រោងចក្រផលិតស៊ីម៉ងត៍ ខនស៍ ខេធី ស៊ីមេន មានតម្លៃ $២៥០ លាន បើកឱ្យដំណើរជាផ្លូវការ

រោងចក្រផលិតស៊ីម៉ងត៍ ខនស៍ ខេធី ស៊ីមេន (ភ្នំពេញ) ឯ.ក មានតម្លៃប្រមាណ ២៥០ លានដុល្លារ ស្ថិតនៅក្នុងឃុំហោងសំណំ ស្រុកឱរ៉ាល់ ខេត្តកំពង់ស្ពឺ ត្រូវបានដាក់ឱ្យដំណើរការជាផ្លូវការនៅថ្ងៃទី ២០ ខែឧសភា ឆ្នាំ ២០២៥ ក្រោមអធិប​តីភាពសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

លោក លី ឈានហ្វុង អគ្គនាយកក្រុមហ៊ុន ខនស៍ ខេធី ស៊ីមេន មានប្រសាសន៍ថា គិតមកទល់ពេលនេះ ក្រុមហ៊ុន ខនស៍ ខេធី ស៊ីមេន បានវិនិយោគទុនប្រមាណ ៤៨០ លានដុល្លារនៅកម្ពុជា និងបង្កើតឱកាសការងារជិត ១ ពាន់កន្លែង និងបានក្លាយជារោងចក្រផលិតស៊ីម៉ងត៍ធំជាងគេនៅកម្ពុជា។ រោងចក្រផលិតស៊ីម៉ងត៍ ខនស៍ ខេធី ស៊ីមេន ជាគម្រោងខ្នាតធំទី២ ដែលបានវិនិយោគ និងសាងសង់ដោយ​សហគ្រាស ខនស៍ គ្រុប នៅកម្ពុជា។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា ចាប់តាំងពីឆ្នាំ ២០០៧ កម្ពុជា​ចាប់ផ្ដើមកសាងឡើង​វិញនូវសមត្ថភាពផលិតស៊ីម៉ងត៍ ខណៈមកដល់ពេលនេះ កម្ពុជាមានរោងចក្រចំនួន ៦ ដែលកំពុងដំណើរការ ដែលអាចផលិតបាន ១១ លានតោន ក្នុងមួយឆ្នាំ និងផ្គត់ផ្គង់តម្រូវការក្នុងស្រុក ១០០% ព្រមទាំងនាំចេញ។

សម្ដេចធិបតី ហ៊ុន ម៉ាណែត មានប្រសាសន៍ថា៖ «ពីប្រទេសមួយដែលនាំចូលស៊ីម៉ងត៍ រហូតដល់ឆ្នាំ ២០០៧ ទៅជាប្រទេសដែលអាចផ្គត់ផ្គង់ស៊ីម៉ងត៍ខ្លួនឯងបាន ហើយនាំចេញ នេះជាមោទនភាពមួយរបស់យើង»។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា ការដាក់ឱ្យដំណើរការរោងចក្រផលិតស៊ីម៉ងត៍ របស់​ក្រុមហ៊ុន ខនស៍ ខេធី ស៊ីមេន ដែលជារោងចក្រទី២ បានផ្ដល់ឱកាសឱ្យកម្ពុជាមានលទ្ធភាពកាន់តែច្រើនថែមទៀត និងមានការផ្គត់ផ្គង់ស៊ីម៉ងត៍ដោយខ្លួនឯង។

រោងចក្រដែលកើតចេញពីការវិនិយោគរួមគ្នា ដោយក្រុមហ៊ុន Conh Internation Holding (KH) Limited និងក្រុមហ៊ុន KT ខេធី ស៊ីមេន កំពង់ស្ពឺ បានរួមគ្នាដាក់ទុនសរុបប្រមាណ ២៥០ លានដុល្លារ ជាមួយសមត្ថភាពផលិត ២,២ លានតោន ក្នុងមួយឆ្នាំ សម្រាប់តម្រូវការក្នុងស្រុក និងនាំចេញ។

ក្រុមហ៊ុន ខនស៍ ខេធី ស៊ីមេន ទទួលបានអាជ្ញាបណ្ណស្វែងរុករករ៉ែ ថ្មកំបោរ ដែលជាវត្ថុធាតុដើមសំខាន់ ក្នុងការផលិតស៊ីម៉ង់ត៍ ទី១ ក្នុងខែមិថុនា ឆ្នាំ ២០២១ ហើយបានអាជ្ញាបណ្ណរុករកថ្មកំបោរទី២ នៅ ខែកុម្ភៈ ឆ្នាំ ២០២៣ ដែលមានផ្ទៃដីទំហំ ៣៣៨,២៨ ហិកតា ស្ថិតនៅស្រុកឱរ៉ាល់ ខេត្តកំពង់ស្ពឺ។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល មានប្រសាសន៍ថា គិតមកទល់ពេលនេះ ក្រុមហ៊ុន ខនស៍ ខេធី ស៊ីមេន គឺជាក្រុមហ៊ុនវិនិយោគទី៦ ដែលបានបោះទុនវិនិយោគបង្កើតរោងចក្រស៊ីម៉ងត៍នៅកម្ពុជា។

លោករដ្ឋមន្ត្រីថ្លែងថា ការអភិវឌ្ឍហេដ្ឋារចនាសម្ព័ន្ធនៅតែជារបៀបវារៈសំខាន់ នៃគោលនយោបាយរបស់រាជរដ្ឋាភិបាល ហើយវិស័យឧស្សាហកម្មស៊ីម៉ងត៍ បានចូលរួមសំខាន់ ក្នុងការអភិវឌ្ឍសេដ្ឋកិច្ច សង្គមកម្ពុជា ខណៈកម្ពុជាមានសមត្ថ​ភាព​សម្រេចបានការផ្គត់ផ្គង់ស៊ីម៉ងត៍ផលិតក្នុងស្រុក ១០០% និងបាននាំចេញទៅក្រៅប្រទេស ៣ ម៉ឺនតោន នៅឆ្នាំ ២០២៤៕

អត្ថបទ៖ ឡេង ដេត