ការប្រែក្លាយ​ខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង ផ្តោតលើចង្កោមឧស្សាហកម្មចម្បង​ចំនួន ៤

ការប្រែក្លាយ​ខេត្តព្រះសីហនុ​ទៅ​ជា​តំបន់សេដ្ឋកិច្ចពិសេស​គំរូពហុបំណង ជាយុទ្ធសាស្រ្ត​ចម្បងមួយ​ដែល​ត្រូវបាន​កំណត់ នៅ​ក្នុងយុទ្ធសាស្ត្រ​បញ្ចកោណ-ដំណាក់កាលទី១ របស់​រាជ​រដ្ឋាភិបាល​នីតិកាល​ទៅ​៧។ ដើម្បីប្រែក្លាយទៅជាតំបន់សេដ្ឋកិច្ចពិសេសគំរូពហុបំណង ចង្កោម​ឧស្សាហកម្ម​ចំនួន ៤ ត្រូវបាន​ណែនាំ​ជា​ឧស្សាហកម្មចម្បងៗសម្រាប់​ខេត្តព្រះសីហនុ។ នេះបើតាមលោក ម៉ាង​ ស៊ីណេត អភិបាល​នៃ​គណៈ អភិបាល​ខេត្ត​ព្រះសីហនុថ្លែង​​នៅ​ក្នុង «​វេទិកា​វិនិយោគ​​ក្នុង​ខេត្ត​ព្រះសីហនុ» នា​ព្រឹក​ថ្ងៃ​ទី​១៧ ខែ​ធ្នូ ២០២៤។

លោក ម៉ាង​ ស៊ីណេត បាន​បញ្ជាក់ថា រាជរដ្ឋាភិបាល​កម្ពុជា បាន​ដាក់ផែនការ​ប្រែក្លាយខេត្តព្រះសីហនុ​ទៅជាទីក្រុង​អាស៊ាន និងតំបន់​សេដ្ឋកិច្ច​ពិសេស​គំរូពហុបំណង ដែល​មាន​ហេដ្ឋារចនាសម្ព័ន្ធ បច្ចេកវិទ្យា និង ការ​អភិវឌ្ឍ​ទីក្រុងប្រកប​ដោយចីរភាព គាំទ្រដោយ កម្លាំងពលកម្មដែលមានការប្រកួតប្រជែង សមត្ថភាព និងមានភាព ស្វាហាប់។

លោកបន្ត​ថា ខេត្តព្រះសីហនុ ដែល​អំណោយផលលើសក្តានុពលសេដ្ឋកិច្ច បានដាក់គោលដៅប្រែក្លាយទៅជាជាតំបន់សេដ្ឋកិច្ចពិសេសគំរូពហុបំណង ដោយ​ផ្តោតលើចង្កោម​ឧស្សាហកម្ម​ចំនួន ៤ ចម្បងរួមមាន៖

ចង្កោម​ឧស្សាហកម្ម​ទី១ គឺ វិ​ស័យ​ទេសចរណ៍ ដែល​រួម​បញ្ចូល​នូវ ការ​ដើរ​ទស្សនា រមណីយដ្ឋាន និងសណ្ឋាគារ ល្បែង ពាណិជ្ជកម្ម កិច្ចប្រជុំ ការ​លើកទឹកចិត្ត ពិពណ៌​ឧស្សាហកម្ម ឧស្សាហកម្មពាក់ព័ន្ធសោធននិវត្តន៍ និង​ការថែទាំសុខុមាលភាព ទេសចរណ៍។ វិស័យនេះ នឹង​តភ្ជាប់រវាងខេត្តព្រះសីហនុ ជា​មួយប្រទេសថៃ វៀតណាម និង តំបន់​ទេសចរណ៍​លំដាប់កំពូលរបស់​ប្រទេសកម្ពុជា ដូចជា​នៅខេត្តសៀមរាប ដើម្បី​បង្កើតជា​ផ្លូវទេសចរណ៍​អន្តរជាតិ។

ទិសដៅទី២ គឺ ចង្កោម​កសិ-ឧស្សាហកម្ម ដើម្បី​សម្រួល​ដល់​ការទំនើបកម្មវិស័យកសិកម្ម ការចិញ្ចឹមសត្វ និង ការ នេសាទ​នៅតំបន់ជុំវិញ។

ចង្កោមទី៣ គឺ ការផលិតកម្រិតខ្ពស់ ។ ចង្កោមនេះ នឹងធ្វើឱ្យ​ប្រសើរឡើងនូវឧស្សាហកម្មកាត់ដេរ និងវាយនភណ្ឌ ដែល មានស្រាប់ និង​ការអភិវឌ្ឍលើផលិតកម្មកម្រិតខ្ពស់ក្នុងវិស័យអេឡិចត្រូនិច រថយន្ត គ្រឿងបរិក្ខារ និង​គ្រឿង​ម៉ាស៊ីន ដោយ​បង្កើត ជា​សួនឧស្សាហកម្មទំនើប សម្រាប់ផលិតកម្មបច្ចេកវិទ្យាកម្រិតខ្ពស់។

ចង្កោម​ទី៤ គឺឧស្សាហកម្មផ្តល់​សេវាកម្មទំនើប ដែល​រួមបញ្ចូលនូវហិរញ្ញវត្ថុ ពាណិជ្ជកម្មអន្តរជាតិ និង​សេដ្ឋកិច្ចឌីជីថល​។ ចង្កោមនេះ គឺជាឧស្សាហកម្មប្រភេទថ្មី ដែល​ប្រទេសកម្ពុជា​ទទួល​បាន​នូវគុណ​សម្បត្តិ​រៀងៗខ្លួន ដើម្បី​​បង្កើត​ស្លាក​សញ្ញា​សេដ្ឋកិច្ច ពិសេសក្នុងតំបន់។

ខេត្ត​ព្រះសីហនុគឺជា​ទី​ក្រុង​កំពង់​ផែ​ធំ​ជាង​គេ ដែល​មាន​ការ​តភ្ជាប់​តាម​ផ្លូវ​អាកាស​ទាំង​កម្រិត​អន្តរជាតិ និង​តំបន់, ការ​ដឹក​ជញ្ជូន​ដោយ​កប៉ាល់ និង​ផ្លូវ​គោក។ មិន​តែ​ប៉ុណ្ណោះ ខេត្ត​មួយ​នេះក៏​កំពុង​ក្លាយ​ទៅ​ជា​ច្រក​ទ្វារ​អន្តរជាតិ​របស់​កម្ពុជា ក្នុង​ការ​បម្រើ​ជា​មជ្ឈមណ្ឌល​ពាណិជ្ជកម្ម​ និង​ការ​ដឹក​ជញ្ជូន​អន្តរជាតិ មជ្ឈមណ្ឌល​ដឹក​ជញ្ជូន​អន្តរ​មធ្យោបាយ​អន្តរជាតិ និង​មជ្ឈមណ្ឌល​ហិរញ្ញវត្ថុ​អន្តរជាតិ៕

​