តម្លៃប្រេងធ្លាក់ចុះជាង៣% ពេលបើកការជួញដូរ ខណៈ OPEC+ បង្កើនផលិតកម្ម

តម្លៃប្រេងអន្តរជាតិ បានធ្លាក់ចុះជាង ៣ ភាគរយ នៅពេលបើកការជួញដូរលើទីផ្សារអាស៊ីនាព្រឹកថ្ងៃចន្ទនេះ ក្រោយអង្គការនៃប្រទេសនាំចេញប្រេង និងសម្ព័ន្ធមិត្ត (OPEC+) ប្រកាសបង្កើនផលិតកម្ម ដោយបន្ថែមក្ដីបារម្ភទៅលើកំណើនផ្គត់ផ្គង់។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេង​នាពេលអនាគត​ ម៉ាក Brent បានធ្លាក់ចុះ ២,០៤ ដុល្លារ ឬ ៣,៣៣ ភាគរយ ​ដោយបើកការជួញដូរនៅត្រឹម ៥៩,២៥ ដុល្លារ/បារ៉ែល ខណៈប្រេងឆៅអាមេរិក ម៉ាក ​West Texas Intermediate (WTI) វិញ ធ្លាក់ចុះ ២,១០ ដុល្លារ ឬ ៣,៦០ ភាគរយ ដោយបើកការជួញដូរនៅ ៥៦,១៩ ដុល្លារ/បារ៉ែល។ ​

កាលពីថ្ងៃសៅរ៍ OPEC + បាន​ព្រមព្រៀងគ្នា​ ក្នុងការបង្កើន​ផលិតកម្មប្រេងសម្រាប់រយៈពេល២ខែជាប់គ្នាៗ​នៅខែមិថុនា ប្រមាណ ៤១១ ០០០ បារ៉ែល/ថ្ងៃ។​ បើតាមរ៉យទ័រ ​​ការប្រកាសចុងក្រោយ នឹងបង្កើនផលិតកម្មប្រេងសរុបសម្រាប់ខែមេសា ឧសភា និងមិថុនា ដល់ ៩៦០ ០០០ បារ៉ែល/ថ្ងៃ ​ឬស្មើនឹង​ការ ៤៤ ភាគរយ នៃផែនការកាត់បន្ថយ ២,២ លានបារ៉ែល/ថ្ងៃ កាលពីមុន របស់ប្លុកដដែល​។

គេមើលឃើញថា ការសម្រេចចិត្តរបស់ OPEC + គឺដូចទៅនឹង​ការទាមទាររបស់ប្រធានាធិបតីអាមេរិក លោក ដូណាល់ ត្រាំ នាពេលកន្លងមក ដើម្បីឱ្យតម្លៃប្រេងធ្លាក់ចុះ។ យ៉ាងណាមិញ តម្លៃប្រេងបានធ្លាក់ចុះក្នុងរយៈពេលប៉ុន្មានសប្ដាហ៍ចុងក្រោយ ដោយសារតែគោលនយោបាយពន្ធគយរបស់លោក ត្រាំ ដែលបង្កក្ដីបារម្ភសម្រាប់សេដ្ឋកិច្ច៕