ព័ត៌មានអន្ដរជាតិ

សេដ្ឋកិច្ចចិនទំនងនឹងកើន ៤,៨ ភាគរយ ឆ្នាំនេះ តិចជាងគោលដៅរដ្ឋាភិបាល

បានផុស

២ years មុន

នៅ

ថ្ងៃពុធ ១៦ តុលា ២០២៤

ដោយ

របាយការណ៍ស្ទង់មតិសេដ្ឋវិទូរបស់ទីភ្នាក់ងារសារព័ត៌មានរ៉យទ័រ បានរកឃើញថា សេដ្ឋកិច្ចចិនទំនងនឹងកើនឡើង ៤,៨ ភាគរយ នៅឆ្នាំ ២០២៤ ពោលគឺតិចជាងគោលដៅ ៥ ភាគរយ របស់រដ្ឋាភិបាល ដោយបន្តដាក់សម្ពាធលើអ្នកបង្កើតនយោបាយ ដែលកំពុងពិចារណាលើការបញ្ចេញវិធានការជំរុញសេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណើនសេដ្ឋកិច្ចចិនរំពឹងថា នឹងកើនឡើង ៤,៥ ភាគរយ នៅត្រីមាសទី៣ ធៀបនឹងរយៈពេលដូចគ្នាកាលពីឆ្នាំមុន ដោយធ្លាក់ចុះពីកំណើន ៤,៧ ភាគរយ នៅត្រីមាសទី២ ហើយវាក៏ជាកម្រិតខ្សោយបំផុតរាប់តាំងពីត្រីមាសទី១ ឆ្នាំ ២០២៣ ផងដែរ។ នេះបើតាមការស្ទង់មតិ ដែលធ្វើឡើងចន្លោះពីថ្ងៃពី ២៧ កញ្ញា និង ១៥ តុលា។

ការស្ទង់មតិក៏បានព្យាករផងដែរថា កំណើនសេដ្ឋកិច្ចចិន នឹងធ្លាក់ចុះបន្តទៀតនៅត្រឹម ៤,៥ ភាគរយ នៅឆ្នាំ ២០២៥ ខាងមុខ។

លទ្ធផលស្ទង់មតិចុងក្រោយនេះ បង្ហាញពីទស្សនវិស័យទុទិដ្ឋិនិយមពីសេដ្ឋវិទូជាច្រើនរូប បើប្រៀបធៀបទៅនឹងការស្ទង់មតិកាលពីលើកមុនក្នុងខែកក្កដា ដែលសេដ្ឋវិទូបានព្យាករថា ចិននឹងមានកំណើនសេដ្ឋកិច្ចប្រមាណ ៥ ភាគរយ។ បើតាមរ៉យទ័រ ក្នុងចំណោមសេដ្ឋវិទូដែលត្រូវបានស្ទង់មតិ ៧៥ នាក់ មាន ៥៧ ភាគរយ ក្នុងនោះបានទម្លាក់ការព្យាកររបស់ខ្លួន ខណៈមានតែ ៣២ ភាគរយ ប៉ុន្តែដែលមិនផ្លាស់ប្ដូរការព្យាករ។

រាប់តាំងតែពីចុងខែកញ្ញាមក អាជ្ញាធរចិនបានបង្កើនការជំរុញគោលនយោបាយសេដ្ឋកិច្ចរបស់ខ្លួនយ៉ាងសស្រាក់សស្រាំ ក្នុងគោលបំណងដើម្បីស្តារសេដ្ឋកិច្ចឡើងវិញ ហើយធានាថា កំណើនសេដ្ឋកិច្ចនឹងឈានដល់គោលដៅរបស់រដ្ឋាភិបាល ក្នុងរង្វង់ ៥ ភាគរយ នៅឆ្នាំនេះ។ សេដ្ឋវិទូលើកឡើងថា កម្សោយតម្រូវការនៅតែជាបញ្ហាដ៏ធំ ដែលធ្វើឱ្យសម្ពាធបរិត្តផរណាបន្តកើតមាន។

គួរគូសបញ្ជាក់ថា ចិន ដែលកម្រនឹងបរាជ័យលើការសម្រេចបានកំណើនសេដ្ឋកិច្ចគោលដៅ បានកត់ត្រាពីកំណើនទាបជាងគោលដៅនៅឆ្នាំ ២០២២ នៅពេលដែលវិបត្តិកូវីដទម្លាក់អត្រាកំណើនមកត្រឹម ៣ ភាគរយ ដោយតិចជាងគោលដៅក្នុងរង្វង់ ៥,៥ ភាគរយ៕