដែលមានពូជស្រូវឈ្មោះសែនក្រអូប (SEN KRA-OB) ត្រូវបាន​ទទួល​ស្គាល់ដោយ គណៈកម្មាធិការប្រកួត ជាពូជស្រូវល្អ និងមានរសជាតិឆ្ងាញ់ ព្រមទាំងឈ្នះ​ពានរង្វាន់មាស ក្នុងចំណោមពានរង្វាន់មាសរបស់ពូជស្រូវរបស់ប្រទេសផ្សេងទៀត។

សូមបញ្ជាក់ផងដែរថា៖ ពូជស្រូវសែនក្រអូបជាពូជស្រូវមិនប្រកាន់រដូវដែលដែលត្រូវបានដាំដុះ ដោយ​ប្រជាកសិករតាំងពីពាក់កណ្តាលទស្សវត្ស៩០  ដើម្បីឆ្លើយតបទៅកាន់ទីផ្សារ ក្រសួង​កសិកម្ម រុក្ខាប្រមាញ់ និងនេសាទបានរៀបចំឱ្យមានពូជស្រូវសែន​ក្រអូបមួយច្បាស់​លាស់​ ឆ្លង​តាម​ការ​​សិក្សានិងកិច្ចខិតខំរបស់អ្នកវិទ្យាសាស្ត្រស្រូវនៃវិទ្យាស្ថានស្រាវជ្រាវ និងអភិវឌ្ឍន៍កសិកម្ម​កម្ពុជា បានសម្រាំងឡើងដោយជម្រើសឯកទត្តចេញពីពូជស្រូវក្រអូបផ្សេងៗ រហូតទទួលបានពូជ​ស្រូវ​សែនក្រអូបមួយដែលល្អ ហើយត្រូវបានប្រកាសដាក់ឱ្យប្រើប្រាស់​ជាផ្លូវការ​នៅក្នុង​ឆ្នាំ២០១៩ ក្រោមឈ្មោះជាផ្លូវការថា «សែនក្រអូប ០១»៕