ក្រុមហ៊ុន Mirarth ត្រៀមបំពាក់បច្ចេកវិទ្យាចុងក្រោយដំណើរ​ការសាកល្បងកៀបយក​ប្រេង​ពីសំបក​ស្វាយ​ចន្ទី

លោក អួន ស៊ីឡុត ប្រធានសមាគមស្វាយចន្ទីកម្ពុជា នៅថ្ងៃទី ០៨ ខែតុលា ឆ្នាំ ២០២៤ បាន​ជួប​ប្រជុំជាមួយវិស្វករជប៉ុន របស់ក្រុមហ៊ុន Mirarth និយាយពីបច្ចេកវិទ្យាកៀប​យក​ប្រេង​ពី​សំបក​ចន្ទី​ និងសំណល់ចុងក្រោយ។

លោក អួន ស៊ីឡុត ប្រាប់កម្ពុជាថ្មី នៅថ្ងៃទី ០៩ ខែតុលា ឆ្នាំ ២០២៤ នេះថា បច្ចេកវិទ្យាបច្ចុប្បន្ន​ររបស់​ពិភពលោក​ ដំ​ណើរ​ការកៀបយកប្រេងត្រូវឆ្លង៥ដំណាក់កាល ប៉ុន្តែបច្ចេកវិទ្យាចុងក្រោយរបស់ជប៉ុនធ្វើតែមួយដំណាក់កាលប៉ុនណោះ ដែលជាការកាត់បន្ថយ​ថ្លៃដើមផលិតដ៏ច្រើន។ គម្រោងសាកល្បងនេះត្រូវបានក្រុមហ៊ុនគ្រោងដាក់ឱ្យសាកល្បង នាឆ្នាំ ២០២៥ នៅខេត្តកំពង់ធំ។

កន្លងមកមាន​តែក្រុមហ៊ុន Santana Agro Products មួយបានដំឡើងម៉ាស៊ីនកៀប​យក​ប្រេង​ពី​សំបក​ចន្ទី ប៉ុន្តែមិនបានដំណើរការ ខណៈកម្ពុជានៅមានម្រិតក្នុងការកែច្នៃទើបទទួល​បានសំបកតិច​។

លោក អួន ស៊ីឡុត បានឱ្យដឹងទៀតថា ក្រុមហ៊ុនរបស់ប្រទេសជប៉ុន គឺ ក្រុមហ៊ុន​​​មីស៊ុយប៊ីស៊ី (Mitsubishi)​ ក៏ចង់​បើក​រោងចក្រកៀបប្រេង ដែលមានគោលដៅកែច្នៃ​សំបកឱ្យបាន ៥ ពាន់តោន ក្នុងមួយឆ្នាំ ប៉ុន្តែសមាគមមិនអាចកៀរគរសំបកឱ្យក្រុមហ៊ុនបាន ទើបក្រុមហ៊ុនមិន​ទាន់បើក​រោងច្រ។

សម្រាប់ផ្លែស្វាយចន្ទី៥តោន គឺនៅសល់គ្រាប់គ្រាប់ឆៅចំនួន១តោន ហើយបើយកទៅបកនៅសល់សំបក ៧៥០ គីឡូក្រាម និងសាច់ ២៥០ គីឡូក្រាម ដែលអាចទទួលទានបាន៕

អត្ថបទ៖ ឡេង ដេត