ព័ត៌មានអន្ដរជាតិ

តើមីស៊ីល AGM-114R Hellfire របស់អាមេរិក លក់ឱ្យសិង្ហបុរី មានចំណុចពិសេសអ្វីខ្លះ?

បានផុស

៣ នាទី មុន

នៅ

ថ្ងៃសុក្រ ៣ កក្កដា ២០២៦

ដោយ

មីស៊ីល AGM-114R Hellfire របស់សហរដ្ឋអាមេរិក លក់ឱ្យសិង្ហបុរី គឺជាមីស៊ីលដឹកនាំដោយឡាស៊ែរដ៏មានប្រសិទ្ធភាព បង្ហាញឱ្យឃើញពីភាពជាក់លាក់ខ្ពស់នៅក្នុងសមរភូមិ។ មីស៊ីលនេះត្រូវបានបំពាក់ដោយឧទ្ធម្ភាគចក្រ AH-64D Apache របស់កងទ័ពអាកាសសាធារណរដ្ឋសិង្ហបុរី(RSAF) វាផ្តល់នូវសមត្ថភាពក្នុងការកំណត់គោលដៅយ៉ាងមានប្រសិទ្ធភាព ជាមួយនឹងការខូចខាតតិចតួច។

ថ្មីៗនេះ ប្រទេសសិង្ហបុរីបានពង្រីកស្តុកអាវុធរបស់ខ្លួន ដោយទិញមីស៊ីល AGM-114R សរុបចំនួន ៦៧គ្រាប់ តាមរយៈកញ្ចប់លក់អាវុធយោធាបរទេសរបស់សហរដ្ឋអាមេរិក។

មីស៊ីល AGM-114R Hellfire របស់សហរដ្ឋអាមេរិក។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

+ យោងតាមសារព័ត៌មានរបស់សិង្ហបុរី CNA មានកត្តាសំខាន់ៗ ដែលកំណត់ប្រសិទ្ធភាពនៃមីស៊ីលនេះដូចជា៖

១. ភាពបត់បែនពហុបេសកកម្ម៖ មីស៊ីលប្រភេទ R ឬហៅថា Romeo Hellfire មានលក្ខណៈពិសេសគឺឧបករណ៍ស្វែងរកឡាស៊ែរពាក់កណ្តាលសកម្ម(SAL) និងក្បាលគ្រាប់ពហុគោលដៅ។ មុខងារនេះអនុញ្ញាតឱ្យមីស៊ីលវាយប្រហាររថក្រោះពាសដែកធ្ងន់ រចនាសម្ព័ន្ធរឹង កងកម្លាំង និងទូកតូចៗដែលធ្វើដំណើរលឿនដោយមិនចាំបាច់ប្តូរប្រភេទក្បាលគ្រាប់ នៅក្នុងសមរភូមិឡើយ។

២. ការកំណត់គោលដៅដ៏ជាក់លាក់៖ ប្រព័ន្ធ AGM-114R ប្រើប្រាស់គន្លងឡើងលើដឹកនាំដោយប្រព័ន្ធកំណត់គោលដៅរបស់ឧទ្ធម្ភាគចក្រ Apache ឬដោយកងកម្លាំងដីគោក ធានាបាននូវភាពត្រឹមត្រូវខ្ពស់ និងកាត់បន្ថយហានិភ័យនៃការខូចខាតបន្ថែម។

៣. ការរួមបញ្ចូលជាមួយកងកម្លាំង RSAF៖ ឧទ្ធម្ភាគចក្រ Apache របស់សិង្ហបុរីប្រើប្រាស់រ៉ាដាគ្រប់គ្រងការបាញ់ឆ្ងាយ ជាមួយនឹងមីស៊ីលទាំងនេះ នឹងអនុញ្ញាតឱ្យក្រុមនាវិករកឃើញ ចាត់ថ្នាក់ និងវាយប្រហារគោលដៅកំពុងផ្លាស់ទីច្រើនក្នុងពេលដំណាលគ្នាបានយ៉ាងឆាប់រហ័ស ក្នុងបរិយាកាសប្រតិបត្តិការស្មុគស្មាញ ឬមានជម្លោះ។

៤. ការធ្វើទំនើបកម្មជាបន្តបន្ទាប់៖ ការអនុម័តថ្មីៗចំនួន ២២.៣លានដុល្លាររបស់ក្រសួងការបរទេសសហរដ្ឋអាមេរិក មិនត្រឹមតែរួមបញ្ចូលមីស៊ីលប៉ុណ្ណោះទេ ប៉ុន្តែថែមទាំងការសរសេរកម្មវិធីប្រព័ន្ធបាញ់មីស៊ីល M299 ឡើងវិញ ការផ្ទៀងផ្ទាត់កម្មវិធី និងការគាំទ្រគ្រឿងបន្លាស់ជាបន្តបន្ទាប់ផងដែរ។ ទាំងនេះធានាថាអាវុធរបស់ប្រទេសសិង្ហបុរី នៅតែធ្វើសមកាលកម្មជាមួយនឹងស្តង់ដារផ្នែករឹង និងសង្គ្រាមអេឡិចត្រូនិកចុងក្រោយបំផុត៕

សម្រួល៖ ណឺ មិនា