សេដ្ឋវិទូព្រមានថា ពន្ធអាមេរិកថ្មី​អាចប៉ះពាល់ធ្ងន់ធ្ងរដល់ការនាំចេញថៃ

សេដ្ឋវិទូ និងធុរកិច្ចថៃបាន​ព្រមានថា ​ពន្ធថ្មីរបស់សហរដ្ឋអាមេរិកអាចបង្កការគំរាមកំហែងយ៉ាងធ្ងន់ធ្ងរដល់ការនាំចេញរបស់ថៃ​នៅ​​ឆមាសចុងក្រោយនៃឆ្នាំនេះ ​ដោយវាបង្កឱ្យមានភាពមិនច្បាស់លាស់ថ្មីសម្រាប់ពាណិជ្ជកម្ម​។ នេះបើតាមការចុះផ្សាយរបស់កាសែតបាងកកប៉ុស្តិ៍។

លោកស្រី Nuttaporn Triratanasirikul អនុប្រធានគ្រប់គ្រងនៃមជ្ឈមណ្ឌលស្រាវជ្រាវ Kasikorn (K-Research) បាន​ថ្លែងថា ​ការ​នាំចេញរបស់ថៃនៅឆមាសទី២នៃឆ្នាំ ២០២៦ អាចនៅតែដដែលដូចឆ្នាំមុន ​ប្រសិនបើពន្ធគយក្រោមមាត្រា ៣០១ នៃច្បាប់ពាណិជ្ជកម្មសហរដ្ឋអាមេរិក ត្រូវអនុវត្តនៅខែក្រោយ។

មាត្រា ៣០១ អនុញ្ញាតឱ្យតំណាងពាណិជ្ជកម្មសហរដ្ឋអាមេរិក (USTR) ស៊ើបអង្កេត និងដាក់ពន្ធគយ​ ឬ​រឹតបន្តឹងពាណិជ្ជកម្មលើប្រទេសដែល​ប្រើ​គោលនយោបាយ «អយុត្តិធម៌ មិនសមហេតុផល» ឬរើសអើង ដែលដាក់​បន្ទុកដល់ពាណិជ្ជកម្មសហរដ្ឋអាមេរិក។ ​ករណីទាំងនោះ រួម​បញ្ចូលទាំងផលិតកម្មលើសលុប ​ការរំលោភបំពានកម្មសិទ្ធិបញ្ញា ពន្ធលើសេវាកម្មឌីជីថល និងពលកម្មដោយបង្ខំ ឬពលកម្មកុមារ។

ពន្ធថ្មី ដែលគ្រោងដាក់លើប្រទេសចំនួន ៥៩ និងសហភាពអឺរ៉ុប (EU) នឹងជំនួសពន្ធបណ្ដោះអាសន្ន ១០% ដែលត្រូវផុតកំណត់នៅចុងខែកក្កដា។ EU និងប្រទេសចំនួន ១៣ ​ត្រូវជាប់ពន្ធ ១០% ខណៈ​ថៃ ស្ថិតនៅក្នុងប្រទេសចំនួន ៤៦ ​ដែលត្រូវជាប់ពន្ធ ១២,៥% អមដោយចិន កូរ៉េខាងត្បូង ប្រេស៊ីល និងស្វីសជាដើម។

ក្នុងករណីខ្លះ សហរដ្ឋអាមេរិកអាចបន្ថែមពន្ធគយតាម​មាត្រា ៣០១ លើពន្ធគយដែលមានស្រាប់​លើ​ផលិតផលមួយចំនួន ដែលបញ្ហានេះ អាចបង្កើតភាពមិនប្រាកដប្រជាកាន់តែច្រើន។

លោកស្រី Nuttaporn បានប្រាប់កាសែតបាងកកប៉ុស្តិ៍ថា ដំណាក់កាលដំបូងនៃគោលនយោបាយពន្ធគយ ត្រូវបាន​បង្កើតឡើង​ដើម្បីដាក់សម្ពាធលើប្រទេស​គោលដៅ ឱ្យចូលទៅក្នុងការចរចាពាណិជ្ជកម្មជាមួយ​អាមេរិក។ ប្រទេសដូចជា​ថៃ អាច​ផ្ដល់ជម្រើសផ្សេងៗ​ដើម្បីធានាឱ្យអាមេរិកដាក់ពន្ធទាប ហើយប្រសិនបើអាមេរិកមិនពេញចិត្តនូវលទ្ធផលចរចាទេ ប្រសិនបើសហរដ្ឋអាមេរិកមិនពេញចិត្តនឹងលទ្ធផលនៃការចរចាទេ អត្រាពន្ធអាចនឹងកើនឡើងសម្រាប់ប្រទេសជាក់លាក់នៅពេលក្រោយមកទៀត។ ​

​បច្ចុប្បន្ននេះ ថៃមិនទាន់​សម្រេចបាន​កិច្ចព្រមព្រៀងពាណិជ្ជកម្ម និងពន្ធ​ចុងក្រោយជាមួយ​អាមេរិកនៅឡើយទេ ខណៈ​ម៉ាឡេស៊ី ឥណ្ឌូណេស៊ី និងកម្ពុជាជាដើមនោះ បាន​សម្រេចឡើងរួចហើយ។

លោកស្រី​ Nuttaporn ថ្លែងថា យុទ្ធសាស្ត្រ​មាត្រា ៣០១ អាច​បង្ក​​ឱ្យ​មាន​វិធានការ​តបត​ពី​ប្រទេស​ដែល​រង​ផល​ប៉ះពាល់​​ធ្ងន់ធ្ងរ ស្រដៀង​គ្នា​នឹង​អ្វី​ដែល​បាន​កើត​ឡើង​​ ពេលលោក ត្រាំ ដាក់ពន្ធបដិការដែរ។

​បើតាមអ្នកជំនាញដដែល​ K-Research រំពឹងថាការនាំចេញរបស់ថៃនឹងចុះខ្សោយនៅឆមាសទី២ នៃឆ្នាំនេះ បន្ទាប់​កើនឡើងជិត ២០% ធៀបនឹងឆ្នាំមុន ក្នុងរយៈពេល ៤ខែដំបូង។ ថ្មីៗនេះ ស្ថាប័ន​ដដែល​បានបង្កើនការព្យាករ​កំណើននាំចេញឆ្នាំ២០២៦របស់ថៃ ពីត្រឹម ១% ដល់ ៨,២%។

ដោយឡែក​សហព័ន្ធឧស្សាហកម្មថៃ (FTI) វិញ​ មានការព្រួយបារម្ភថា ពន្ធថ្មីតាមមាត្រា ៣០១​ ​អាចបង្កើនថ្លៃដើមសម្រាប់អ្នកនាំចេញថៃ។ លោកស្រី Pimjai Leeissaranukul ប្រធាន FTI បាននិយាយថា ក្រុមហ៊ុនផលិតម្ហូបអាហារទំនងជារងផលប៉ះពាល់ ខណៈគេមិនទាន់ច្បាស់ថាតើឧស្សាហកម្មផ្សេងទៀត ដូចជាគ្រឿងអេឡិចត្រូនិក នឹងប្រឈមមុខនឹងពន្ធនាំចូលខ្ពស់ជាងមុនរបស់​អាមេរិកដែរឬ​យ៉ាងណា​។

លោកស្រីបាននិយាយថា ក្រុមហ៊ុនផលិតគួរតែផ្តោតលើការគ្រប់គ្រងថ្លៃដើម ហើយប្រទេសថៃគួរតែខិតខំប្រឹងប្រែងបន្ថែមទៀតដើម្បីស្វែងរកទីផ្សារនាំចេញថ្មី។

​យ៉ាងណាមិញ អ្នកជំនាញខ្លះជឿថា ផលប៉ះពាល់នៃពន្ធថ្មីអាចមានកម្រិត ទោះបីជាវាអាចជាឧបសគ្គសម្រាប់ថៃក្នុងការប្រកួតប្រជែងជាមួយដៃគូសំខាន់ៗក្ដី ខណៈវៀតណាម ម៉ាឡេស៊ី ឥណ្ឌូណេស៊ី ជាដើមនោះ ជាប់ពន្ធថ្មីរបស់អាមេរិក ត្រឹម ១០%។ ​

​ការវាយតម្លៃ​បឋម​របស់​ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ បាន​បង្ហាញថា ផលប៉ះពាល់លើប្រទេសថៃមិនគួរធ្ងន់ធ្ងរ​ទេ ប៉ុន្តែផលិតផលដែលអាចរងផលប៉ះពាល់រួមមាន៖ អង្ករ
វាយនភណ្ឌ អំបោះ ឧបករណ៍ការពារផ្ទាល់ខ្លួន (PPE) និងបន្ទះសូឡាជាដើម៕

​