កម្ពុជាសម្រេចបានផលិតកម្មជលផលជិត ១ លានតោន នៅឆ្នាំ ២០២៤

កម្ពុជាសម្រេចបានផលិតកម្មជលផលសរុបជិត ១ លានតោន នៅក្នុងឆ្នាំ ២០២៤ កើនឡើង ៦០ ពាន់តោន ស្មើនឹង៧% ធៀបនឹងឆ្នាំ ២០២៣ ក្នុងនោះផ្គត់ផ្គង់បាន ៩៥% នៃតម្រូវការក្នុងស្រុក ក្នុងនោះ ផលិត​ផលទឹកសាបកើនឡើង ៩,៥% ជលផលសមុទ្រកើនឡើង ១១% ខណៈវារីវប្បកម្មក៏​មាន​ការ​កើនឡើង។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍នៅថ្ងៃទី ២២ ខែមករា ឆ្នាំ ២០២៥នេះថា អនុវិស័យជលផល សម្រេចបានលទ្ធផលល្អប្រសើរ ក្នុងការខិតខំប្រឹងប្រែងទប់ស្កាត់បទល្មើសនេសាទ ទូទាំងប្រទេស ដែលមានកិច្ចសហប្រតិបត្តិការយ៉ាង​ជិតស្និទ្ធជាមួយក្រសួងស្ថាប័ន រដ្ឋបាលថ្នាក់ក្រោមជាតិ និងកងកម្លាំងប្រដាប់អាវុធ។ ប្រជានេសាទទូទៅមានភាពរីករាយ ទទួលបាននូវកំណើនត្រីទឹកសាប សម្រាប់ការផលិត​ប្រ​ហុក ផ្អក និងទទួលទានក្នុងតម្លៃសមរម្យ។

ក្រសួងកសិកម្មរក្សបាននូវលទ្ធផលល្អប្រសើរក្នុងការអភិរក្សធនធានជលផល ជាពិសេស សត្វផ្សោតទន្លេមេគង្គ ដែលឆ្នាំ ២០២៤ កើតកូនបាន ៩ ក្បាល និងស្លាប់តែ ៤ ក្បាល ដែលធ្វើឱ្យចំនួនសរុបកើនឡើង ដល់ ១០៤ ក្បាល៕