ព័ត៌មានអន្ដរជាតិ

EIA៖ បរិមាណនៃការនាំចូលប្រេងឆៅរបស់អាមេរិក នឹងធ្លាក់ចុះជាគំហុកនៅឆ្នាំក្រោយ

បានផុស

២ years មុន

នៅ

ថ្ងៃពុធ ១១ ធ្នូ ២០២៤

ដោយ

រដ្ឋបាលព័ត៌មានថាមពល (EIA) បានឱ្យដឹងកាលពីថ្ងៃអង្គារថា បរិមាណនៃនាំចូលប្រេងឆៅរបស់សហរដ្ឋអាមេរិក រំពឹងថានឹងធ្លាក់ចុះ ២០ ភាគរយ នៅឆ្នាំក្រោយ ត្រឹម ១,៩ លានបារ៉ែល/ថ្ងៃ ដែលវាជាកម្រិតទាបបំផុតចាប់តាំងពីឆ្នាំ ១៩៧១ ដោយសារតែកំណើនផលិតកម្មក្នុងស្រុក និងតម្រូវការរោងចក្រចម្រាញ់ទាប។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

EIA និយាយក្នុងទស្សនវិស័យថាមពលរយៈពេលខ្លីប្រចាំខែធ្នូ (STEO) ថា សហរដ្ឋអាមេរិកនឹងផលិតប្រេងបាន ១៣,៥២ លានបារ៉ែល/ថ្ងៃ ក្នុងឆ្នាំ ២០២៥ ដោយកើនឡើងពី ១៣,២៤ លានបារ៉ែល/ថ្ងៃ នៅឆ្នាំ ២០២៤។

ទន្ទឹមនឹងនេះ រដ្ឋបាលបន្តថា ក្រុមហ៊ុនចម្រាញ់ប្រេងរបស់អាមេរិក គ្រោងនឹងដំណើរការប្រេងឆៅចំនួន ១៦ លានបារ៉ែល/ថ្ងៃ នៅឆ្នាំ ២០២៥ ធ្លាក់ចុះ ២០០ ០០០ បារ៉ែល/ថ្ងៃ ធៀបនឹងឆ្នាំនេះ។

EIA បាននិយាយថា ការថយចុះនៃការដំណើរការរោងចក្រចម្រាញ់ បានរួមចំណែកដល់ការធ្លាក់ចុះនៃការនាំចូលប្រេងឆៅក្នុងឆ្នាំ ២០២៥។ ជាមួយគ្នានេះ គោលនយោបាយរបស់ប្រធានាធិបតីជាប់ឆ្នោត លោក ដូណាល់ ត្រាំ ក្នុងការដាក់ពន្ធនាំចូល ២៥ ភាគរយ លើគ្រប់ផលិតផលទាំងអស់ពីប្រទេសកាណាដា និងម៉ិកស៊ិក រួមទាំងប្រេងឆៅ អាចកាត់បន្ថយការនាំចូលប្រេងឆៅរបស់សហរដ្ឋអាមេរិកថែមទៀត។

ចំណែកឯទស្សនវិស័យសកលវិញ EIA បានព្យាករថា តម្រូវការប្រេងសកលរំពឹងថានឹងមានជាមធ្យមប្រហែល ១០៤,៣ លានបារ៉ែល/ថ្ងៃ នៅឆ្នាំក្រោយ ដោយធ្លាក់ចុះពីការព្យាករ ១០៤,៤ លានបារ៉ែល/ថ្ងៃ កាលពីលើកមុន៕