កម្លាំងចម្រុះខេត្តកំពង់ធំបន្តពង្រឹងកិច្ចការពារតំបន់អភិរក្សពូជត្រី ក្នុងបឹងទន្លេឆ្មារ និងតំបន់បាឡត

កម្លាំងចម្រុះ ក្រោមយន្តការគណៈកម្មការការពារ ទប់ស្កាត់ និងបង្ក្រាបទល្មើសធនធានធម្មជាតិខេត្តកំពង់ធំបន្តពង្រឹងកិច្ចការពារធនធានជលផលក្នុងតំបន់អភិរក្ស តាមរយៈសកម្មភាពចុះបង្ក្រាបបទល្មើសនេសាទខុសច្បាប់។ ជាក់ស្ដែងកាលពីថ្ងៃទី២៦ ខែមេសា ឆ្នាំ២០២៦ ឧត្តមសេនីយ៍ទោ សោម ស៊ុន អនុប្រធានអចិន្ត្រៃយ៍គណៈកម្មការការពារ ទប់ស្កាត់ និងបង្ក្រាបទល្មើសធនធានធម្មជាតិខេត្តកំពង់ធំ បានចុះពង្រឹងភារកិច្ចកងកម្លាំងចម្រុះការពារតំបន់អភិរក្សពូជត្រី នៅបឹងទន្លេឆ្មារ និងតំបន់បាឡត ក្នុងភូមិសាស្ត្រឃុំពាមបាង ស្រុកស្ទោង។

លើកឡើងក្នុងកិច្ចប្រជុំត្រួតពិនិត្យសកម្មភាពជាមួយកងកម្លាំងប្រចាំនៅទីបញ្ជាការស្រាល បង្ក្រាបបទល្មើសនេសាទ នៅឃុំពាមបាង ឧត្តមសេនីយ៍ទោ សោម ស៊ុន បានណែនាំដល់កងកម្លាំងចម្រុះទាំងអស់ ត្រូវសាមគ្គីសហការគ្នាឱ្យបានល្អ ក្នុងការអនុវត្តបទបញ្ជារបស់សម្ដេចធិបតី ហ៊ុន ម៉ាណែត និងបទបញ្ជាថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ក្នុងការបង្ក្រាបឱ្យបានដាច់ខាតនូវឧបករណ៍នេសាទខុសច្បាប់។

លោក បានសង្កត់ធ្ងន់ដល់ការអនុវត្តវិធានការម៉ឺងម៉ាត់ដើម្បីការពារបានតំបន់អភិរក្សធនធានមច្ឆជាតិនៅក្នុងតំបន់បឹងទន្លេឆ្មារ និងនៅតំបន់បាឡត។ ខណៈត្រូវមានកិច្ចសហការជាមួយអាជ្ញាធរដែនដី ក្នុងការអប់រំផ្សព្វផ្សាយជូនប្រជាពលរដ្ឋអំពីច្បាប់ស្ដីពីជលផលថ្មី ដើម្បីឱ្យពួកគាត់បានជ្រួតជ្រាប និងត្រូវចូលរួមអនុវត្តច្បាប់ឱ្យមានប្រសិទ្ធភាព។

តាមរបាយការណ៍របស់លោក ហួន ផល នាយផ្នែករដ្ឋបាលជលផលប្រចាំឃុំពាមបាង និងលោកអនុសេនីយ៍ឯក លុយ សុភាព មន្ត្រីយោធាប្រចាំការនៅទីបញ្ជាការស្រាលបង្ក្រាបបទល្មើសនេសាទនៅឃុំពាមបាង បានអះអាងថា​នៅក្នុងតំបន់នេះ បទ​ល្មើស​នេសាទ​មាន​ការ​ថយ​ចុះ​ប្រមាណ​៧០%​ ទៅ​៨០​%​ ហេីយផលត្រី​នៅ​ឆ្នាំ​នេះ​សំបូរ​ជាងបណ្តាឆ្នាំ​កន្លងទៅ​។

ឧត្តមសេនីយ៍ទោ សោម ស៊ុន បានថ្លែងការកោតសរសើរចំពោះកងកម្លាំងចម្រុះទាំងអស់ដែលបានខិតខំប្រឹងប្រែងបំពេញភារកិច្ចទាំងយប់ទាំងថ្ងៃ ដោយមិនខ្លាចនឿយហត់ ពិសេសក្នុងរដូវបុណ្យចូលឆ្នាំថ្មីកន្លងទៅនេះ ក្នុងការបង្ក្រាបបទល្មើសនេសាទខុសច្បាប់ ពិសេសការពារតំបន់អភិរក្សធនធានមច្ឆជាតិ ទុកឱ្យត្រីពងកូននៅក្នុងរដូវវស្សាខាងមុខ សម្រាប់បម្រើសេចក្តីត្រូវការរបស់សង្គមជាតិ និងប្រជាជនកម្ពុជានៅទូទាំងប្រទេស៕