តម្លៃមាសក្នុងស្រុកធ្លាក់ចុះក្រោម ៤០០ ដុល្លារ ក្នុងមួយជី

តម្លៃហាងឆេងមាសក្នុងស្រុកតាមបណ្ដាហាងនានាក្នុងរាជធានីភ្នំពេញនៅថ្ងៃទី ០៥ ខែឧសភា ឆ្នាំ ២០២៥ មានតម្លៃ ៣៩៦ ដុល្លារ ក្នុងមួយជី ខណៈអ្នកជំនាញអះអាងថា មាសមាននិន្នាការធ្លាក់​ចុះ​ បន្ទាប់ពីអាមេរិកបន្ទន់ជំហរដាក់ចិន។

ហាងឆេងមាសបានបើកផ្សារនៅតម្លៃ ៣ ៩០៤ ដុល្លារ ក្នុងមួយតម្លឹងសម្រាប់ទៅផ្សារនៅកម្ពុជានៅថ្ងៃច័ន្ទទី ០៥ ខែឧសភា ឆ្នាំ ២០២៥ ជាតម្លៃធ្លាក់​ចុះ​ ធៀបនឹង​សប្ដាហ៍​មុន ដែលមាន​តម្លៃរហូតដល់ ៤០៦០ ដុល្លារ​​ក្នុងមួយតម្លឹង។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បានឱ្យដឹងថា សម្ពាធពន្ធអាមេរិក និងចិនធូរស្រាល ធ្វើឱ្យតម្លៃមាសបន្តធ្លាក់ចុះ ខណៈគោលន​យោ​បាយហិរញ្ញវត្ថុ​ធនាគារ​កណ្ដាល​​សហ​រដ្ឋអា​មេរិក បន្ទាប់ពី លោក ដូ ណាល់ត្រាំ បានបញ្ជាក់​ថា មិនមានចេតនា ដក​លោក ​Jerome Powell ចេញពីដំណែងនោះទេ ក៏ជាឆ្លុះបញ្ចាំងពីការ​ប្រែ​ប្រួលតម្លៃមាសផងដែរ។

ម្យ៉ាងទៀត វិនិយោគិនជាច្រើន បានកាត់យកផលចំណេញនៅតម្លៃ ៣៤៩៩ ក្នុងមួយអោន ដែល​​ជាតម្លៃខ្ពស់ កាលពីខែមុន ខណៈភូមិសាស្ត្រនយោបាយ និងសង្គ្រាមស្ងប់ស្ងាត់ ហើយ​ប្រាក់​ដុល្លារ​ងើបឡើង ធ្វើឱ្យមាសធ្លាក់ចុះវិញ។

លោក ឡុង សំណាង យល់ឃើញថា៖ «ការប្ដូរប្រាក់ដុល្លារជាមួយរូបិយបណ្ណបាន​ងើបឡើង​បន្តិច​​នៅ​តាមបណ្ដាធនាគារធំៗនៅលើពិភពលោក ពោលគឺប្រាក់ដុល្លារមានភាពល្អប្រសើរ ទាញ​​ឱ្យ​តម្លៃ​ហាងឆេងមាសធ្លាក់ចុះបន្តិចទៀត»។

អាជីវករផ្សាធរថ្មីបានប្រាប់ថា តម្លៃមាសប្រែប្រួលឡើងចុះលឿនធ្វើឱ្យសកម្មភាពនៃការទិញ-លក់ ហាក់​ស្ងប់ស្ងាត់។ នៅថ្ងៃទី ០៥ ខែឧសភា ឆ្នាំ២០២៥ តម្លៃមាសក្នុងស្រុកតាមបណ្ដាហាងនានាក្នុងរាជធានីភ្នំពេញ​លក់ចេញក្នុងតម្លៃ ៣៩៦ ដុល្លារ មួយជី៕

អត្ថបទ៖ ឡេង ដេត