ព័ត៌មានអន្ដរជាតិ

របៀបដែលបណ្ដាប្រទេសអាស៊ាន ចរចាជាមួយរដ្ឋបាល ត្រាំ ជុំវិញពន្ធគយបដិការ

បានផុស

៣ សប្តាហ៍ មុន

នៅ

ថ្ងៃពុធ ២៣ មេសា ២០២៥

ដោយ

ខណៈស្ថាប័នជំនាញ និងសេដ្ឋវិទូជាច្រើនព្រមានពីការធ្លាក់ចុះនៃពាណិជ្ជកម្ម និងសេដ្ឋកិច្ចសកលដោយសារតែគោលនយោបាយការពារនិយម ប្រធានាធិបតីអាមេរិក លោក ដូណាល់ ត្រាំ នៅថ្ងៃទី ២ មេសា បានប្រកាសឡើងនូវពន្ធគយបដិការ ដោយគ្រប់ដណ្ដប់លើ ១៨០ ប្រទេស និងតំបន់ ទៅតាមអត្រាពន្ធរៀងៗខ្លួនចន្លោះពី ១០ ភាគរយ (ជាពន្ធមូលដ្ឋាន) រហូតដល់ ៥០ ភាគរយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាស៊ីអាគ្នេហ៍ ដែលមានសហរដ្ឋអាមេរិកជាទីផ្សារនាំចេញដ៏សំខាន់នោះ បានរងនូវអត្រាពន្ធខ្ពស់ៗជាងគេ ធៀបទៅនឹងតំបន់ ក៏ដូចជាប្រទេសដទៃភាគច្រើនទូទាំងពិភពលោក។ ក្នុងនោះ រួមមាន កម្ពុជា ៤៩ ភាគរយ, ឡាវ ៤៨ ភាគរយ, វៀតណាម ៤៦ ភាគរយ, មីយ៉ាន់ម៉ា ៤៤ ភាគរយ, ថៃ ៣៦ ភាគរយ, ឥណ្ឌូណេស៊ី ៣២ ភាគរយ, ម៉ាឡេស៊ី និងប្រ៊ុយណេ ២៤ ភាគរយ, ហ្វីលីពីន ១៧ ភាគរយ និងសិង្ហបុរី តិចជាងគេ ១០ ភាគរយ។

យ៉ាងណាមិញ ប៉ុន្មានម៉ោង ក្រោយពន្ធគយបដិការចូលជាធរមាននៅថ្ងៃទី ៩ មេសា លោក ត្រាំ បានប្រកាសផ្អាកការអនុវត្តវាសិនរយៈពេល ៩០ ថ្ងៃ ដើម្បីបើកផ្លូវចរចា លើកលែងតែចិន។ ប៉ុន្តែអំឡុងពេលផ្អាកនេះ ប្រទេសក្រៅពីចិនដដែល នៅតែបន្តជាប់ពន្ធនាំចូលមូលដ្ឋានក្នុងអត្រា ១០ ភាគរយ។

លោក ត្រាំ ក៏ដូចជាមន្រ្តីរបស់លោក បានអះអាងនៅពេលនោះថា មានប្រទេសជាច្រើន សរុបជាង ៧០ បានទាក់ទងទៅសហរដ្ឋអាមេរិក ដើម្បីសុំការចរចា ប៉ុន្តែសេតវិមាននៃរដ្ឋបាលរបស់លោក មិនបានបញ្ចេញបញ្ចីថាមានប្រទេសណាខ្លះនោះទេ។ ហើយចាប់តាំងពីពេលនោះមក មានសេចក្ដីរាយការណ៍ជាច្រើនអំពីការចរចារៀងៗខ្លួននៃបណ្ដាប្រទេសជាច្រើន ជាមួយសហរដ្ឋអាមេរិក ដែលក្នុងនោះ រួមមានទាំងបណ្ដាប្រទេសក្នុងប្លុកអាស៊ាន ដែលប្ដេជ្ញាមិនចេញវិធានការសងសឹក តែផ្ដោតលើកិច្ចសន្ទនាប្រកបដោយស្ថាបនា។

១. កម្ពុជា

ដូចទៅនឹងប្រទេសក្នុងតំបន់ដទៃទៀតដែរ សហរដ្ឋអាមេរិកគឺជាទីផ្សារដ៏សំខាន់របស់កម្ពុជា ដោយកម្ពុជាបាននាំចេញទៅអាមេរិក ៩,៩២ ប៊ីលានដុល្លារ នៅឆ្នាំ ២០២៤ ជាមួយនឹងការនាំចូលមកវិញ ក្នុងតម្លៃ ២៦៤,១៥ លានដុល្លារ។

លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជា អំឡុងកិច្ចប្រជុំពិសេសរដ្ឋមន្រ្តីសេដ្ឋកិច្ចអាស៊ានតាមប្រព័ន្ធវីដេអូ (១០ មេសា)

ដោយមើលឃើញពីសារៈសំខាន់បែបនេះ រដ្ឋាភិបាលកម្ពុជានាពេលកន្លងមក បានខិតប្រឹងប្រែងដោះស្រាយតាមវិធីផ្សេងៗ។ ក្នុងការវិវត្តចុងក្រោយមួយ ឧបនាយករដ្ឋមន្រ្តី ស៊ុន ចាន់ថុល និងប្រធានតំណាងពាណិជ្ជកម្មសហរដ្ឋអាម៉េរិក លើកិច្ចការពាណិជ្ជកម្ម រវាងកម្ពុជា និងអាមេរិក រដ្ឋមន្រ្តីក្រសួងពាណិជ្ជកម្មកម្ពុជា លោកស្រី ចម និម្មល និងមន្ត្រីជាន់ខ្ពស់រដ្ឋាភិបាលផ្សេងទៀត បានចូលរួមកិច្ចពិភាក្សាតាមប្រព័ន្ធវិដេអូជាមួយឯកអគ្គរដ្ឋទូត Jamieson Greer តំណាងពាណិជ្ជកម្មសហរដ្ឋអាមេរិក កាលពីថ្ងៃទី ១៦ មេសា ដើម្បីរៀបចំផែនការឆ្ពោះទៅរកការចរចាជុំវិញបញ្ហាពន្ធរបស់លោក ត្រាំ។

មុននោះ រដ្ឋាភិបាលកម្ពុជាបានបង្កើតក្រុមការងារចំពោះកិច្ចចរចាសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-អាមេរិក ដែលដឹកនាំដោយលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា។

ក្រៅពីនោះ បន្ថែមពីលើការប្ដេជ្ញាចិត្តពង្រឹងពាណិជ្ជកម្មទ្វេភាគី ក៏ដូចជាចូលរួមក្នុងកិច្ចសន្ទនាជាមួយសហរដ្ឋអាមេរិក រដ្ឋាភិបាលកម្ពុជាបានប្រកាសទម្លាក់ពន្ធលើមុខទំនិញចំនួន ១៩ ប្រភេទ មកត្រឹម ៥ ភាគរយ។ ចុងក្រោយបង្អស់ នៅថ្ងៃទី ២១ មេសា នេះ នាយករដ្ឋមន្រ្តីកម្ពុជា សម្តេចមហាបវរធិបតី ហ៊ុន ម៉ាណែត បានបញ្ចាក់ជាថ្មីនូវគោលជំហរមិនចូលបក្សសម្ព័ន្ធរបស់កម្ពុជា ចំពេលដែលសង្រ្គាមពាណិជ្ជកម្មចិន-អាមេរិកបន្តឡើងកម្ដៅ ជាជាងការប្រកាន់បក្សពួកដែលធ្វើឱ្យខាតប្រយោជន៍របស់ប្រទេសពីភាគីណាមួយ។ ដែលនេះ ត្រូវបានគេមើលឃើញថា ជាជំហរការទូត ដើម្បីសម្របការចរចាណាមួយជាមួយសហរដ្ឋអាមេរិក។

២.វៀតណាម

មុនលោក ត្រាំ ប្រកាសពន្ធគយបដិការ វៀតណាមត្រូវបានគេចាត់ទុកថាជាប្រទេសរងហានិភ័យដ៏ធំបំផុតមួយ ដោយសារតែទំហំអតិរេកពាណិជ្ជកម្មរបស់ប្រទេសនេះជាមួយអាមេរិកមានរហូតដល់ ១២៣,៥ ប៊ីលានដុល្លារ កាលពីឆ្នាំ ២០២៤។ សហរដ្ឋអាមេរិក គឺជាទីផ្សារសំខាន់របស់វៀតណាមក្នុងទំហំនៃការនាំចេញឆ្នាំមុនប្រមាណ ១៣៦,៦ ប៊ីលានដុល្លារ។

ក្រោយលោក ត្រាំ ប្រកាសពន្ធគយបដិការ លោក To Lam អគ្គលេខាបក្សកុម្មុយនិស្តវៀតណាម បានសន្ទនាទូរស័ព្ទដើម្បីចរចាគ្នាលើបញ្ហាពន្ធ ជាមួយលោក ត្រាំ ដែលនិយាយថា កិច្ចសន្ទនាបានប្រកបទៅដោយ «ផ្លែផ្កា»។ នៅពេលពន្ធដដែលចូលជាធរមាន វៀតណាមបានស្នើទម្លាក់ពន្ធនាំចូលលើទំនិញអាមេរិករហូតដល់ ០ ភាគរយ ប៉ុន្តែមកទល់ពេលនេះ គេមិនទាន់ឃើញមានការអាប់ឌែតចុងក្រោយយ៉ាងណាទេ លើបញ្ហានេះ។

ទន្ទឹមនឹងនោះផងដែរ វៀតណាមបានបញ្ជូនឧបនាយករដ្ឋមន្ត្រីលោក Hồ Đức Phớc ឱ្យទៅចរចាដល់ទីក្រុងវ៉ាស៊ីនតោន ដោយបានជួបពិភាក្សាគ្នាជាមួយរដ្ឋមន្ត្រីក្រសួងរតនាគារអាមេរិក លោក Scott Bessent និងរដ្ឋមន្ត្រីក្រសួងពាណិជ្ជកម្ម Howard Lutnick ផងដែរ។

ក្រៅពីការចូលរួមផ្នែកការទូតបែបនេះ វៀតណាមបានប្ដេជ្ញាបង្កើនការនាំចូលពីសហរដ្ឋអាមេរិក លើមុខទំនិញសំខាន់ៗដូចជាឧស្ម័នធម្មជាតិពង្រាវ ផលិតផលកសិកម្ម បរិក្ខារបច្ចេកវិទ្យាទំនើប និងសម្ភារៈការពារជាតិជាដើម។ ក្រៅពីនេះ វៀតណាមក៏បានប្ដេជ្ញាបើកផ្លូវវិនិយោគក្នុងស្រុកសម្រាប់ក្រុមហ៊ុនអាមេរិកផងដែរ ខណៈជំរុញកិច្ចសហប្រតិបត្តិការលើវិទ្យាសាស្ត្រ បច្ចេកវិទ្យា និងការផ្លាស់ប្តូរឌីជីថល។

ឆ្លើយតបទៅនឹងការចោទប្រកាន់របស់អាមេរិកដែលថា ចិនបានប្រើវៀតណាមជាប្រទេសឆ្លងកាត់ដើម្បីគេចការរឹតបណ្ដឹងពន្ធគយលើទំនិញចិន រដ្ឋាភិបាលវៀតណាមបានប្រកាសបង្រ្កាបលើបញ្ហានេះ ក៏ដូចជាជំរុញក្រុមហ៊ុនរបស់ខ្លួនឱ្យបង្កើនការគ្រប់គ្រងលើប្រភពដើមនៃទំនិញ និងសម្ភារៈផ្សេងៗជាដើម។

៣. ថៃ

ក្នុងកាលៈទេសៈដែលសេដ្ឋកិច្ចដើរអូសជើងរបស់ថៃ ប្រឈមមុខនឹងបញ្ហាដោយកម្សោយតម្រូវការ និងបំណុលគ្រួសារខ្ពស់ ការនាំចេញគឺជាម៉ាស៊ីនជំរុញកំណើនដ៏សំខាន់មួយ។ កាលពីឆ្នាំ ២០២៤ ថៃមានអតិរេកពាណិជ្ជកម្ម ៤៥,៦ ប៊ីលានដុល្លារ ជាមួយសហរដ្ឋអាមេរិក ដែលជាទីផ្សារនាំចេញសំខាន់របស់ខ្លួន (៦៣,៣ ប៊ីលានដុល្លារ ឆ្នាំមុន)។

*នាយករដ្ឋមន្រ្តីថៃ លោកស្រី ផែតងតាន ស៊ីណាវ៉ាត្រា (កណ្ដាល)*

មុនលោក ត្រាំ ប្រកាសពន្ធគយបដិការ ថៃបានបញ្ជូនរដ្ឋមន្ត្រីក្រសួងពាណិជ្ជកម្ម លោក Pichai Naripthaphan ឱ្យទៅធ្វើទស្សនកិច្ចនៅទីក្រុងវ៉ាស៊ីនតោនក្នុងខែកុម្ភៈ ដើម្បីពិភាក្សាអំពីបញ្ហាពន្ធជាមួយមន្ត្រីសហរដ្ឋអាមេរិក ដោយសង្កត់ធ្ងន់ថា អតិរេកពាណិជ្ជកម្មភាគច្រើនគឺដោយសារតែទំនិញរបស់ក្រុមហ៊ុនអាមេរិកក្នុងស្រុកថៃ មិនមែនជាប្រាក់ចំណេញពាណិជ្ជកម្មនោះទេ។

បើតាមការចុះផ្សាយរបស់កាសែតបាងកកប៉ុស្ត៍ ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ លោក Pichai Chunhavajira រួមជាមួយរដ្ឋមន្ត្រីក្រសួងពាណិជ្ជកម្ម លោក Pichai គ្រោងនឹងដឹកនាំក្រុម «Team Thailand» ដែលជាក្រុមចរចារបស់ប្រទេស ទៅចូលរួមកិច្ចពិភាក្សាតាមការគ្រោងទុកជាមួយភាគីអាមេរិកនៅទីក្រុងវ៉ាស៊ីនតោន ឌីស៊ី នាពេលឆាប់ៗនេះ។ ក្រុម Team Thailand នឹងជួបជាមួយមន្រ្តីរដ្ឋបាល ត្រាំ និងភាគីពាក់ព័ន្ធសំខាន់ៗផ្សេងៗទៀត ដូចជាក្រុមហ៊ុនឯកជនក្នុងវិស័យកសិកម្ម និងឧស្សាហកម្មជាដើម។

កន្លងមក ដូចនឹងវៀតណាមដែរ ដើម្បីជាផ្នែកមួយនៃការចរចា ប្រទេសថៃបានប្ដេជ្ញាបង្កើនការនាំចូលទំនិញពីសហរដ្ឋអាមេរិក ដូចជាឧស្ម័នធម្មជាតិពង្រាវ មេតាន ផលិតផលកសិកម្មសម្រាប់ចំណីសត្វ និងសាច់ដូចជាសាច់គោ និងសាច់ជ្រូកជាដើម។

នាយករដ្ឋមន្រ្តីថៃលោកស្រី ផែតងតាន ស៊ីណាវ៉ាត្រា ឯណោះវិញ បាននិយាយកាលពីថ្ងៃព្រហស្បតិ៍សប្ដាហ៍មុនថា ថៃគាំទ្រវិធីសាស្រ្តរួមរបស់អាស៊ាន ក្នុងការចរចាជាមួយសហរដ្ឋអាមេរិកលើបញ្ហាបន្ធគយបដិការ តាមរយៈការជំរុញការនាំចូលពីប្រទេសក្នុងតំបន់។

មន្រ្តីថៃបាននិយាយថា ថៃបានប្ដេជ្ញារក្សា និងពង្រឹងទំនាក់ទំនងពាណិជ្ជកម្ម និងសេដ្ឋកិច្ចថៃ-សហរដ្ឋអាមេរិក ពង្រីកទីផ្សារសម្រាប់ក្រុមហ៊ុនអាមេរិក កាត់បន្ថយអតុល្យភាពពាណិជ្ជកម្ម ត្រួតពិនិត្យលើទំនិញនាំចេញទៅអាមេរិក ដើម្បីប្រាកដថាមិនមែនជាទំនិញប្រទេសដទៃ និងជំរុញការវិនិយោគរបស់ថៃនៅក្នុងស្រុករបស់អាមេរិកជាដើម។

៤. ឥណ្ឌូណេស៊ី

ប្រហាក់ប្រហែលនឹងបណ្ដាប្រទេសក្នុងតំបន់ផ្សេងទៀតដែរ ឥណ្ឌូណេស៊ីផ្ដោតលើការចរចាការទូត ជាជាងចាត់វិធានការសងសឹក ដែលអាចប៉ះពាល់ដល់ទីផ្សារនាំចេញ ២៨,១ ប៊ីលានដុល្លារ (២០២៤) របស់ខ្លួន។

កិច្ចប្រជុំរវាងមន្រ្តីឥណ្ឌូណេស៊ី ដឹកនាំដោយរដ្ឋមន្ត្រីសម្របសម្រួលកិច្ចការសេដ្ឋកិច្ច លោក Airlangga Hartarto ជាមួយរដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick

នៅឆ្នាំមុន ឥណ្ឌូណេស៊ីមានអតិរេកពាណិជ្ជកម្មជាមួយសហរដ្ឋអាមេរិកប្រមាណ ១៧,៩ ប៊ីលានដុល្លារ។ ក្រោមហេតុនេះហើយ ដើម្បីជាការចរចា ឥណ្ឌូណេស៊ីបានប្ដេជ្ញាធ្វើកំណែទម្រង់សេដ្ឋកិច្ចឆ្ពោះទៅរកតុល្យភាពពាណិជ្ជកម្មជាមួយសហរដ្ឋអាមេរិក ដោយបង្កើនការនាំចូលពីប្រទេសនេះរហូតដល់ ១៩ ប៊ីលានដុល្លារ សម្រាប់មុខទំនិញដូចជាប្រេងឆៅ ឧស្ម័ន LPG និងផលិតកសិកម្ម ដូចជាស្រូវសាលី និងសណ្ដែកសៀងជាដើម ខណៈកាត់បន្ថយលើការនាំចូលពីប្រទេសផ្សេងទៀត។

កាលពីសប្ដាហ៍មុន ឥណ្ឌូណេស៊ីបានបញ្ចូនគណៈប្រតិភូដឹកនាំដោយរដ្ឋមន្ត្រីសម្របសម្រួលកិច្ចការសេដ្ឋកិច្ច លោក Airlangga Hartarto ឱ្យទៅជួបចរចាគ្នាកម្រិតខ្ពស់ជាមួយមន្រ្តីរដ្ឋបាល ត្រាំ នៅរដ្ឋធានី វ៉ាស៊ីនតោន ឌីស៊ី ដើម្បីស្វែងរកការបន្ធូរបន្ថយពន្ធគយ។ លោក Airlangga និយាយថា ឥណ្ឌូណេស៊ីគឺជាប្រទេសមួយក្នុងចំណោមប្រទេសដែលរដ្ឋបាល ត្រាំ ទទួលរៀបចំកិច្ចចរចាទ្វេភាគីពាក់ព័ន្ធនឹងពន្ធ ក្រៅពីជប៉ុន អ៊ីតាលី និងវៀតណាម។

ក្នុងដំណើរទស្សនកិច្ចនោះ គេឃើញមានជំនួបកម្រិតខ្ពស់ជាច្រើនរវាងមន្រ្តីឥណ្ឌូណេស៊ី និងរដ្ឋបាល ត្រាំ រួមទាំងជំនួបជាមួយរដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick និងតំណាងពាណិជ្ជកម្ម លោក Jamieson Greer នៅថ្ងៃព្រហស្បតិ៍ ពោលគឺមួយថ្ងៃ បន្ទាប់ពីរដ្ឋមន្ត្រីការបរទេសឥណ្ឌូណេស៊ី Sugiono ជួបជាមួយរដ្ឋមន្ត្រីការបរទេសអាមេរិក លោក Marco Rubio ។ នេះបើតាមការចុះផ្សាយរបស់កាសែត Jakarta Globe។

ជំនួបដដែល មិនបានសម្រេចកិច្ចព្រមព្រៀងផ្លូវការណាមួយនោះទេ ប៉ុន្តែលោក Airlangga ថ្លែងថា ឥណ្ឌូណេស៊ី និងសហរដ្ឋអាមេរិក នឹងចរចគ្នាជាច្រើនជុំទៀត ក្នុងរយៈពេល ២ ខែទៅមុខ។

នៅខែមេសានេះផងដែរ រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី លោកស្រិ Sri Mulyani បាននិយាយថា ឥណ្ឌូណេស៊ីនឹងកែសម្រួលពន្ធនាំចូលលើទំនិញមួយចំនួន ពី ២,៥ ភាគរយ មកត្រឹម ០,៥ ភាគរយ រួមទាំងទូរស័ព្ទដៃ និងកុំព្យូទ័រយួរដៃ ផងដែរ។ លោកស្រីបន្ថែមថា ផលិតផលផ្សេងទៀត រួមទាំងដែកថែប និងឧបករណ៍វេជ្ជសាស្ត្ររបស់សហរដ្ឋអាមេរិក នឹងទទួលបានការបញ្ចុះពន្ធទាបចន្លោះត្រឹម ០-៥ ភាគរយ ពី ៥-១០ ភាគរយ នាពេលបច្ចុប្បន្ន។

ក្រៅពីនេះ ឥណ្ឌូណេស៊ីក៏គាំទ្រលើការធ្វើការរួមគ្នាជាមួយអាស៊ាន ដើម្បីជំរុញការចរចាជាមួយសហរដ្ឋអាមេរិកផងដែរ។

៥. ម៉ាឡេស៊ី

កន្លងមក មានការព្រមានថា ការដំឡើងពន្ធគយនឹងធ្វើឱ្យប៉ះពាល់ដល់វិស័យសំខាន់របស់ម៉ាឡេស៊ីដូចជាវាយនភ័ណ្ឌ គ្រឿងសង្ហារឹម កៅស៊ូ និងផ្លាស្ទិច និងសំខាន់បំផុត គឺបន្ទះឈីប ជាដើម។ សហរដ្ឋគឺជាទីផ្សារនាំចេញដ៏សំខាន់របស់ម៉ាឡេស៊ី ក្នុងទំហំសរុបប្រមាណ ៥២,៥ ប៊ីលានដុល្លារ នៅឆ្នាំ ២០២៤ ហហើយម៉ាឡេស៊ីមានអតិរេកពាណិជ្ជកម្មជាមួយសហរដ្ឋអាមេរិក ប្រមាណ ២៤,៨ ប៊ីលានដុល្លារ។

*នាយករដ្ឋមន្រ្តីម៉ាឡេស៊ី លោក អាន់វ៉ា អ៊ីប្រាហ៊ីម*

ខណៈប្រកាន់ខ្ជាប់ការមិនសងសឹក ម៉ាឡេស៊ីមិនបានប្ដេជ្ញាចិត្តបង្កើនការនាំចូលពីសហរដ្ឋអាមេរិក ដើម្បីដោះស្រាយកង្វល់របស់រដ្ឋបាល ត្រាំ លើអតុល្យភាពពាណិជ្ជកម្ម ដូចបណ្ដាប្រទេសមួយចំនួនក្នុងតំបន់នោះទេ។

យ៉ាងណាមិញ រដ្ឋមន្ត្រីពាណិជ្ជកម្មម៉ាឡេស៊ីលោក Zafrul Aziz គ្រោងនឹងដឹកនាំគណៈប្រតិភូ ធ្វើដំណើរទៅសហរដ្ឋអាមេរិកនៅថ្ងៃទី ២៤ ខែមេសា នេះ ដើម្បីជួបតំណាងពាណិជ្ជកម្មសហរដ្ឋអាមេរិក និងមន្ត្រីរដ្ឋបាល ត្រាំ ដទៃទៀត ដើម្បីពិភាក្សាអំពីពន្ធគយរបស់សហរដ្ឋអាមេរិក។

៦. សិង្ហបុរី

មកទល់ពេលនេះ សិង្ហបុរី ដែលមានឱនភាពពាណិជ្ជកម្ម ២,៨ ប៊ីលានដុល្លារ ជាមួយអាមេរិក កាលពីឆ្នាំ ២០២៤ មិនមានការចរចាដោយផ្ទាល់ជាមួយសហរដ្ឋអាមេរិក ទាក់ទងនឹងពន្ធគយ ១០ ភាគរយ លើទំនិញសិង្ហបុរីនោះទេ។ សិង្ហបុរីកំពុងផ្តោតលើវិធានការក្នុងស្រុក ដើម្បីកាត់បន្ថយផលប៉ះពាល់សេដ្ឋកិច្ច និងកំពុងសម្របសម្រួលជាមួយដៃគូក្នុងតំបន់ ជាពិសេសអាស៊ាន ដើម្បីដោះស្រាយផលប៉ះពាល់ធំទូលាយ។

ផ្ទុយទៅវិញ នាយករដ្ឋមន្ត្រីសិង្ហបុរី លោក Lawrence Wong បានសម្តែងការខកចិត្តចំពោះការសម្រេចចិត្តរបស់សហរដ្ឋអាមេរិក ដោយសង្កត់ធ្ងន់ថា អាមេរិកគួរតែលើកលែងសិង្ហបុរីពីពន្ធគោយក្រោមកិច្ចព្រមព្រៀងពាណិជ្ជកម្មសេរីទ្វេភាគី។ លោកបានរិះគន់ចំណាត់ការរបស់ ត្រាំ ដោយថាវាជា ការទាត់ចោល នូវមូលដ្ឋាននៃគោលការណ៍របស់អង្គការពាណិជ្ជកម្មពិភពលោក ហើយបានព្រមានថា វាអាចនាំឱ្យសេដ្ឋកិច្ចពិភពលោកមានការប្រេះស្រាំ។

ទោះបីជាយ៉ាងនេះក្តី សិង្ហបុរីបានប្រកាន់ការមិនសងសឹក ដើម្បីបញ្ចៀសកំណើននៃភាពតានតឹងពាណិជ្ជកម្ម ហើយបង្កើនការចំណាយសម្រាប់ពលរដ្ឋរបស់ខ្លួន។

៧. ឡាវ មីយ៉ាន់ម៉ា ប្រ៊ុយណេ ហ្វីលីពីន

មកទល់ពេលនេះ គេមិនឃើញមានចូលរួម ឬការប្រកាសការចរចាជាមួយរដ្ឋបាល ត្រាំ ណាមួយជាសាធារណៈ ឬជាដុំកំភួន ពីសំណាក់ប្រទេសឡាវ មីយ៉ាន់ម៉ា និងប្រ៊ុយណេ ជុំវិញពន្ធគយបដិការរបស់សហរដ្ឋអាមេរិកនោះទេ។

យ៉ាងណាមិញ ក្រសួងហិរញ្ញវត្ថុប្រ៊ុយណេ បាននិយាយកាលពីដើមខែមេសាថា ខ្លួនកំពុងចូលរួមជាមួយសមភាគីអាមេរិក ដើម្បីស្វែងរកការបំភ្លឺអំពីពន្ធថ្មី។ បើតាមកាសែតបាងកកប៉ុស្តិ៍នៅដើមខែមេសា មីយ៉ាន់ម៉ាឯណោះវិញ អនុរដ្ឋមន្ត្រីក្រសួងពាណិជ្ជកម្មលោក Min Min បាននិយាយថា ប្រទេសកំពុងពិចារណាវិធានការមួយចំនួន ដើម្បីដោះស្រាយពន្ធថ្មី ប៉ុន្តែមិនបានផ្តល់ព័ត៌មានលម្អិតណាមួយឡើយ។

ចំណែកឯប្រទេសហ្វីលីពីន ដែលមានអតិរេកពាណិជ្ជកម្ម ៤,៩ ប៊ីលានដុល្លារ កាលពីឆ្នាំមុន មិនបានប្ដេជ្ញាបង្កើនការនាំចូលពីសហរដ្ឋអាមេរិក ឬកាត់បន្ថយពន្ធលើទំនិញអាមេរិកនោះទេ។ ប៉ុន្តែហ្វីលីពីនកំពុងផ្តោតលើការចូលរួមការទូត និងកំពុងបន្តជំរុញឱ្យមានកិច្ចព្រមព្រៀងពាណិជ្ជកម្មសេរី (FTA) ជាមួយសហរដ្ឋអាមេរិក។ មុនលោក ត្រាំ ប្រកាសពន្ធគយបដិការ រដ្ឋលេខាធិការហិរញ្ញវត្ថុហ្វីលីពីន លោក Ralph Recto បានបង្ហាញពីការបើកចំហរក្នុងការបញ្ចុះពន្ធលើយានយន្តរបស់សហរដ្ឋអាមេរិក ប្រសិនបើ FTA ត្រូវបានសម្រេច។

យ៉ាងណាមិញ អនុរដ្ឋលេខាធិការផ្នែកទំនាក់ទំនងរបស់ប្រធានាធិបតីហ្វីលីពីន លោកស្រី Claire Castro បានឱ្យដឹងកាលពីសប្ដាហ៍មុនថា ជំនួយការពិសេសរបស់ប្រធានាធិបតីសម្រាប់ការវិនិយោគ និងកិច្ចការសេដ្ឋកិច្ច លោក Frederick Go នឹងដឹកក្រុមគណៈប្រតិភូហ្វីលីពីន ដើម្បីជួបជាមួយមន្ត្រីពាណិជ្ជកម្មសហរដ្ឋអាមេរិកនៅខែក្រោយ ដើម្បីចរចាពន្ធ។ លោកស្រីបន្តថា ហ្វីលីពីនប្រកាន់ខ្ជាប់នូវកិច្ចសហប្រតិបត្តិការ ជាជាងការប្រឈមមុខដាក់គ្នា៕