វិស័យឯកជនបន្តលើកកម្ពស់ការប្រើប្រាស់ស្លាកសញ្ញាស្តង់ដារផលិតផល​ដើម្បីជំរុញការប្រកួតប្រជែង​

សភាពាណិជ្ជកម្មកម្ពុជា បេ្តជ្ញា​បន្ត​​ជួយ​លើក​កម្ពស់​ដល់​ការធ្វើ​ធុរកិច្ច​របស់​សហគ្រិនកម្ពុជា ជាពិសេសការប្រើប្រាស់​ស្លាកសញ្ញា​ស្តង់ដារ​សម្រាប់ផលិតផល និងប្រព័ន្ធផលិតកម្ម ដើម្បីជំរុញការប្រកួតប្រជែងទាំងទីផ្សារក្នុងស្រុក និងអន្តរជាតិ។

​​អ្នក​ឧកញ៉ា គិត ម៉េង ប្រធានសភាពាណិជ្ជកម្មកម្ពុជា

នៅក្នុងសិក្ខា​សាលា​ស្តីពី «អត្ថប្រយោជន៍នៃការប្រើប្រាស់ស្លាកសញ្ញាស្តង់ដារសម្រាប់ផលិតផល និងប្រព័ន្ធផលិតកម្ម» កាល​ពី​ពេល​ថ្មី​ៗ​កន្លង​ទៅ​នេះ បានគូសបញ្ជាក់ឱ្យដឹងថា សភាពាណិជ្ជកម្មកម្ពុជា នៅតែបន្តជួយលើកកម្ពស់ដល់ការធ្វើធុរកិច្ចរបស់សហគ្រិនកម្ពុជា ឱ្យយល់ដឹងកាន់តែប្រសើរឡើងនូវការប្រើប្រាស់ស្លាកសញ្ញាស្តង់ដារសម្រាប់ផលិតផល និងប្រព័ន្ធផលិតកម្ម ដើម្បីជំរុញការប្រកួតប្រជែងទាំងទីផ្សារក្នុងស្រុក និងអន្តរជាតិ។

លោក ផេង សិទ្ធី បានថ្លែង​ថា ស្ដង់ដារគឺ​ជា​ឧបករណ៍​​ក្នុងការវាស់វែង​ផលិតផលមួយ អំពី​​សុវត្ថិភាព និង​គុណភាព​សម្រាប់​​អ្នក​បរិភោគ​បាន នោះ​គឺជា​ទីផ្សារដ៏សំខាន់ ដូច្នេះម្ចាស់សហគ្រាស សិប្បកម្ម​ទាំងអស់ត្រូវ​គិតអំពីស្តង់ដារលើផលិតផល និងប្រព័ន្ធផលិតកម្មរបស់ខ្លួនឱ្យបានល្អ ដើម្បីប្រយោជន៍បានយូរអង្វែង ។

អ្នកឧកញ៉ា ភួ វាសនា បានលើកឡើងពីសារៈសំខាន់​នៃស្លាកសញ្ញាស្តង់ដារក្នុងការកសាងទំនុកចិត្តរបស់អ្នកប្រើប្រាស់ និងធានាគុណភាពផលិតផល ជាពិសេសផលិតផលដែលមានបំណងនាំចេញ។

ជាពិសេសសិក្ខាសាលានេះ បានផ្តល់​នូវសារៈសំខាន់យ៉ាង​ចាំបាច់ជូនដល់​អ្នកចូលរួម អាចឈ្វែងយល់កាន់តែស៊ីជម្រៅអំពីនិតីវិធី និងអត្ថប្រយោជន៍​នៃការប្រើប្រាស់ស្លាក​សញ្ញាស្ដង់ដារ​សម្រាប់ផលិតផល និងប្រព័ន្ធផលិតកម្ម ដែលបានពន្យល់​យ៉ាងក្បោះក្បាយ​លម្អិតពីមន្រ្ដី​ជំនាញមកពីវិទ្យាស្ថានស្ដង់ដារ នៃក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍។

សិក្ខាសាលានេះ រៀបចំឡើង ក្នុងគោល​បំណងលើកកម្ពស់គុណភាព និងសុវត្ថិភាពផលិតផល ជំរុញការប្រកួតប្រជែង និងពង្រីកទីផ្សារ  ក៏ដូច​ជាបញ្ជ្រាប​ការយល់ដឹង​ឱ្យកាន់តែទូលំទូលាយ​ពីអត្ថប្រយោជន៍​នៃការប្រើប្រាស់ស្លាកសញ្ញាស្តង់ដារលើផលិតផល និងប្រព័ន្ធផលិតកម្ម ដើម្បីបង្កើនទំនុកចិត្តពីអតិថិជន និងរក្សាបានចីរភាពលើទីផ្សារសម្រាប់ម្ចាស់សហគ្រាសនានា៕