មនុស្ស៩នាក់ស្លាប់ក្នុងគ្រោះថ្នាក់ចរាចរណ៍នាថ្ងៃទី២នៃពិធីបុណ្យចូលឆ្នាំថ្មី

គ្រោះថ្នាក់ចរាចរណ៍ផ្លូវគោកទូទាំងប្រទេស នៅថ្ងៃទី១៥ ខែមេសា ឆ្នាំ២០២៥ ចំថ្ងៃទី២នៃពិធីបុណ្យចួលឆ្នាំថ្មី បានសម្លាប់មនុស្ស៩នាក់ និងរងរបួស២០នាក់ ខណៈមូលហេតុដែលបណ្ដាលឱ្យមនុស្សស្លាប់ច្រើនជាងគឺទាក់ទងនឹង​ការបើកបរលើសល្បឿនកំណត់។

យោងតាមរបាយការណ៍របស់នគរបាលចរាចរណ៍​គ្រោះថ្នាក់ចរាចរណ៍នៅថ្ងៃទី១៥ ខែមេសា បាន​កើតឡើង១៣លើក បណ្ដាលឱ្យមនុស្ស៩នាក់ស្លាប់ក្នុងនោះស្រីម្នាក់ និងបង្ករបួសសរុប២០នាក់​ក្នុងនោះស្រី៥នាក់។

របាយការណ៍ដដែលបញ្ជាក់ថាមូលហេតុដែលបង្កអោយមានគ្រោះថ្នាក់ដែលបណ្ដាលឱ្យមនុស្សស្លាប់ច្រើនជាងគេដល់ទៅ៥នាក់ របួសធ្ងន់៥នាក់ និងរបួសស្រាលម្នាក់បណ្ដាលមកពីបើកបរល្មើសល្បឿន។ ក្រៅពីនោះការបើកបរដោយ​មិនគោរព​សិទ្ធបានសម្លាប់មនុស្សម្នាក់ មិនប្រកាន់ស្តាំបណ្ដាលឱ្យមនុស្ស២នាក់ស្លាប់ និងករណីស្រវឹងបណ្ដាលឱ្យស្លាប់ម្នាក់។

គួរឱ្យដឹងផងដែរថា គ្រោះថ្នាក់ចរាចរណ៍នៅថ្ងៃទី១៤ ខែមេសា ចំថ្ងៃទី១ នៃពិធីបុណ្យចូលឆ្នាំខ្មែរបានកើតឡើង៧លើក បណ្ដាលឱ្យមនុស្សស្លាប់៥នាក់ និងរបួសធ្ងន់ស្រាល១០នាក់៕

អត្ថបទដោយ ហ៊ុន សិរីវឌ្ឍន៍