ឧស្សាហកម្មកាត់ដេរបង់ក្លាដែសស្ទុះងើបឡើងវិញ ប៉ុន្តែកម្មករនៅតែជួបការលំបាកក្នុងជីវភាពប្រចាំថ្ងៃ

ស្ថិតនៅក្នុងរោងចក្រមួយដ៏ធំមួយនៅប្រទេសបង់ក្លាដែស ​ជាមួយនឹងម៉ាស៊ីនដេរ និងកម្មករ​ជាច្រើននាក់កំពុងញាប់ដៃញាប់ជើង មមាញឹកធ្វើការកាត់ដេរខោងអាវនានាដើម្បី​បំពេញ​តម្រូវការរបស់អតិថិ​​នៅទីផ្សារអឺរ៉ុប និងអាមេរិកខាងជើង ឧស្សាហកម្មផលិតសម្លៀកបំពាក់សំខាន់ៗរបស់ប្រទេសមួយនេះបានកំពុងតែផ្គត់ផ្គង់ម៉ាកយីហោល្បីៗលំដាប់ពិភពលោក ដែលឧស្សាហកម្មនេះត្រូវបានរងផលប៉ះពាល់យ៉ាងដំណំពីបដិវត្តន៍ដែលបានផ្តួលរំលំរដ្ឋាភិបាលកាលពីឆ្នាំមុន ដែលក្នុងនោះអ្នកតវ៉ាក្នុងវិស័យកាត់ដេរបានចូលរួមយ៉ាងផុលផុស​នៃការផ្តួល​រំលំនោះផងដែរ។

ជីវិតកាន់តែលំបាក

ខណៈពេលដែលម្ចាស់រោងចក្រ​ជាច្រើន​បានលើកឡើងថា ប្រ​តិបត្តិការផលិតកម្មរ​បស់​ពួកគេបានបើកដំណើការជាធម្មតាឡើងវិញក៏ពិតមែន ប៉ុន្តែសម្រាប់កម្មករដែលខកចិត្តនឹងលទ្ធ​ផលនៃការងារបែរជាបាននិយាយថា អ្វីៗដែលពួកគេបានខិតខំបំពេញការងារ​ហាក់នៅមានស្ថានភាពលំបាកសម្រាប់ជីវភាពរស់នៅប្រចាំថ្ងៃរបស់ពួកគេដូចមុនដដែល។

កម្មការិនី​កាត់ដេរម្នាក់សុំដាក់ឈ្មោះក្រៅ Khatun ដើម្បីរក្សាសុវត្ថិភាពការងារ ដែលមានអាយុ ២៤ ឆ្នាំ​បាន​និយាយមកាន់ AFP ​ថា​៖ «​វា​គឺ​ជា​ការ​កេងប្រវ័ញ្ច​[កំលាំង] ដូច​គ្នា​» ​។

សម្រាប់ផលិតកម្មនៅក្នុងរោងចក្រកាត់ដេរដ៏ធំជាងគេលំដាប់ទីពីររបស់ពិភពលោកនៃប្រទេសនេះត្រូវបានជាប់គាំងម្តងហើយម្តងទៀតដោយអំពើហិង្សារយៈពេលជាច្រើនខែ មុនពេលក្រុមបាតុករបានបង្ខំឱ្យលោក Sheikh Hasina ដែលជាមេដឹកនាំផ្តាច់ការបានរត់ភៀសខ្លួនកាលពីខែសីហាកន្លងមក។

រដ្ឋាភិបាលបណ្តោះអាសន្នមួយដឹកនាំដោយអ្នកឈ្នះរង្វាន់ណូបែលសន្តិភាពលោក គឺលោក Muhammad Yunus បានចូលកាន់តំណែង!

ទោះជាយ៉ាងណាក៏ដោយ ការតវ៉ាបានបន្តនៅឧស្សាហកម្ម​រោងចក្រកាត់ដេរ​ដោយទាមទារនូវលក្ខខណ្ឌល្អប្រសើរ និងប្រាក់ឈ្នួលកាន់តែច្រើន ដោយសារតែសមាគមរោងចក្រកាត់ដេររបស់ប្រទេសបង់ក្លាដែស និងអ្នកនាំចេញ (BGMEA) បានព្រមានកាលពីខែតុលាឆ្នាំមុនអំពីការខាតបង់ចំនួន ៤០០ លានដុល្លារនៅក្នុងឧស្សាហកម្មនេះ។

ជាមួយគ្នានេះដែរមានរោងចក្រជាច្រើនបានបិទទ្វារ បន្សល់ទុកនូវកម្មកររាប់ម៉ឺននាក់​បាត់បង់ការងារ។ ប៉ុន្តែបន្ទាប់ពីការដំឡើងប្រាក់៥ ភាគរយត្រូវបានព្រមព្រៀងគ្នាកាលពីខែកញ្ញា ឧស្សាហកម្មមួយនេះបានស្ទុះងើបឡើងវិញ។

​រោងចក្រ​ទាំងអស់បានបើក​ដំណើការឡើងវិញ

ថៅកែរោងចក្រកាត់ដេរ SM Khaled ដែលជាប្រធានក្រុមហ៊ុន Snowtex និងមានកម្មករចំនួន ២២​ ០០០ពាន់នាក់ បាននិយាយថា៖«រោងចក្រ​របស់យើងកំពុងតែដំណើរការបានល្អ» ។

សម្រាប់ប្រទេសបង់ក្លាដែស ទទួលបាននូវម៉ាកយីហោសំលៀកបំពាក់លំដាប់ពិភពលោកល្បីៗ ដោយរាប់ចាប់តាំងពីម៉ាកCarrefour របស់បារាំង; ម៉ាក Tire ​របស់កាណាដា; ម៉ាក Uniqlo របស់ជប៉ុន; ម៉ាក Primark របស់អៀរឡង់; H&M របស់ប្រទេសស៊ុយអែត; និង Zara របស់អេស្ប៉ាញ។

វិស័យឧស្សាហកម្មកាត់ដេររបស់ប្រទេសនេះមានចំនួនប្រហែល ៨០ ភាគរយនៃការនាំចេញសរុបរបស់ប្រទេសបង់ក្លាដែស ដែលរកចំណូលបាន៣៦ ពាន់លានដុល្លារកាលពីឆ្នាំមុន ដោយបានធ្លាក់ចុះតិចតួច ធៀបទៅនឹងតម្លៃ ៣៨ ពាន់លានដុល្លារកាលពីឆ្នាំ២០២៣។

លោក Khaled បាននិយាយថា៖«ខ្ញុំកំពុងធ្វើការជាមួយម៉ាកអន្តរជាតិយ៉ាងហោចណាស់ ១៥ ហើយផលិតផលរបស់យើងនឹងមានលក់នៅ ៥០ ប្រទេស» ។ «រោងចក្រកាត់ដេរស្ទើរតែទាំងអស់កំពុងដំណើរការ​ពេញទំហឹង បន្ទាប់ពីរលកនៃភាពចលាចល។ ហើយយើង​ស្ថិត​នៅ​លើផ្លូវ​មួយដែលកំពុងកើនឡើង»។

ទោះបីជាមានបញ្ហាប្រឈមជាមួយនឹងតម្រូវការធ្លាក់ចុះបន្តិចក៏ដោយ លោក Anwar Hossain អ្នកគ្រប់គ្រងដែលត្រូវបានតែងតាំងដោយរដ្ឋាភិបាលនៃ BGMEA បាននិយាយថា ឧស្សាហកម្មនេះកំពុងវិលទៅរកភាពរឹងមាំឡើងវិញ។

លោក Hossain បាននិយាយថា៖« បច្ចុប្បន្នការនាំចេញដ៏ច្រើនបំផុតរបស់ប្រទេសគឺ​ឧស្សាហកម្មកាត់ដែរនេះ»។​​

លោកបាននិយាយថា ឧស្សាហកម្មកាត់ដេរបានកត់ត្រាពីការកើនឡើង ១៣ ភាគរយចាប់ពីខែកក្កដាដល់ខែធ្នូ ឆ្នាំ ២០២៤ ដែលជារយៈពេលបន្ទាប់ពីបដិវត្តន៍ ​ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០២៣។

​«ប្រាក់ខែគោលពាក់កណ្តាលរបស់ខ្ញុំ»៖ ​កម្មករនិយោជិតលើកឡើងៗគ្នា​!

​អ្នកនាង Khatun បានស្វាគមន៍ចំពោះការដំឡើងប្រាក់ឈ្នួល ប៉ុន្តែបាននិយាយថា អ្នកគ្រប់គ្រងរោងចក្រ​បាន​ក៏បង្កើននូវទំហំការងារលំបាកជាងមុន ដែលធ្វើឱ្យពួកគេហាក់ពុំ​អាចផលិតសម្រេចទៅតាមគោលដៅ​ ។

​ដោយដើរកាត់នៅតំបន់ជាយក្រុងនៃទីក្រុងដាកាក្នុងតំបន់ Ashulia អ្នកនាង Khatun ទទួលបានប្រាក់ចំណួលចំនួន ១៤០ ដុល្លារក្នុងមួយខែ រួមទាំងប្រាក់បន្ថែមម៉ោង និងអត្ថប្រយោជន៍ផ្សេងទៀតសម្រាប់ផ្គត់ផ្គង់គ្រួសារដែលមានកូន ៤ នាក់។

​ការដំឡើងប្រាក់ឈ្នួល ៨,២៥ ដុល្លារក្នុងមួយខែហាក់ដូចជាការបន្ថែមដ៏តាន់តឹងមួយ!

​អ្នកនាង Khatun បានបើក​ដៃឱ្យ​មើលដោយនាងបានបង្ហាញក្រដាសប្រាក់ ៥០០ taka ដែលស្មើនឹងត្រឹមតែជាង ៥ ដុល្លារសិង្ហបុរីតែប៉ុណ្ណោះ ដែលនាងនៅសល់បន្ទាប់ពីបង់ថ្លៃជួលផ្ទះ និងចំណាយផ្សេងៗ។

អ្នក​ស្រី​បាន​បន្ត​ថា​៖ «​យើង​មាន​គ្រឿង​បរិក្ខារ​ល្អ​នៅ​ក្នុង​រោង​ចក្រ​ដូច​ជា បង្គន់​អនាម័យ អាហារដ្ឋាន និង​កន្លែង​​ហូប​ទឹកជាដើម។ ប៉ុន្តែយើងមិនទទួលបានសូម្បីតែការសម្រាក ១០ នាទី​ ដោយសារតែយើងត្រូវខិតខំការព្យាយាមដើម្បីសម្រេចបានគោលដៅដែលបានដាក់» ។

​ម្ចាស់​រោងចក្រ​ជាច្រើនមានទំនាក់ទំនងយ៉ាងជិត​ស្និទ្ធ​នឹង​អតីត​បក្ស​កាន់​អំណាច

ក្នុងរយៈពេលភ្លាមៗបន្ទាប់ពីរដ្ឋាភិបាលលោក Hasina ត្រូវបានផ្តួលរំលំ រោងចក្រជាច្រើនត្រូវបានខូចខាតដោយសាររងការវាយប្រហារត្រឡប់មកវិញ​។

​ម្ចាស់រោងចក្រ​មួយចំនួនត្រូវបានចាប់ខ្លួន និងចោទប្រកាន់ពីបទគាំទ្រលោក Hasina ដែល​កំពុងនិរទេសខ្លួននៅក្នុងប្រទេសឥណ្ឌា ដើម្បីគេចពីដីកាចាប់ខ្លួនសម្រាប់ «ការសម្លាប់រង្គាល ​ និងឧក្រិដ្ឋកម្មប្រឆាំងមនុស្សជាតិ»។ ឥឡូវនេះ រោងចក្រភាគច្រើនបានដំណើរការវិញហើយ ប៉ុន្តែនិយោជិតនិយាយថា ការផ្តល់លក្ខខណ្ឌមួយចំនួនកាន់តែអាក្រក់ជាងមុន។

កម្មករម្នាក់ទៀតដែលមានឈ្មោះក្រៅថា រ៉ាណា បាន​និយាយ​ដែរ​ថា៖«យើង​មិន​បាន​ទទួល​ប្រាក់​ខែ​ទាន់​ពេល​ទេ បន្ទាប់​ពី​ម្ចាស់​ត្រូវ​បាន​ចាប់​ខ្លួន»។

លោកថា៖«ឥឡូវនេះ ពួកគេបានផ្តល់ឱ្យខ្ញុំនូវប្រាក់ឈ្នួលគោលពាក់កណ្តាលរបស់ខ្ញុំ គឺប្រហែលពី៦០60 ដុល្លារ ទៅ ៧០ ដុល្លារអាមេរិក។ ខ្ញុំ​មាន​កូន​អាយុ​ប្រាំមួយ​ខែ​ម្នាក់ ប្រពន្ធ និង​ឪពុក​ម្តាយ​ចាស់ជរា​ដើម្បី​ចិញ្ចឹម»។

លោក Hossain ដែលបានបាត់បង់ការងាររបស់គាត់នៅក្នុងភាពចលាចលបានប្រាប់រឿងអំពីការលំបាករបស់គាត់។

ខណៈពេលដែលគាត់ទទួលបានការងារផ្នែកវេចខ្ចប់សម្លៀកបំពាក់ ដែលជាការងារថ្មីនេះន័យថាគាត់មិនទទួលបានអត្ថប្រយោជន៍ពីការកើនឡើងប្រាក់ខែនោះទេ ខណៈពេលដែលតម្លៃរស់នៅបានកើនឡើងជាប្រចាំ។

លោក​បាន​ថ្លែង​ថា​៖ «​ការ​ជួល​ផ្ទះ​បាន​ហក់ឡើង​ជាមួយ​នឹង​ព័ត៌មាន​នៃ​ការ​ដំឡើង​ប្រាក់ឈ្នួលថ្មី​»​។

ភាពផុយស្រួយនៅតែមាន

អ្នកស្រី Taslima Akhter មកពីក្រុមសហជីពកម្មករកាត់ដេរបង់ក្លាដែស (BGWS) ដែលជាអង្គការសិទ្ធិការងារបាននិយាយថា៖«កម្មករកំពុងតស៊ូដើម្បីរក្សាកម្រិតជីវភាពអប្បបរមា»។

លោក Akhter បាននិយាយថា ថៅកែរោងចក្រត្រូវតែទាមទារមកវិញពីបណ្តាអ្នកបញ្ជាទិញដែលចង់បង្កើនប្រាក់ចំណេញច្រើន ដោយសារចំណាយប្រាក់ឈ្នួលរស់នៅរបស់កម្មករកំពុងកើនឡើង។

អ្នក​ស្រី​បន្ត​ថា​៖ «​ម្ចាស់​រោងចក្រ​កាត់ដេរ​ត្រូវ​មាន​ការ​ទទួល​ខុស​ត្រូវ​បន្ថែម​ទៀត​ និង​រៀន​ចរចា​ឱ្យ​បាន​ល្អ​ជាមួយ​អ្នក​បញ្ជា​ទិញ​អន្តរជាតិ»។

«ឧស្សាហកម្មនេះមិនមែនថ្មីទេ ហើយបញ្ហាទាំងឡាយនោះមិនមែនថាមិនអាចដោះស្រាយបាននោះទេ»។ នេះបើយោងតាមលោកស្រី។

ទោះបីជាទទួលបានជោគជ័យលើផ្នែកសារពើពន្ធជាក់ស្តែងរបស់ឧស្សាហកម្មនេះក៏ដោយ លោក Abdullah Hil Raquib អតីតនាយក BGMEA បានព្រមានថាឧស្សាហកម្ម​នេះគឺស្ថិតនៅលើផ្លូវដ៏ផុយស្រួយនៅឡើយទេ។

​លោក​បាន​បន្ត​ថា​៖ «​ស្ថិរភាព​ក្នុង​វិស័យ​កាត់ដេរ​ដែល​យើងកំពុងមើល​ឃើញ​នៅ​ពេល​នេះ​គឺ​យើងឃើញតែផ្ទៃខាងក្រៅតែប៉ុណ្ណោះ»៕