កសិដ្ឋានចិញ្ចឹមគោយកទឹកដោះក្នុងស្រុកមូមូ ហ្វាមនឹងពង្រីកផលិតកម្មបន្ថែម ដើម្បីឆ្លើយតបនឹងតម្រូវការ

ដើមឆ្នាំ២០២៥នេះ កសិដ្ឋានចិញ្ចឹមគោយកទឹកដោះ មូមូ ហ្វាម បានពង្រីកខ្លួនកាន់តែធំជាងមុន និងអាចផលិតទឹកគោស្រស់សម្រាប់ផ្គត់ផ្គង់ទីផ្សារក្នុងស្រុកបានជាង ១ ៥០០លីត្រ ក្នុងមួយថ្ងៃ។

លោក យន់ សុផាត ម្ចាស់កសិដ្ឋានចិញ្ចឹមគោយកទឹកដោះ មូមូ ហ្វាម បានប្រាប់ កម្ពុជាថ្មី ថា​ សម្រាប់ដើមឆ្នាំ២០២៥នេះ កសិដ្ឋានរបស់លោកបានដាក់បន្ថែមគោយកទឹកដោះបន្ថែមទៀត ដែលសរុបទាំងអស់មានចំនួន១២០ក្បាល ក្នុងនោះគោដែលអាចផលិតទឹកដោះបានមានចំនួន៦០ក្បាល។

ម្ចាស់កសិដ្ឋានរូបនេះ បន្ថែមទៀតថា ទាក់ទងនឹងបរិមាណផលិតទឹកដោះគោស្រស់ បច្ចុប្បន្នកសិដ្ឋានរបស់លោក អាចផលិតទឹកដោះគោស្រស់បានប្រមាណជាង១៥០០លីត្រ ក្នុងមួយថ្ងៃ សម្រាប់នាំចេញទៅកាន់ផ្សារទំនើបនានា ក្នុងរាជធានីភ្នំពេញ និងបណ្ដាខេត្តមួយចំនួនក្នុងប្រទេសកម្ពុជា។

លោក យន់ សុផាត បានប្រាប់ឱ្យដឹងទៀតដែរថា សម្រាប់ទីផ្សារនាពេលបច្ចុប្បន្ន ទឹកដោះគោស្រស់កំពុងមានតម្រូវការខ្ពស់ តែអ្វីដែលពិបាកនោះគឺកសិដ្ឋាននានាក្នុងប្រទេសកម្ពុជា នៅពុំទាន់អាចមានលទ្ធភាពផលិតទឹកដោះគោស្រស់ក្នុងបរិមាណច្រើន ដើម្បីឆ្លើយតបទៅនឹងតម្រូវការទីផ្សារបាននៅឡើយ។

ដោយឡែកកសិដ្ឋាន ម៉ូម៉ូ ហ្វាម របស់លោកវិញ នៅពេលខាងមុខនេះ ក៏គ្រោងនឹងប្ដូរទីតាំងថ្មី និងពង្រីកខ្លួនឱ្យកាន់តែធំជាងមុន ដើម្បីធ្វើយ៉ាងណាអាចផលិតទឹកដោះគោស្រស់ សម្រាប់ផ្គត់ផ្គង់តម្រូវការទីផ្សារក្នុងស្រុកឱ្យកាន់តែសម្បូរបែបជាងនេះទៅទៀតផងដែរ។

កសិដ្ឋានចិញ្ចឹមគោយកទឹកដោះ មូមូ ហ្វាម មានទីតាំងស្ថិតនៅក្រុងអរិយក្សត្រ ខេត្តកណ្ដាល កសិដ្ឋានដែលមានទីតាំងទល់មុខនឹងរាជធានីភ្នំពេញនេះ បានបើកដំណើរចាប់តាំងពីឆ្នាំ ២០០៨ មកម្ល៉េះ បច្ចុប្បន្នមានផ្ទៃដីសរុបជាង ៦ហិកតា និងមានគោសរុបចំនួន១២០ក្បាល​ អាចផលិតទឹកគោស្រស់បានចំនួនជាង ១៥០០លីត្រ ក្នុងមួយថ្ងៃ៕

អត្ថបទ ៖ សួស សិត